Ko ha Palopalema ʻo e Sāpate Fakamamahí
ʻOku nofo ʻa e taha naʻá ne faʻú ʻi ʻIutā, USA.
Naʻá ku ʻiloʻi ʻoku totonu ke u saiʻia ʻi he ʻaho Sāpaté, ka naʻe ʻikai ke u ʻiloʻi e foungá.
Tā fakatātaaʻi ʻo e taá ʻe David Stoker
ʻOku pehē ʻe he folofolá ko e ʻaho Sāpaté ko ha ʻaho māʻoniʻoni, ko ha ʻaho fakafiefia mo fakaʻofoʻofa, ko ha ʻaho ʻo e mālōlō, ko ha ʻaho ke fakafiefia.1 Ka ʻi he ngaahi taʻu siʻi kuo hilí, lolotonga hoku taʻu hongofulu tupu lahí, naʻe fakamamahi kiate au ʻa e ʻaho Sāpaté. Ne u ongoʻi loto mafasia, kae ʻikai nonga. Loto mamahi, kae ʻikai fiefia. Loto halaia, kae ʻikai ʻamanaki lelei. Naʻá ku fonu ʻi he ngaahi meʻa fakamamahi ʻo e Sāpaté.
ʻI he pongipongi Sāpate kotoa, hili haʻaku toitoi taimi lōloa fakamā ʻi hoku kafú, ne fāifai peá u pehē ko e ʻaho Sāpate ʻeni peá u teuteu leva ki he lotú. ʻI he lotú, naʻá ku vakaiʻi ʻeku moʻuí ʻi he uike kuo ʻosí. Lolotonga e sākalamēnití, ne u tānaki kotoa e ngaahi meʻa naʻe ʻikai ke u lavá, ʻo ʻikai ke ‘osi ia, kuo tuʻu hake ʻa e tokotaha lea ʻuluakí. Naʻe hoko ‘a e toenga ʻo e lotú ko ha malaʻe tau ʻi heʻeku feinga ke taʻofi e loʻimatá koeʻuhí ko e fakautuutu e ongoʻi halaiá mo e fakaʻiseʻisa foʻou ʻo ongoʻi kovi ʻi he lotú.
Naʻe kei tatau ai pē mo e hoʻataá. Naʻá ku ongoʻi halaia ʻi he ngaahi fili he kuo hilí, loto mafasia ʻi he ngaahi fili ʻo e kahaʻú, pea mo mamahi ʻi he ngaahi tūkunga lolotongá. Ka ne taʻe-ʻoua hono fakalelulelu au ʻe he akó mo e ngaahi ʻekitivitī kehé, te u fakamoleki hoku taimí ʻi he ngaahi fakakaukau koví.
Hili ʻeku fanongo, lau, pea mo toe lau e pōpoaki ʻa Palesiteni Lāsolo M. Nalesoni ʻi he konifelenisi lahi ʻo ʻOkatopa 2015 fekauʻaki mo e founga ʻoku hoko ai ʻa e Sāpaté ko ha meʻa fakafiefiá, naʻá ku lotua ha nonga mou saiʻia he Sāpaté kae ʻikai ko e mamahi naʻá ku lolotonga ongoʻí.2 Pea naʻe maʻu mai ha tali.
Tokanga pē ki he Tamai Hēvaní mo Sīsū Kalaisi
Naʻá ku ongoʻi e ueʻi au ke hiki ʻeku tokangá mei hoku ngaahi faingataʻá ki hoku vā mo e Tamai Hēvaní pea mo e Fakamoʻuí. Naʻá ku tuku ha taimi ke fakalaulauloto ki Heʻena kau ʻi heʻeku moʻuí, kae ʻikai fakalaulauloto ki heʻeku ngaahi taʻemalavá.
