ʻI he Tuʻunga Malangá
ʻOku Ou Pehē Te U Hangē Pē Ko Aú
Fakaʻesiá mei he Getty Images
ʻOku ou manatuʻi lelei ʻa e ngaahi liliu naʻe pau ke ma fakahoko ʻi he taimi naʻá ma nofo ai ʻi ʻIutaá. Ko hoku fuofua uiuiʻi ʻi homau uōtí ko ʻeku hoko ko ha faiako ʻi he Fineʻofá. Naʻá ku siofi lelei ʻa e kau faiako kehé pea naʻá ku mālieʻia lahi ʻi heʻenau feinga ke haohaoa ʻenau faiakó. Naʻa mo e ngaohi honau ʻulú mo honau ngaahi kofu mafolofolá naʻá ne tala ʻenau feinga ke haohaoá. Naʻá ku mālieʻia heʻenau pōtoʻi mo e mahino ʻenau lea faka-Pilitāniá. ʻE lava fēfē ke u lava, ʻi heʻeku vale he lea faka-Pilitāniá, ke feʻauhi mo kinautolu pea mo hoko ko ʻenau faiako? Naʻá ku vēkeveke ke ako pea mo fiefia lahi ke fanongo naʻe ʻi ai ha kalasi teuteu ʻa e siteikí ki he kau faiako ʻo e Fineʻofá.
Ko e fuofua taimi naʻá ku ʻalu ai ki he fakataha akó, naʻá ku maʻu ha ʻamanaki lelei lahi ʻaupito. Naʻe ʻikai ke u mateuteu ki he ngaahi fehuʻi naʻe fai mai kiate au fekauʻaki mo e faʻahinga fakamamafa te u fakaʻaongaʻi he taimi ʻoku ou fai lēsoni aí. Meʻa taʻefeʻunga moʻoni ko au! Naʻe ʻikai haʻaku misi pe ko e hā ʻa e fakamamafa pe ko hono taumuʻa ʻi he fakahoko ʻo e lēsoní. Naʻe kamata uesia au ʻe he ngaahi ongo ko ʻeni fekauʻaki mo aú pea mo ʻeku loto lahí. …
Naʻe hoko atu ʻeku ongoʻi ʻuluʻakauá ʻi heʻeku siofi e kakai fefine ʻi hoku uōtí pea mo mamata ki heʻenau tō ngoue mo faʻokapa e fuaʻiʻakaú. Naʻa nau fakamālohisino fakaʻaho ʻaki haʻanau lele. Naʻa nau tuitui mo fakatau ʻaki hano aleaʻi ke holo e mahuʻingá (bargain shopped). … Naʻa nau ʻave ha meʻakai efiafi ki he ngaahi faʻē olopoʻou mo puké ʻi honau ngaahi tukuiʻapí. Naʻa nau tauhi ha mātuʻa toulekeleka, pea toko ua he taimi ʻe niʻihi. … Naʻa nau faivelenga ʻi he ngāue fakatemipalé, pea ne nau tokanga ke maau ʻenau tohinoá.
ʻI hono kulukia au ʻe he ngaahi sīpinga ʻo e haohaoá ne u ʻi aí, naʻá ku fakalahi leva ʻeku feinga keu hangē ko hoku ngaahi tokouá, peá u ongoʻi taʻefiemālie ʻiate au pea aʻu ʻou ongoʻi halaia he taimi naʻe ʻikai ke u lele ai he pongipongi kotoa peé, pe taʻo kotoa ʻeku mā pē ʻaʻakú, pe tuitui hoku vala pē ʻoʻokú, pe hū ki he ʻunivēsití. Naʻá ku ongoʻi naʻe fie maʻu keu tatau mo e kakai fefine naʻá ku nofo aí, pea ne u ongoʻi ko ha taha taʻemalava au koeʻuhí, he naʻe ʻikai ke u lava ʻo liliu ke tatau mo ʻenau tōʻonga moʻuí.
Naʻe mei lava ke ʻaonga kiate au he taimi ko ʻení ʻa e talanoa ki he tokotaha taʻu ono, naʻe ʻeke ange ʻe hano kāinga, “Ko e hā ʻokú ke fie hoko ki aí?” peá ne tali ange? “ʻOku ou pehē te u hangē pē ko aú. Kuó u ʻosi feinga ke u tatau mo ha taha. Kuo ʻikai ke u lavaʻi ia he taimi kotoa pē!” Hangē ko e kiʻi tokotaha ko ʻení, hili e tuʻo lahi ʻa e ʻikai ke u lava ʻo tatau mo ha tahá, kuo fāifai peá u toki ʻilo, ta ʻoku totonu ke u nofo pē ʻi hoku tuʻungá. Ka, ʻoku ʻikai ke faʻa faingofua ʻeni, koeʻuhí ko ʻetau loto ke kau fakatahá, ke feʻauhi mo ʻiloá, pē ke tali pē he ʻokú ne ʻai kitautolu ke tau ʻakosope ki ha niʻihi pea holoki e mahuʻinga hotau tupuʻangá, hotau ngaahi talēnití, pea mo ʻetau ngaahi kavengá mo e ngaahi faingataʻaʻiá. … Naʻe pau ke u feinga ke ikunaʻi ʻeku ngaahi ongo taʻemanongá, tokua kapau he ʻikai keu fai pehē, ʻoku ʻikai ke u taau.
… Ko e taimi naʻá ku feinga ai ke faʻifaʻitaki ki hoku ngaahi tokoua leleí ʻi heʻeku akoʻi ʻeku kalasí ʻaki ha fakamamafa makehe pea mo ha ngaahi founga fakafaiako kehe naʻe ʻikai ke u maheni mo iá, naʻe ʻikai ke u lava, koeʻuhí he naʻe kei lea mai pē Laumālié ia kiate au ʻi he lea faka-Siamané, kae ʻikai ko e lea faka-Pilitāniá. Ka ko e taimi naʻá ku tūʻulutui ai ke kole ha tokoní, naʻá ku ako ai ke falala ki he Laumālié ke ne tataki au, mo nonga ʻi he ʻilo ko e ʻofefine au ʻo e ʻOtuá. Naʻe pau ke u ʻiloʻi mo tui naʻe ʻikai fie maʻu ke u feʻauhi mo ha niʻihi kehe kae toki ʻofaʻi mo tali au ʻe heʻeku Tamai Hēvaní. …
… Ko ʻetau ngāué ʻoku totonu ke ʻoua naʻa hoko ko ha fakamatamatalelei pe fakatatau ka ke liliu ʻe he Laumālié. …
ʻOku haʻi kitautolu ʻe ha ngaahi ivi lahi ki māmani. ʻOku fakatauʻatāinaʻi kitautolu ʻe he loto faitotonú ke tau ʻilo e finangalo ʻo e ʻOtuá fekauʻaki mo ʻetau moʻuí. …
… Neongo te tau ala femoʻuekina ʻi he feau ʻetau ngaahi fiemaʻu fakaʻahó mo e ngaahi faingamālie ke tupulakí, ka he ʻikai ke tau lava ʻo moʻui ʻi ha foʻi ʻaho pe miniti ʻo ʻikai fakatokangaʻi e mālohi ʻoku ʻiate kitautolú.