Ngaahi Ongoongo Fakalotofonuá
Fakamuʻomuʻa e ʻEikí ʻe ha Tokotaha ʻIloa Haʻamoa
Kapau te ke lue fakalaka atu ʻia Kēlepi Timu, he ʻikai te ke teitei fakakaukau kuo fili e tangata ʻofa fāmili fakalongolongo mo angalelei ko ʻení ke kau ʻi he timi toko-32 ʻa e Wallabies. Naʻe manako maʻu pē e tamai ko ʻeni ʻo ha fānau ʻe toko ua, he ʻakapulú, ka naʻe ʻikai te ne teitei fakakaukau ʻe fili ia ke vaʻinga maʻa ʻAositelēlia hili haʻane tau tuʻo 12 pē maʻá e Queensland Reds, ʻo ʻikai ko ha toʻu vaʻinga kakato.
ʻI he 2012, naʻe mavahe ʻa Kēlepi mei heʻene ongoongoa kei talavoú ke ngāue fakafaifekau maʻá e Siasí. Naʻá ne vaʻinga maʻá e timi taʻu 20-pe siʻi ange ʻa e Brisbane Broncos pea fili ke vaʻinga maʻá e timi taʻu 20-pe siʻi ange ʻa e Maroons ʻi he tau State of Origin ʻo e taʻu tatau pē, ka naʻe ʻikai toe mahuʻinga ange ha meʻa kiate ia ʻi heʻene tui fakalotú. Naʻá ne pehē, “Ko e fili faingataʻa taha ia naʻe pau ke u fai ʻo aʻu pē ki he taimi ko iá.”
Hili ʻene talanoa mo hano kaungā vaʻinga ʻakapulu Siasi mo e kaungāmeʻa ko Will Hopoate, ʻa ia naʻá ne fai ha fili tatau, naʻe fili ai ʻa Kēlepi ke ngāue maʻá e ʻEikí pea mavahe mei heʻene maʻuʻanga moʻui vaʻinga ʻakapulu ne ʻosi fakapapauʻí.
Naʻe fakatatali ʻe Kēlepi ʻene vaʻingá ʻi ha taʻu ʻe ua kae ngāue fakafaifekau ʻi ʻOkalani mo Lalotonga, ʻi Nuʻusila.
“Naʻe tokoni ʻeku līʻoa kakato ki he ngāue fakafaifekaú mo e muimui ki he taimi-tēpile ʻa e faifekaú ke u mavahe mei he māmaní, ʻunu ʻo ofi ange ki he ʻOtuá pea tokoniʻi e kakai ne mau feohí. Ne hoko ʻeku ngāue fakafaifekaú ke toe lelei ange ai ʻeku fetuʻutakí koeʻuhí he ʻokú te talanoa ki he kakaí ʻi he halá mo honau ngaahi ʻapí ʻi he ʻaho kotoa pē.”
ʻI heʻene foki mai ki ʻapí naʻá ne toe alea pau mo e Broncos, ka naʻe taʻefakafiemālie ki ai he naʻe fakahoko ha ngaahi vaʻinga lahi ʻi he ʻaho Sāpaté, ko ha ʻaho makehe ʻaupito ki he kakai Kalisitiane kotoa fakamāmani lahi. Ne hoko ia ʻi ha taimi naʻe fetuʻutaki mai ai ʻa e Queensland Reds, ʻo hoko ai haʻane hiki mei he ʻAkapulu Līkí ki he ʻAkapulu ʻIunioní.
“Kuó u fiefia moʻoni ʻi he Queensland Reds mo e faingamālie ke u vaʻinga ʻi he Super Rugby ʻi he toʻu vaʻinga ko ʻení. ʻOku ou houngaʻia moʻoni hoku uaifi ko Pam, ʻa ia kuó ne hoko ko ha poupou lahi kiate au mo homa ongo fohá, ko Kalisi mo ʻEtuate. Kuó u maʻu ʻa e potupotutataú ʻi heʻeku moʻuí. ʻOku ʻikai ke u tui naʻá ku mei maʻu ʻa e ngaahi meʻá ni ka naʻe taʻeʻoua ʻa e ʻEikí mo e taʻu ʻe ua ʻo ʻeku ngāue fakafaifekaú. Pea ʻi he vaʻinga ʻakapulú, ʻoku ou tui kuo akoʻi au ʻi heʻeku tukuange iá ke u toe fakahoungaʻi ange ia.”
ʻOku fakatuʻamelie atu ʻa Kēlepi ke hokohoko atu ʻene tā ha sīpinga ki he koló ʻi heʻene hopo atu ʻi hono teunga lanu mata mo e koulá ke fakafofongaʻi ʻa e Wallabies, mo tuku taimi ki he meʻa mahuʻinga taha ʻi heʻene moʻuí, ʻa hono fāmilí mo e tui fakalotú.