Ngaahi Tokoni ʻe 7 ki Hono Fai ʻo ha Malanga
ʻOku nofo e tokotaha naʻá ne faʻú ʻi ʻIutā, USA.
ʻE vave haʻo lea ʻi he houalotu sākalamēnití? ʻAhiʻahiʻi e ngaahi tokoni ko ʻení.
Heiʻilo koe, ka ʻi he taimi ʻoku vahe mai ai ke u fai ha malanga ʻi he houalotu sākalamēnití, ʻoku ou ongoʻi manavasiʻi moʻoni—ʻo ʻikai fekauʻaki mo hono tohi e malangá ka ko hono fakahoko e malangá. ʻOku ou hohaʻa maʻu pē, “ʻE fēfē kapau ʻoku ou fuʻu taʻeoli? ʻE fēfē kapau ʻe ngalo ʻiate au e meʻa ke lea ʻakí? ʻE fēfē kapau te u fehalaaki ʻi ha foʻi lea?”
Kuó ke ongoʻi pehē? (ʻOfa ʻoku ʻikai ke u toko taha pē.) Kapau ʻoku pehē, ʻoku ʻikai ko e ngataʻanga ia ʻo e māmaní! Vakaiʻi ʻa e ngaahi tokoni ko ʻeni ʻe fitu ke fakaleleiʻi hoʻo pōtoʻi leá pea fai ha malanga ʻoku fakamānako.
Ko Hono Teuteu ʻo e Malangá
-
Fakaʻaongaʻi e folofolá mo e ngaahi akonaki ʻa e kau palōfita ʻo onopōní (vakai, T&F 52:9). Ko e uho ʻeni ʻo hoʻo malangá. Ko hono moʻoní, ko e taha ia ʻo e ngaahi tefitoʻi ʻuhinga ʻoku tau ʻi he lotú ai—ke akoʻi mo ako e ongoongolelei ʻo Sīsū Kalaisí. Te ke lava ʻo ako hoʻo tefitó ʻaki e tokoni ʻa e Fakahinohino ki he Ngaahi Folofolá (ʻi he scriptures.lds.org) pea mo e ngaahi lea mei he konifelenisi lahí (kumi fakafoʻitefito ʻi he gc.lds.org). Fakapapauʻi ʻoku mahino kiate koe ʻa e folofolá mo e ngaahi kupuʻi lea ʻokú ke palani ke fakaʻaongaʻi ʻi hoʻo malangá. Kapau ʻokú ke fie maʻu tokoni, kole ki hoʻo ongomātuʻá pe kau taki ʻo e Siasí.
-
Fakaafeʻi ʻa e Laumālié. Ko ha fakakaukau lelei maʻu pē ke lotu mo teuteu ki muʻa ke ke maʻu ʻa e Laumālié ʻi hoʻo leá. ʻOku ʻikai ngata pē hono fakafiemālieʻi ʻe he Laumālié hoʻo manavasiʻí, ka ʻokú Ne toe fakamoʻoni foki ki he moʻoní (vakai, T&F 42:14). Fakaafeʻi ʻa e Laumālié ki hoʻo houalotu sākalamēnití ʻaki haʻo fakamoʻoni ki he meʻa ʻokú ke tui ʻoku moʻoní.
-
Fakakaukau ki ha talanoa fakafoʻituitui. Ko e taha ʻo e ngaahi founga lelei taha ke fehokotaki ai mo e niʻihi kehé ʻoku fou ʻi he ngaahi talanoá. ʻOku mau saiʻia ʻi he fanongo ki he ngaahi aʻusia e niʻihi kehé mo e anga ʻo ʻenau moʻuí. Ko ia, feinga ke ke fakakaukau ki ha aʻusia mālie, makehe, pe faingataʻa kuó ke foua ʻoku fekauʻaki mo e tefitoʻi moʻoni ‘o e ongoongolelei ne vahe atu ke ke malanga aí. Ko e hā naʻá ke ako mei he meʻa ko ia ne hokó? Naʻá ne tokoniʻi fēfē koe? Ko ha founga lelei ʻeni ke kamata ʻaki hoʻo malangá ʻo kapau ʻokú ke faingataʻaʻia ʻi he founga kamatá.
-
Akoako, akoako, akoako! Hili hoʻo hiki hoʻo malangá, mahalo te ke fie akoako lau leʻo lahi ʻiate koe pē, peá ke toki ʻahiʻahi ʻi muʻa ʻi he kau mēmipa ho fāmilí pe ngaahi kaungāmeʻá. Te ke lava ʻo ʻiloʻi pe ʻoku lōloa feʻunga hoʻo malangá mo e taimi kuo vaheʻi atú mo ʻi ai ha ngaahi konga ʻe fie maʻu ke ke fakamahinoʻi. Kapau ʻoku sai pē ki hoʻo pīsopé, te ke lava ʻo feinga ke ʻalu muʻomuʻa ki homou falelotú ʻo ʻahiʻahiʻi hoʻo leá ʻi he tuʻunga malangá!