ʻI he taimi naʻe hoko mai ai ʻa e ngaahi fakakaukau koví, naʻá ku toe lau ʻa e meʻa naʻá ku ʻiloʻi mo tui ki ai fekauʻaki mo e ʻOtuá mo Sīsū Kalaisí: Ko e fānau au ʻa e ʻOtuá. ʻOku ʻofa ʻiate au. Ko hoku Tuongaʻane ʻa Sīsū Kalaisi, pea naʻá Ne fakalelei maʻaku. ʻOkú Na finangalo ke u fiefia mo toe foki ange kiate Kinaua. Ko e ʻaho Sāpaté ko ha meʻaʻofa ia mei he ʻOtuá.
Naʻá ku kamata ke tui ki he fakamoʻoni ko ʻení.
Ko Hono Tali Moʻoni ʻo e Sākalamēnití
Ne tataki au ʻi hono liliu ʻeku tokangá ke u toe fakakaukauʻi foki ʻa e founga naʻá ku maʻu ai ʻa e sākalamēnití. Ne u ʻai ʻa e sākalamēnití ʻi ha taimi fuoloa, ko ha taimi ke tauteaʻi ai au. Ka ʻoku ʻikai ko hono taumuʻá ia. Ko e sakalamēnití ko ha ouau toputapu ia ke fakafoʻou ai ʻetau ngaahi fuakavá. Ko ha faingamālie ia ke toe maʻa ai ʻo fakafou ʻi he mālohi ʻo e fakalelei ʻa Sīsū Kalaisí. Naʻá ku fakatokangaʻi ʻi he tokanga taha ki he ouaú mo e fuakavá ʻi he tui mo loto fakatomalá, naʻá ku fakatokangaʻi ʻoku ʻomi ʻe he sākalamēnití ha nonga ʻi heʻeku tali ʻa e meʻaʻofa ʻo e fakamolemolé, tauhi ʻeku ngaahi fuakavá, mo maʻu ʻa e Laumālie ʻo e ʻEikí (vakai, T&F 20:77, 79).
Naʻe hanga ʻe heʻeku fakakaukau ki he fakalelei ʻa Kalaisí he lolotonga ʻo e sākalamēnití, ʻo ʻomi ha meʻaʻofa ʻe taha ki heʻeku fakakaukaú. ʻE ʻikai ngata pē lava ke fakamolemoleʻi aú, ka ʻe lava foki ke fakamoʻui au koeʻuhí he ne toʻo ʻe he Fakamoʻuí kiate Ia ʻeku mamahí mo e ngaahi vaivaí (vakai, ʻAlamā 7:11–12). Te u lava ke u maʻu ha nonga mo e mālohi ʻi he ʻaho Sāpaté ʻi Heʻene Fakaleleí pea mo e sākalamēnití,—pe ʻi ha toe ʻaho kehe pē—kae ʻikai ko e loto-mafasiá mo e mamahí.
Pea naʻá ku maʻu ʻa e nonga ko iá. ʻOku ʻi ai hoku Fakamoʻuí maʻaku ʻi he ʻaho Sāpaté pea maʻu ai pē!
Ako ke Faʻa Kātaki ʻi he Tui
Naʻe ʻikai ko ha fakalelei uike ʻe taha pē ʻeni. Naʻe faingataʻa, pea naʻe fie maʻu ha taimi ki ai. “Pea kapau ʻoku tau ʻamanaki lelei ki he meʻa ʻoku heʻeki ai te tau maʻú, ʻoku tau tatali faʻa kātaki pē ki ai”(Loma 8:25). Ne hokohoko atu ʻeku tokanga mo lotu ke u ongoʻi saiʻia ʻi he Sāpaté.
Naʻe aʻu ki ha taimi, peá u maʻu ha nonga mo e fiefia ʻi he ʻaho māʻoniʻoni ko iá, ka naʻe ʻikai ke u lava ʻo ngata ai telia naʻá ku toe foki ki he ngaahi fakamamahi ʻo e ʻaho Sāpaté. ʻOku fie maʻu ʻi he uike takitaha ʻa e tokanga moʻoni ki he Fakamoʻuí mo e taumuʻa ʻo e ʻaho Sāpaté, ka ʻoku ou ʻiloʻi ʻoku moʻoni ʻa e talaʻofa ʻo e nongá mo e fiefiá.