Tali ʻe ha Ongo Mātuʻa Mali ʻa e Ui ke Ngāué
Naʻe meʻa ʻa Palesiteni Lāsolo M. Nalesoni, ko e Palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻo pehē “ʻI heʻetau fakakaukau ki he kau faifekau [Māmongá], ʻoku tau faʻa fakakaukauloto ki ha kau talavou ʻoku nau tui sote hina mo e hēkesi pea mo ha kau finemui ʻoku nau vala taau. Ka ʻoku kau fakataha mo ia ha kau faifekau mali fakaofo kuo nau tali e kole ʻa e kau palōfitá mo e kau ʻaposetoló ke ʻi ai ha kau faifekau mali tokolahi angé.”
Kuo tukuatu ʻe he Siasí, ʻi he māhina ʻe ono ne toki ʻosí, ha ngaahi mātuʻa mali ʻe 317 mei he Pasifiki Tongá. Ko hanau tokolahi ne nau ʻosi ngāue pe ʻoku lolotonga ngāue ʻi he feituʻu Pasifikí. ʻOku maʻu ʻe he ngaahi mātuʻa malí ni ha ngaahi talanoa fakalaumālie ʻo e ngāué ke vahevahe.
Hangē ko e ongomātuʻa Tonga, ko Loueni mo Nūnia Huní. ʻOkú na teuteu atu ke ngāue fakafaifekau tuʻo ua.
Fakatatau kia Seni Hatisoni, ko ha faifekau mali ʻi he Kilīniki Nifo ʻa e Siasí ʻi Tongá, “ʻOku ʻikai ko ha meʻa foʻou ia. ʻOku fakaʻapaʻapaʻi lahi ʻa e ngāue fakafaifekaú ʻi Tonga, pea ʻoku ngāue ha ngaahi mātuʻa mali tokolahi.”
Ko e taimi naʻe fehuʻi ai pe ko e hā e ʻuhinga ʻokú na fakakaukau ai ke toe ngāue fakafaifekaú, naʻe pehē pē ʻe he ongomātuʻa Huní, ʻokú na ʻofa ʻi he ʻEikí mo ʻEne ngāué. Pea ʻi heʻena ngāué, kuo pau ke na falala ki he Tamai Hēvaní mo Hono ʻAlo ko Sīsū Kalaisí.
ʻOku houngaʻia lahi ʻa e fāmili Huní he kuo aʻusia foki ʻe hona fāmilí ha ngaahi tāpuaki maʻongoʻonga koeʻuhí ko ʻena ngāue fakafaifekaú. ʻOkú na fakalau e maʻu ʻe hona makapuná ha ako, pea maʻu ʻe kinaua ha kā mo ha fale ke hao aí, ko ha niʻihi ia ʻo e ngaahi tāpuaki ko ʻení. Kuo moʻui lelei maʻu pē fāmilí, maʻu ha tēpile mahu he meʻatokoní pea ʻokú na fiefia. ʻOkú na houngaʻia lahi ʻi he ngaahi meʻá ni.
Ko e ngāue fakafaifekau fakamalí ko ha meʻa ia ʻe fie fokotuʻu ʻe Loueni mo Nūnia ki ha mātuʻa pē kuo maʻu vāhenga mālōlō ʻi he Siasí.
“Kapau ʻokú ke loto ke ke ofi ki he ʻEikí, fai ʻEne ngāué peá ke ʻalu ʻo ngāue fakafaifekau.”
Naʻe ngāue fakafaifekau ʻa e ongomātuʻa Huní ʻi Tonga mei he 2015–2017.
Lolotonga ʻena ngāué, naʻe fakamāloʻia ʻa Loueni koeʻuhí ko e ngaahi taʻu lahi ʻo ʻene feilaulaú mo e ngāué, ʻi hono foaki e iká—ki he masivá mo e faingataʻaʻiá—ʻa ia naʻá ne maʻu ʻi heʻene toutai uku ʻi he tahi lolotó he pō takitaha.
ʻI he taʻu ʻe 20 kuo hilí, ne toutou ʻalu tokotaha pē ʻa Loueni ʻo fakalaka atu ʻi he ʻuluʻulú, ʻo uku ʻi he lotolotonga ʻo e fanga ʻangá, ke tokoniʻi hono kaungāʻapí. Lau heni haʻane ngaahi talanoa lahi ange.
ʻOku kei toutai uku pē ʻa Loueni ʻo fakalaka atu ʻi he ʻuluʻulú pea mo tufa ʻene fāngotá ki he masivá. ʻOkú ne lau pē ʻene meʻa ʻoku faí ko ha meʻa siʻisiʻi, ʻi heʻene pehē, “Ko ʻeku moʻuí ʻeni. Ko ʻeku ngāue ʻeni ʻoku faí. ʻOku ou tauhi ki he ʻOtuá, pea te Ne tauhi au.”
ʻOku hā foki ʻi he kupuʻi lea ko ʻeni ʻa Palesiteni Tōmasi S. Monisoní ʻa e ongoʻi fiemālie ʻi he ngāue ʻokú na fakahoko pea mo e kau faifekau mali kehé: “ʻE ʻi ai ha ngaahi taimi ʻe niʻihi ʻi hoʻo moʻuí te ke fiefia [lahi ʻaupito] ai ʻi he laumālie fungani mo e fiemālie ʻoku maʻu mei he ngāue fakataha ʻi he ngāue ʻa e ʻEikí.”