Ko e Tauhí mo e Vahevahé

Mālō e lelei! Ko Lui au, pea ʻoku ou fakaulo atu ʻeku māmá ʻaki ʻeku vahevahe ʻa e meʻa ʻoku ou maʻú mo e niʻihi kehé.

Ko ha Motu Lahi mo ha Fāmili Tokolahi

ʻOku ou nofo ʻi ha motu lahi ʻi Tonga. ʻOku ʻi ai hoku tuofāfine ʻe toko ono mo e ngaahi tokoua ʻe toko fā, pea ʻoku ou nofo ofi ki he Temipale Tongá.

Ko e Taha Manako he Saienisí

ʻOku mau maʻu ha ngaahi ʻakau fakaʻofoʻofa mo ha fanga monumanu ʻi homau motú. ʻOku ou ʻi he kalasi faá ʻi he Lautohi Siʻi ʻa e Akoʻanga Ocean of Light, pea ko hoku manakó ʻa e lēsoni saienisí.

Ko e Vahevahe ʻo ʻEtau Meʻakaí

ʻOku tō ngoue ʻeku tangataʻeikí, pea ʻoku lahi ai e meʻa ke mau kaí. Ka ʻoku tokolahi ha kau uitou (kakai fefine kuo mate honau husepānití) mo ha ngaahi fāmili ʻoku ʻikai ke ʻi ai haʻanau ngoue. ʻOku ʻave leva heʻeku ongomātuʻá kiate kinautolu ha konga ʻo ʻemau ngoué. ʻOku ou saiʻia ke ō mo kinauá, ke u tokoni!

Ko e Tokoni ʻi he Puluʻi Niú

ʻOku fakaʻaongaʻi ʻe he kau uitou ʻoku mau ʻaʻahi ki aí e puluʻi niú ke tafu ʻaki e afi ki he haka ʻo ʻenau meʻakaí. Ko e taimi ʻoku mau ʻave ai e meʻakai kiate kinautolú, ʻoku ou fakamanatu maʻu pē ki heʻeku ongomātuʻá ke ʻave foki mo ha puluʻi niu. ʻOku ou tokoni ʻi hono fakaheka ʻo e puluʻi niú ki he vēní pea mo fakahifo kinautolu ʻi he taimi ʻoku mau aʻu ai ki he ʻapi ʻo e kau uitoú.

Ko e Ngaahi Tāpuaki ʻo e Tokoní

ʻOku foaki mai ʻe he Tamai Hēvaní kiate au ha ngaahi tāpuaki lahi ʻi he taimi ʻoku ou tokoni ai ki he niʻihi kehé—ʻikai ko e tāpuaki ʻo e paʻanga ka ko ha tāpuaki ʻo e poto mo e ʻilo. ʻOku ou loto maʻu pē ke tokoni mo vahevahe ʻa e meʻa ʻoku ou maʻú mo e niʻihi kehé.