Hili e Afā ko Maliá
Brianne Anderson
Vesinia, USA
Tā fakatātaaʻi ʻe Janice Kun
Naʻá ku hiki mo hoku fāmilí ki he motu ko Tominisiá ʻi he ʻOtu Kalipiané ʻi ʻAokosi 2016. Naʻa mau ʻāvea ʻi he fakaʻofoʻofa ʻo e motú, anga fakafonuá, pea mo e kakaí. Naʻa mau maʻulotu ʻi he kiʻi kolo ʻi aí mo ako lahi ʻi he kāingalotu ko iá.
ʻI he ʻaho Mōnite, 18 ʻo Sepitema 2017, kuo tō ha afā fika 5 ko Maila, ʻi homau kiʻi motú. Naʻá ku mamata pē mo hoku husepānití ki hono laku ʻe he matangi mālohí ʻa e ngaahi falé mo e ngaahi meʻalelé ki he hala lahí. Naʻe huʻu tonu mai e haʻahaʻa ʻo e Afā ko Maliá ʻi he motú pea naʻe hulufau ʻa e maumaú. ʻI he ʻaho, hili ʻo e afaá, naʻa mau lue ʻi he ngaahi hala lalahí ʻo ʻiloʻi kuo hangē vaotā fakaʻofoʻofa ia ʻo Tominisiá ha potu lalá.
ʻI he pongipongi tatau pē, ne mau lue lalo ki he ngaahi ʻapi homau kaungā kāingalotu he koló. Ko ha fale pē ʻe ua naʻe ʻikai ueʻi mo lava ke nofoʻi. Ko ha fāmili ʻe ono ʻi he ngaahi fāmili siasi ʻe valu naʻe nofo ʻi he tafaʻaki fakatokelau ʻo e motú ne mole ʻenau meʻa kotoa. Ko ha pēseti ʻe valungofulu ʻo e ngaahi ʻapi mo e ngaahi fale ʻi Tominisiá ne ʻikai toe lava ʻo nofoʻi. Ka neongo ʻa e meʻa fakamamahí ni, naʻe kei malimali pē ha ngaahi fāmili lahi. Ko e taimi naʻa mau ʻeke ange ai pe ʻoku nau fēfeé, naʻa nau tali pē, “ʻOku mau monūʻia ke kei moʻui.”
Koeʻuhí ko ʻemau talangofua ki he faleʻi ʻa e palōfitá ke mau moʻui fakafalala pē kiate kimautolú, naʻe ʻi ai ʻemau meʻakai ne ʻosi tokonaki. Naʻa mau lava ʻo fafanga hamau ngaahi kaungāʻapi, kau faifekau, pea mo ha kāingalotu tokolahi ʻo homau kiʻi koló. Naʻe fakaʻavalisi ke mau fafanga ʻi he houakai kotoa pē ha kakai ʻe toko 20. Naʻe ongoʻi maʻamaʻa ange ʻemau ngaahi kavengá ʻi heʻemau fakaʻaongaʻi ʻemau meʻakai ne tokonakí ke tokoniʻi mo tauhi kinautolu ne mau feohí.
Naʻe fakamanatu mai ʻe he aʻusia ko ʻení kiate au ʻa ʻAlamā mo hono kakaí, ʻa ia naʻe “fakamaʻamaʻa ʻenau ngaahi kavengá; ʻio, naʻe fakamālohi ʻa kinautolu ʻe he ʻEikí ke nau lava ʻo fua faingofua ʻa ʻenau ngaahi kavengá” (Mōsaia 24:15).
Neongo ne mau kei nofo pē taʻe ʻi ai ha vai taki, ʻuhila, pea mo e ngaahi fie maʻu fakaʻahó, ka naʻe fakamālohia kimautolu ke mau ikunaʻi mo felangakihakeʻaki. Naʻá ku fakatokangaʻi ʻi he ngaahi māhina hili ʻo e Afā ko Maliá, neongo ʻoku mahuʻinga ke mateuteu fakaetuʻasino, ka ʻoku toe fie maʻu foki ke tau mateuteu fakalaumālie. Ko e taimi ʻoku tau talangofua mo langa ai ʻetau fakamoʻoní ʻia Sīsū Kalaisí, te tau maʻu leva ʻa e fakavaʻe mālohi ʻe ʻikai holo ʻi he taimi ʻe haʻaki mai ai ʻa e havilí mo e ngaahi matangi mālohí kiate kitautolú.