Maluʻanga mei he Matangí

Fai ʻe ʻEletā Joaquin E. Costa

ʻO e Kau Fitungofulú

“Ka ko ia kotoa pē ʻoku fanongo kiate aú, ʻe nofo fiemālie pē ia, pea ʻe ʻataʻatā mei he manavahē ki he koví” (Lea Fakatātā 1:33).

Naʻá ku tupu hake ʻi ʻĀsenitina. Naʻe ʻikai ko ha mēmipa au ʻo e Siasí ʻi heʻeku kei siʻí. Ka naʻe tauhi ʻe hoku fāmilí ha Tohi Tapu ʻi heʻemau funga laupapá. Naʻe lahi mo ʻi ai ha ngaahi fakatātā fakaʻofoʻofa. Naʻe ʻikai ke fuʻu lahi ʻemau lau fakatahá. Ka naʻá ku manako ke sio ʻi hono ngaahi pēsí mo mamata ʻi he ngaahi fakatātaá mo e ngaahi talanoá.

Ko hoku manakó ʻa e talanoa ʻo Noá. Naʻá ku saʻia ke mamata kia Noa, lōmakí, mo e fanga monumanú. Naʻá ku saiʻia ʻi hono maluʻi ʻe he ʻaʻaké ʻa Noa mo hono fāmilí mei he matangí.

Naʻá ku papitaiso kimui ki he Siasí, mali, mo ʻi ai hoku fāmili pē ʻoʻoku. Ne fakamatalaʻi ʻe hoku uaifí, Linei, ʻi ha pō ʻe taha ʻi he efiafi fakafāmili ʻi ʻapí, fekauʻaki mo e faitatau ʻi ha ngaahi founga lahi ʻo e ʻaʻake ʻo Noá mo homau ʻapí. ʻOkú na takitaha ʻomi ha malu mei he ngaahi matangi fakailifia ʻo e māmaní.

Naʻá ku ako ha meʻa fekauʻaki mo Noa. Naʻá ne kei taʻu 10 pē ʻi heʻene maʻu ʻa e lakanga fakataulaʻeikí. Pea ʻi heʻene tupu haké, naʻá ne mamata ki he ngaahi faiangahala kotoa ʻi he māmaní. Ka naʻá ne nofo taau pē. Naʻá ne foʻu ʻa e ʻaʻaké ke fakahaofi hono fāmilí. Naʻe tokoniʻi kinautolu ʻe he Tamai Hēvaní ke nau hao.

ʻOku tau mamata he taimi ʻe niʻihi ki ha ngaahi meʻa fakailifia ʻoku hoko ʻi hotau māmaní. Ka te tau lava ʻo hao mei he afaá. Te tau lava ʻo teuteu hangē ko ia naʻe fai ʻe Noá. Te tau lava ʻo fili ke talangofua ki he ʻOtuá. Te tau lava ʻo ʻai hotau ngaahi ʻapí ko ha feituʻu ʻoku malu fakalaumālie.

Kapau te tau tui ki he Tamai Hēvaní, he ʻikai totonu ke tau ilifia. Te tau lava ʻo ongoʻi ha nonga, tatau ai pē pe ko e hā ʻa e matangi ʻe hoko maí, koeʻuhí ko Ia.