Ko e hā ʻOku Tau Fai ʻi he Temipalé?

Ko e temipalé ko ha feituʻu toputapu ia ʻe lava ke tau ʻunu ai ʻo ofi ange ki heʻetau Tamai Hēvaní mo Sīsū Kalaisi. ʻI he temipalé, ʻoku akoʻi ai kitautolu ha ngaahi moʻoni mahuʻinga, kau ʻi he ngaahi ouau ʻo e lakanga fakataulaʻeikí (ngaahi ouau toputapú), pea mo fakahoko e ngaahi fuakava (ngaahi palōmesi toputapú) mo e ʻOtuá ʻa ia ʻoku nau teuteuʻi kitautolu ke foki ki Hono ʻaó.

Te tau lava ʻo maʻu ‘a e ngaahi ouau fakatemipalé maʻatautolu pea maʻa ʻetau ngaahi kuí foki. Hangē ko ʻení, ʻe lava ke kau e toʻu tupú ʻi he ngaahi papitaisó ʻo fakafofongaʻi ʻenau ngaahi kuí mo e niʻihi kehe ʻa ia naʻe ʻikai ke nau maʻu ʻa e faingamālie ke papitaiso ʻe he mafai totonú ʻi heʻenau kei moʻuí. Maʻá e kakai lalahí, ʻoku kau ʻi he ngaahi ouau fakatemipale kehé ʻa e ʻenitaumení mo e silá (hangē ko e mali temipalé).

Papitaiso mo Hilifakinima maʻa ʻEtau Ngaahi Kuí

ʻOku mahuʻinga ʻa e papitaisó mo e hilifakinimá ki he fakamoʻui ʻo e tokotaha kotoa pē ʻoku haʻisia kuo moʻui ʻi he māmaní (vakai, Sione 3:5). Kae kehe, kuo tokolahi ha kakai kuo nau pekia teʻeki ke nau maʻu e faingamālie ke fanongo ki he ongoongoleleí pe maʻu e ngaahi ouau ko ʻení. ʻI he ʻaloʻofa mo e ʻofa ʻa Sīsū Kalaisí, kuo ʻosi teuteuʻi ai ha founga ki he taha kotoa ke ne maʻu e ngaahi tāpuaki ko ʻení. ʻI he ngaahi temipalé, ʻe lava ai ke fakahoko ʻe he kau mēmipa moʻui taau ʻo e Siasí e papitaisó maʻanautolu kuo pekiá. ʻOku malangaʻi ʻa e ongoongoleleí ʻi he maama tataliʻanga ʻo e ngaahi laumālié (vakai, T&F 138), pea ʻe lava ʻe kinautolu ʻoku fanongo ki aí ʻo fili ke tali ia mo fakahoko e ngaahi ouaú maʻanautolu.

ʻEnitaumení

ʻOku ʻuhinga ʻa e foʻi lea ʻenitaumení ki he “meʻaʻofa.” Ko e ʻenitaumeni ʻo e temipalé ko ha meʻaʻofa ia mei he ʻOtuá ʻa ia ʻokú Ne ʻoatu kiate koe ʻa e ngaahi tāpuaki makehe, ʻo kau ai e “mālohi mei ʻolunga” (T&F 95:8).

ʻI he taimi naʻá ke kau ai ki he Siasí, naʻá ke maʻu e ouau ʻe ua—ko e papitaisó mo hilifakinimá. ʻOku maʻu foki mo e ʻenitaumeni fakatemipalé ʻi ha konga ʻe ua. ʻUluakí, ʻokú ke maʻu e ouau ʻinisitolí, ʻa ia ʻoku “fufulu” fakataipe mo taau ai koe ke ke maʻa pea mo maʻu e ngaahi tāpuaki makehe fekauʻaki mo ho tukufakaholo fakalangí pea mo e faingamālie taʻengatá. ʻI he konga hono uá, ʻokú ke maʻu ai ʻa e toenga ʻo ho ʻenitaumení ʻi hoʻo ako lahi ange ki he palani ʻo e fakamoʻuí, kau ai ʻa e Fakatupú, ʻetau taumuʻa ʻi he māmaní, pea mo e misiona mo e Fakalelei ʻa Sīsū Kalaisí.

ʻI he lolotonga ʻo e ʻenitaumení, ʻoku tau fai ha ngaahi palōmesi molumalu ke talangofua ki he ʻOtuá, muimui kia Sīsū Kalaisi, ke moʻui angamaʻa, mo tokoni ʻi hono langa e puleʻanga ʻo e ʻOtuá. Kapau te tau tauhi ʻetau ngaahi fuakavá, ʻoku tau maʻu ʻa e talaʻofa ke maʻu e kotoa ʻo e ngaahi tāpuaki taʻengata ʻa e ʻOtuá.

Ngaahi Silá

Ko e ngaahi fāmilí ʻa e uho ʻo e palani ʻa e ʻOtuá ki heʻetau fiefiá. Ko hono fakatahaʻi ʻo taʻengata e fāmilí ko e tāpuaki fungani taha ia ʻoku maʻu ʻi he temipalé ʻo fakafou ʻi he mafai faisila ʻo e lakanga fakataulaʻeikí—ʻa e mafai tatau ko ia ne fakahā ʻe Sīsū ki Heʻene Kau ʻAposetoló (vakai, Mātiu 16:19). ‘Oku fakafaingamālieʻi ʻe he sila he temipalé ʻa e ngaahi husepānití mo e ngaahi uaifí mo e fānaú mo e mātuʻá ke nau fakataha ʻo taʻengata ʻi heʻenau tauhi faivelenga ki heʻenau ngaahi fuakavá.