Ngaahi Ongoongo Fakalotofonuá
Poupouʻi ʻe he Kau Taki ʻo e Siasí e Kāingalotu Tongá
Naʻe toki ʻi Tonga ʻa ‘Eletā Ian S. Ardern, Tokoni Ua ʻi he Kau Palesitenisī ʻo e ʻĒlia Pasifikí, mo hono uaifí, Paula Ardern, ʻi ha ʻaho ʻe ono ʻo ʻaʻahi ki he Misiona Nukuʻalofa Tongá mo fakahoko ha poupou mo ha faleʻi ki he kau faifekaú mo e kāingalotu ʻo e Siasí.
Naʻe pehē ʻe ʻEletā Ardern ʻi haʻane tali ki he maumau he Matangi ko Gitá: “Kuo mau femoʻuekina he tokoni ki Tonga ke fakaakeake mei he matangí. ʻOku ʻikai ngata pē ʻemau tokoní kiate kinautolu ko e kāingalotu hotau Siasí, ka ʻoku mau tokoni ki he kakai Tonga kotoa pē. ʻI heʻene peheé, ko e meʻa ʻoku ongo fakamāfaná ko e vakai ki he fetokoniʻaki ʻa e kakai Tongá.”
Naʻá ne pehē ne nau foaki mai ha ngaahi mīsini fahi papa koeʻuhí ke lava ʻo fakaʻaongaʻi ʻa e ʻulu ʻakau kuo holó ki ha ngaahi nāunau langa ke tokoni hono fakaleleiʻi pe toe langa ʻo e ngaahi ʻapi ne uesia pe maumaú. “ʻOku tau akoʻi e kakaí, ʻo akoʻi kiate kinautolu ʻa e ngaahi taukei ʻoku fie maʻu ke moʻui fakafalala pē kiate kinautolú.”
Naʻe fokotuʻu ʻe Sisitā Paula Ardern, ʻoku fie maʻu ke tau ngāue fetauhiʻaki ʻi hotau ngaahi ʻapí kae lava ke ako ʻetau fānaú mei heʻenau mātuʻá mo lava ke nau ō atu ʻo ngāue fakaetauhi ki he niʻihi kehé.
Naʻá ne pehē, “Ko e ngāue fakaetauhi ʻi ʻapí ʻa e feʻofaʻakí, lau e folofolá, lotú mo e ngāue fakatahá, pea mo e ako ke manako aí.”
ʻI heʻena fononga holo he Misiona Nukuʻalofa Tongá mo e Palesiteni Misioná, Sione Tuione mo hono uaifí, Sisitā Lupe Sika Tuioné, ne pehē ʻe ʻEletā mo Sisitā Ardern: “ʻOku fakaofo e kau faifekau ko ʻení, ʻoku nau fotu mo ngāue ʻo feʻunga mo honau tufakangá, pea ʻoku nau fai ha ngāue māʻongoʻonga! Te mou lava ʻo falala kiate kinautolu ke nau akoʻi homou kaungāmeʻa taʻesiasí.”
Ne fai ʻe ʻEletā Ardern e lea fakalotolahí ni kiate kinautolu ʻoku kei faingataʻaʻiá: “ʻI he hoko mai ʻa e faingataʻá—pea ʻe hoko mai—kuo pau ke tau tafoki ki he ʻEikí. ʻI he ngaahi mōmeniti ʻo e siva ʻetau ʻamanakí, ʻi heʻetau tafoki kiate Iá, ʻe mole ai ʻa e mamahí pea te tau tupulaki ʻi heʻetau ʻiloʻi ʻokú Ne kau mo kitautolú.