Tuʻukimuʻa ha Tokotaha Hiva Tonga ʻi he NZ Charts
ʻOku ʻikai anga ʻa Sonatane Kaufusi ia he maʻu e tokanga ʻa e mītiá. Kae mahalo kuo pau ke feinga e tokotaha hiva Tonga ko ʻení ke anga ki ai ʻi he aʻu ko ia ʻene foʻi hiva ko e ‘Birdie’ ʻo fika ʻuluaki ʻi he Saati Spotify’s Viral Top 50.
Naʻá ne pehē, “ʻOku mātuʻaki fakaoli ʻeku fanongo ki hono tā mai ʻeku foʻi hivá.” “ʻOku ou fanongo ki hono tā takai ʻeku foʻi hivá ʻi he akó pea ʻoku taʻeʻamanekina.”
ʻOku ʻiloa fakafonua ʻa e tokotaha taʻu 17 ʻi he mītiá, ʻi heʻene foʻi hiva ko e ‘Birdie’, ʻa ia naʻá ne toki fakahoko kimuí ni ʻi he polokalama televīsone ko e Seven Sharp.
Naʻá ne pehē, “Kuó u ngāue mālohi … pea kei ngāue mālohi pē. Ka neongo ʻeku ngāue mālohí, ka ʻoku hangē ʻoku fuʻu vave ʻene hokó.”
Ko e mūsiká ko ha konga lahi ia ʻo e moʻui ʻa Sonatané. ʻOku ʻikai ngata ʻi heʻene hiva mo faʻu pē ʻene ngaahi hivá, ka ʻokú ne toe ifi foki ʻa e tulomipouní (trombone) tā peesi, kītā, mo e piano. Naʻá ne ikunaʻi e feʻauhi soló ʻi he Smokefree Rockquest ʻo e taʻu kuoʻosí, pea ua mo ʻene kulupu tāmeʻá ko e ‘Blessed’ ʻi he feʻauhi Smokefree Pacifica Beats.
Naʻe faʻu ʻe Sonatane ʻene fuofua hivá ʻi hono taʻu fitú. Naʻá ne pehē ʻoku hangē e mūsiká ha tohinoá.
“Naʻá ku faʻu ʻa e ʻBirdie’ ʻi he taimi naʻá ku ongoʻi mafasia ai he lolotonga e akó mo e ngaahi siví.” Naʻá ku maʻu e fakakaukau ki he foʻi hivá ʻi haʻaku siofi ha foʻi manupuna ʻi tuʻa ʻi hoku matapā sioʻatá. “ʻOku fekauʻaki ia mo haʻaku pōtalanoa mo ha foʻi manupuna pea mo ʻeku holi ko ia keu tauʻatāina mei hoku ngaahi faingataʻaʻiá.”
Pea—neongo ʻoku mahuʻinga ki ai e mūsiká, ka ʻoku kei feinga pē ʻa Sonatane ke fakamuʻomuʻa ʻa e ʻEikí ʻi heʻene moʻuí; ʻokú ne kau ki he Uooti Finileisoní ʻi Manuleua ʻa ia ʻoku lolotonga pīsope ai ʻene tangataʻeikí.
“Ko e taimi pē ʻoku ou tailiili ai kimuʻa peá u hiva pe he meʻa lahi, ʻoku ou fai maʻu pē ha lotu.”
“ʻOku faingataʻa ke tauhi ʻeku tuʻunga moʻuí ʻi he malaʻe ʻo e mūsiká koeʻuhí he kuó u maʻu ʻeni e tokangá, mo u maʻu ha ngaahi faingamālie lahi ange ke hiva. ʻOku ou fai ha hiva, ʻi he taimi ʻe niʻihi, ʻi he Sāpaté.”
Ka ʻoku ʻiloʻi ʻe Sonatane ʻa e meʻa ʻoku totonú mo houngaʻia koeʻuhí ko e ongoongoleleí, ʻa ia ʻoku tokoni ke ne nofo ʻi he hala ʻoku totonú.
ʻOku lolotonga hoko foki ʻa Sonatane ko e mātapule lahi ʻi he Kolisi Manuleuá, pea ʻoku fakatou vaʻinga ʻi he timi pasiketipoló mo e ʻakapulú. Naʻe fili foki ia ʻi he timi ʻa e ʻAkapulu Fakalakalaka ʻa e Chiefs.
ʻOku kei feinga he taimí ni ke tuku atu tahataha ha ngaahi hiva pea aʻu ki ha ʻalapama. ʻE kau ʻi he ʻalapamá ha ngaahi hiva ʻoku kehe honau ākengá mei he ongo nonga mo fakafiemālie ʻo e ‘Birdie’.
ʻOku taumuʻa atu foki ʻa Sonatane ke ngāue fakafaifekau taimi kakato hili haʻane ʻosi mei he akoʻanga māʻolungá.
Naʻá ne pehē, “ʻOku ou loto ke maʻu haʻaku ngāue mo tānaki ha paʻanga ki heʻeku ngāue fakafaifekaú.”
“Pea ko ʻeku foki mai pē mei heʻeku ngāue fakafaifekaú, ʻoku ou fie ako ki he mūsiká pea mo akoʻi ʻa e mūsiká.”