Ko ʻEtau Tafaʻakí
Ko e Tali Tonu mo Halá
Ngaahi tā fakatātā ʻa Mathew Shipley
Ko e taimi naʻá ku kau ai ʻi ha kalasi filōsefa ʻi he ako māʻolungá, naʻe kiʻi hohaʻa ʻeku tangataʻeikí. ʻOku fehuʻia ʻa e meʻa kotoa pē ʻi he filōsefa, kau ai pe ʻoku ʻi ai ha ʻOtuá. Naʻe akoʻi kimautolu heʻemau faiakó ʻi ha ngaahi meʻa naʻe fepaki mo e tui fakalotú mo fakaʻikaiʻi ʻoku ʻikai ha ʻOtua.
Naʻe fehuʻi ʻi ha sivi filōsefa ʻe taha, “Ko e hā kuo tau omi ai ki māmaní?” Ko e tali naʻe totonu ke faí, koeʻuhí ke tau lava ʻo ngāue ʻiate kitautolu mo maʻu hotau tuʻunga ʻi he siakale ʻo e moʻuí. Naʻe ʻikai ke u hiki ʻa e talí koeʻuhí he naʻe ʻikai ko e meʻa ia naʻá ku tui ki aí.
Ka, naʻá ku hiki, “Kuo tau omi ki māmani ke siviʻi pea mo toe foki ke nofo mo ʻetau Tamai ʻi he Langí ʻi ʻitāniti pea mo hotau ngaahi fāmilí.”
Naʻe ui au ʻe he faiakó ʻi heʻene ʻosí pea ʻeke mai pe naʻá ku ʻiloʻi ʻa e tali totonu ki he fehuʻí. Naʻá ku talaange naʻá ku ʻiloʻi ka he ʻikai ke u tohi ha meʻa naʻá ku ʻilo naʻe ʻikai moʻoni.
Naʻá ne ʻeke mai pe ko ha tokotaha lotu au pea ko e siasi fē ʻoku ou kau ki aí. Naʻá ku talaange ko ha mēmipa au ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻá ne talamai kuo teʻeki ai ke ne ʻilo ha taha ako tui fakalotu kuo lototoʻa feʻunga ke ne taukaveʻi ʻene tuí mo hiki ha faʻahinga tali pehē.
Naʻá ne pehē, “Naʻe ʻikai ke u ʻoatu ha maaka kakato koeʻuhí he ko hoʻo talí ʻoku ʻikai ko e tali totonú ia.” “Ka naʻá ku ʻoatu ha maaka koeʻuhí ko hoʻo lototoʻa ke hiki e meʻa ʻokú ke tui ki aí.”
Naʻá ku fiefia koeʻuhí he naʻá ku tali ʻo fakatatau mo ʻeku fakamoʻoní pea fakatatau mo e ngaahi moʻoni ʻo e ongoongolelei ʻoku ou ʻilo mo feinga ke moʻui ʻakí.
Penisimani M, Silei
Maama ʻo e Temipalé
ʻi he ngaahi faʻahitaʻu māfana siʻi kimuʻá naʻe ō e kau talavou homau uōtí ʻo heka paiki ʻi he moʻungá. Naʻá ku kiʻi tailiili koeʻuhí he ko hoku fuofua taimí ia. Ko ha taha heka paiki taukei hoku kaungāmeʻa ko Sēkopé, pea naʻá ku palani leva ke ofi maʻu pē ki ai.
Hili haʻama kiʻi mālōlō taimi siʻi ʻi he tumuʻakí, ne mau kamata hifo leva mei he moʻungá. Naʻá ku māmālie ange ʻi he toenga ʻo e kulupú ʻo fuʻu mamaʻo, tautautefito ʻi heʻeku faʻa tō ʻi he ngaahi afe māsilá. Naʻe tuʻu ʻa Sēkope ke tokoniʻi au ʻi he taimi kotoa pē naʻá ku tō ai, peá ma feinga leva ke tulituli hake ki he kulupú.
Naʻe mahino ʻi he tō ʻa e laʻaá kuó ma hē. Kuo ʻosi ha miniti ʻe tolungofulu talu mei heʻema sio fakamuimui taha ki heʻemau kulupú, pea kuo fakaʻau ke fakapoʻuli ʻo ʻikai ke ma faʻa ʻiloʻi ʻa e halá. Naʻá ku lotu, ʻo kole ki he Tamai Hēvaní ha tokoni mo ha lototoʻa ke ma kei hoko atu. Peá u pehē leva mo Sēkope ke ma kei hoko atu pē he paikí ki ha feituʻu pau. Naʻá ma fakatokangaʻi ʻi haʻama afe mai ʻi ha tuliki ha meʻa fakafiefia naʻe ʻasi mai—ko e Temipale Draper Utah! Naʻe hulungia ʻe he maama naʻe tapa mei he temipalé homa halá, peá ma lava leva ke aʻu lelei mai ki homau kau takí mo e ngaahi kaungāmeʻá.
Ko e taimi kotoa pē ʻoku ou sio ai ki he temipalé, ʻoku fakamanatu mai kiate au ʻa e nonga mo e tokoni te tau ala maʻu ʻi aí. Ko e taimi kotoa pē ʻoku ou ongoʻi hē ai ʻi he kaupōʻuli ʻa e māmaní, te u lava ʻo sio ki he temipalé ke maʻu ʻa e maama ʻoku ou fie maʻú.
Joel G., Utah, USA
Ko ha Fakakaungāmeʻa Foʻou
Naʻá ku tangutu ʻi ha tēpile maʻu-meʻatokoni hoʻatā mo hoku ngaahi kaungāmeʻá feʻunga mo ʻeku fakatokangaʻi atu ha tamasiʻi foʻou—ko Maikolo. Naʻe fili ia ke tangutu mo ha tamaiki tangata lalahi ange, naʻa nau kamata ke fakakata ʻaki ia. Naʻá ku toki ʻilo kimui ko Maikoló naʻe tōnounou fakaʻatamai (autism).
Naʻá ku ʻeke kia Maikolo pe naʻe fie tangutu ʻi hoku tafaʻakí pea mo hoku ngaahi kaungāmeʻá. Naʻe ʻikai ke ne tali, mahalo pē ko ʻene manavasiʻi naʻa toe fakakata ʻaki ia ʻe he kakaí.
Naʻá ku fakafeʻiloaki ia ki hoku ngaahi kaungāmeʻá, ʻi he ʻaho hono hokó. Naʻá ku lava ʻo tala naʻe fiefia ʻi he ʻikai ke tukunoaʻi ai pē iá. Naʻe lahi e meʻa ke talanoa kau ki aí. Ko ha taha lelei moʻoni!
Naʻá ku lava ʻi he ʻaho kotoa pē ke tala ʻoku hoko ko ha taha fiefia ange. Naʻe kamata ke ʻamanaki fiefia ke maʻu-meʻatokoni hoʻatā mo hono ngaahi kaungāmeʻá. Naʻe kamata ʻeku tangutu mo Maikolo ʻi he maʻu-meʻatokoni hoʻataá ke ne fakatupu ha kaungā feohi mahuʻinga. Naʻe ʻikai ngata pē heʻene tokoniʻi ʻa Maikoló, ka naʻá ne toe tokoniʻi foki mo au.
Ko e ongo ʻoku maʻu ʻi he tokoniʻi ʻo e niʻihi kehé, ko e taha ia ʻo e ngaahi ongo fakafiefia taha ʻi he māmaní.
Laura P., ʻIlinoisi, USA