Fai ʻo e Malangá
-
Fakaʻehiʻehi mei he kamataʻanga ʻoku pehē, “ʻOku ʻikai ke u fie tuʻu atu hení.” ʻE lava ke kehekehe pē ʻa e kamataʻanga ko ʻení, ka ʻoku fakatokangaʻi vave ia ʻe he kau fanongo tokolahi. ʻOku meimei ke faʻa hangē ko ʻení, “ʻI he taimi naʻe tā mai ai ʻa e pīsopé ʻo kole ke u fai ha malangá, naʻá ku feinga ke kumi ha ʻuhinga ke u hao ai.” Ko e tokolahi e kāingalotu ʻo e Siasí ʻoku mahino kiate kinautolu ʻa e faingataʻa ʻo hono fai ʻo ha malangá, ka ʻi he taimi ʻokú ke pehē ai, “ʻOku ʻikai ke u fie ʻi hení,” ʻe lava ke ongoʻi ia ʻe he kakaí ko hoʻo pehē, “Kātaki ʻo ʻoua te mou fanongo mai kiate au.” Ko e lelei tahá ke ke fakaʻehiʻehi mei he faʻahinga kamata ko ʻení—ka ke vēkeveke fekauʻaki mo hoʻo tefitó!
-
Lea ke mahino. ʻOku ʻikai ko ha meʻa foʻou ki ha taha ke lea vave pe leʻo siʻi koeʻuhí ko ʻene manavasiʻí. ʻOku lava ʻo mahino ia kiate au! Ka ʻoku mahuʻinga ke ke lea mahino ʻi hoʻo fai hoʻo malangá koeʻuhí ke mahino ki he kāingalotú. Feinga ke kiʻi māmālie hifo, ʻo puʻaki lelei hoʻo ngaahi leá, mo ngāue ʻaki ho leʻó (ʻio, naʻa mo e maiká, ʻe malava pē ke fuʻu leʻo siʻi). ʻOku fie maʻu ʻe he kakaí ke nau fanongo ki he meʻa ʻokú ke lea ʻakí!
-
Sio maʻu pē ki ʻolunga. Ko e fetuʻutaki matá ko ha konga mahuʻinga ʻaupito ʻo e fetuʻutaki leleí. ʻOkú ne fakahaaʻi ʻokú ke tokanga moʻoni mo mahuʻingaʻia ʻi ha pōtalanoa. Kae kehe, ʻoku ʻikai ko ha meʻa pau ke ke fetuʻutaki mata mo e taha kotoa ʻi he fakatahaʻangá ʻi hoʻo leá, ka ʻo kapau te ke toutou sio ki mui pe konga ki muʻa ʻo e lokí, te ke hoko ko ha tokotaha lea ʻoku fakamānako lahi ange. Fakaʻehiʻehi mei he sio taha pē ki hoʻo meʻa naʻe hikí! ‘Oku fie maʻu ʻe hoʻo kau fanongó ke sio ki hoʻo malimalí, kae ʻikai ko e tumuʻaki ho ʻulú.
Neongo ʻa e ngaahi tokoni ko ʻení ʻe fitu, ʻe malava pē ke kei fehalaaki haʻo foʻi lea pe fakatokangaʻi ha taha ʻoku tulemohe ʻi he ʻotu hono tolú. Ka ʻoku ʻuhinga nai ia ʻoku ʻikai ko ha tokotaha lea lelei koe? ʻIkai ʻaupito!
ʻI he taimi ʻoku tau kiʻi mavahe ai mei he tuʻunga ʻoku tau fiemālie aí, ʻoku angamaheni pē ke tau ongoʻi tailiili pe fai ha fanga kiʻi fehalaaki. Ka ʻi hoʻo feinga ho lelei tahá mo fakaafeʻi ʻa e Laumālié, ʻoku ʻikai mahuʻinga ia kapau te ke nenu pe ngalo ʻiate koe ke ke lea ʻaki ha meʻa. ʻOkú ke fai e ngāue ʻa e ʻOtuá mo tokoni ke ʻilo lahi ange ʻEne fānaú ki he ongoongoleleí!
Kapau te ke akoʻi mo fakamoʻoni ki he meʻa ʻokú ke tui ki aí, ʻe lelei ʻa e meʻa kotoa pē.