“Ko Hoʻo Fānau Au?”

Camille Nelson

ʻIutā, USA

Neongo naʻe tuʻo siʻi pē ʻeku maʻulotú, ka naʻe ʻaʻahi faivelenga mai pē kiate au ʻeku faiako fakaʻapí. Naʻe telefoni mai ʻi ha pō ʻe taha ʻo kole pe te u lava ʻo vahevahe ha ngaahi fakakaukau fekauʻaki mo e ngaahi fāmili taʻengatá ʻi he kalasi hono hoko ʻo e Ngaahi Tefitoʻi Moʻoni ʻo e Ongoongoleleí.

Naʻá ku talaange, “ʻIo, te u fiefia ke fai ia.”

Naʻe ʻikai ke u fuʻu fakakaukau lahi ki ai kae ʻoua kuo aʻu ki he pongipongi ʻe tahá. Ko e taimi ia naʻá ku toki fakatokangaʻi ai naʻá ku tali ke u lea fekauʻaki mo e ngaahi fāmili taʻengatá ki ha falukunga kakai mahalo kuo nau ʻosi ʻiloʻi ʻe kinautolu. Naʻe ʻikai ke u teitei ʻiloʻi pe ko e hā e meʻa teu talaange kiate kinautolú.

Naʻá ku fai ha ngaahi fili ʻi he fakalau atu ʻa e ngaahi taʻú, naʻá ne fakamavahevaheʻi au mei he ongoongoleleí. ʻE founga fēfē haʻaku vahevahe ʻeku ngaahi fakakaukau ki ha meʻa naʻe ʻikai ke u fakapapauʻi pe ʻoku ou tui ki ai? Naʻá ku ongoʻi puputuʻu. Pea haʻu leva e fakalea ʻo e himi “Fānau Au ʻa e ʻOtuá” ki heʻeku fakakaukaú (Ngaahi Himi, Fika 193). Kuo lauitaʻu ʻa e ʻikai ke u ongona e ngaahi lea ko iá, ka naʻá ku maʻu loto ia. Pea toki haʻu leva kiate au: ʻOku fie maʻu ke u fehuʻi ki he ʻOtuá pe ko ʻEne fānau moʻoni au.

Naʻá ku lolotonga fokotuʻutuʻu foʻou ʻi he taimi ko iá e nāunau fale ʻi hoku loki mohé, pea ʻi he laku tavale hoku mohengá ʻi he lotomālie ʻo e lokí, naʻá ku tūʻulutui pē, ofi ki ai ʻo tatali ke haʻu e lea ke u lea ʻakí. Ko e hā te u lava ʻo lea ʻaki ki he ʻOtuá? Naʻe ʻikai ke u fakapapauʻi pe ʻoku moʻui koā? ʻI he mōmeniti ko iá, naʻe ʻomi ʻe he holiholi vale ʻo hoku lotó ʻa e ngaahi lea ko ʻení ki hoku loungutú: “ʻE ʻOtua, ʻokú Ke moʻui moʻoni koā? Pea kapau ʻokú ke ʻi ai, ko Hoʻo fānau au?

Naʻe hoko mai ʻa e talí he taimi pē ko iá. Naʻe hangē naʻe ʻosi tatali pē Ia ke u fehuʻi angé? Naʻá ku ongoʻi e pehē ʻe he ʻOtuá, “ʻIo Kamilī, pea ko ʻeku fānau koe.”

Ko e taimi naʻe ʻāʻā hake ai hoku matá, naʻá ku kei ʻi hoku loki moveuveú pē. Naʻe taʻemaau e meʻa kotoa naʻe takatakai ʻiate au, ka naʻá ku ongoʻi kuo ʻosi fokotuʻutuʻu maau ʻeku moʻuí. Naʻá ku ʻilo ko ha fānau au ʻa e ʻOtuá, pea ko e meʻa pē ia naʻe mahuʻingá.

Naʻá ku fakamatala ange pē ʻi he kalasi he Sāpaté, ʻa e founga naʻá ku ʻilo ai ko e fānau au ʻa e ʻOtuá. Naʻá ku talaange, “Kapau ko ʻEne fānau au, ta ʻoku pehē mo e taha kotoa.”

Naʻe feʻunga mo ha taʻu ʻe tolu mo e konga ke u fakahoko kotoa ai e ngaahi liliu lelei naʻe fie maʻu ke u faí, ka kuo ʻikai toe tatau ʻeku moʻuí. Talu mei he ʻaho ko iá, kuo ʻikai te u toe veiveiua pe ko hai au. ʻOku ou ʻiloʻi ʻoku ʻi ai maʻu pē ʻa e Tamai Hēvaní. ʻOkú Ne ʻofa ʻiate au pea ko ʻEne fānau au.