Tatau Ai pē Pe Ko e Hā!
ʻI he konga kimuʻa ʻo e taʻu ní, naʻe haʻu hoku kaungāmeʻá ki he kalasí ʻoku loto mamahi. Naʻe ʻi ai haʻane ngaahi hala ʻi heʻene ngāue fakafiká. Naʻá ne pehē, “ʻOku ʻikai haku ʻaonga ʻe taha.”
Naʻá ku hohaʻa ki hoku kaungāmeʻá, peá u fakamatala ange leva fekauʻaki mo Sīsū pea mo e lahi ʻo ʻEne ʻofa ʻiate kitautolú. Naʻá ku talaange ki ai hono ʻuhingá, ʻoku ʻikai ke tau taʻeʻaonga! Peá u hivaʻi leva e “Fānau Au ʻa e ʻOtuá” ki ai. Naʻe mātuʻaki saiʻia ai peá ne ʻeke mai pe naʻaku ako ʻi fē ʻa e ngaahi meʻa ko ʻení. Naʻá ku fakamatalaʻi ange ʻoku ō hoku fāmilí ki he lotú he uike kotoa pē pea ʻoku ou ako ha meʻa lahi kau kia Sīsū ʻi he Palaimelí.
Naʻá ne fakamatala ki heʻene fineʻeikí ʻi he pō ko iá fekauʻaki mo ʻema talanoá. Naʻá ne kole ki heʻene fineʻeikí pe ʻe lava ke nau omi ki he lotú mo hoku fāmilí. Ne talaange ʻe heʻene fineʻeikí ʻio!
Naʻe tangutu hoku kaungāmeʻá ʻi hoku tafaʻakí ʻi he houalotu sākalamēnití he Sāpate ko iá! ʻOku kau ʻeni mo au ʻi he lotú ʻi he meimei uike kotoa pē. ʻOku fakaʻau ke lahi ange ʻeni ʻene ako mo ʻene ongomātuʻá ki he ongoongolelei ʻo Sīsū Kalaisí mei he ongo faifekaú pea mo ha ngaahi fāmili kehe ʻi he uōtí.
ʻOku ou ongoʻi mātuʻaki fiefia ʻi heʻeku lava ʻo muimui he sīpinga ʻa e Fakamoʻuí mo fakafiemālieʻi ha kaungāmeʻa lotomamahí. ʻE tatau ai pē pe ʻe fili hono fāmilí ke nau papitaiso pe ʻikai, ko e konga lelei tahá ko ʻene ʻilo he taimí ni, ʻoku ʻofa ai ʻa e ʻOtuá mo Sīsū Kalaisi, ʻo tatau ai pē pe ko e hā!