Palesiteni Tāleni H. ʻOakesi: Ko e Muimui ki he Ngaahi Founga ʻa e ʻEikí
ʻI he taimi ʻoku ʻilo ai ʻe Palesiteni ʻOakesi e meʻa ʻoku finangalo e ʻEikí ke ne faí—ʻokú ne fai ia.
Hili hono ui ke hoko ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi ʻEpeleli 1984, naʻe fakakaukau lahi ʻa ʻEletā Tāleni H. ʻOakesi ki hono fatongia foʻoú pea mo e ngaahi liliu pau ʻe hoko ʻi heʻene moʻuí.
ʻOku ʻikai ko e fuofua taimi ʻeni kuo kole ai kia ʻEletā ʻOakesi ke siʻaki ʻene “kupenga” fakataautaha mo fakapalofesinalé (vakai, Mātiu 4:18–20). Naʻá ne fakafisi ʻi he 1970 mei hono tuʻunga faiako ʻi he ʻUnivēsiti Lao ʻo Sikākoó ʻi heʻene tali e fakaafe mei he kau taki ʻo e Siasí ke hoko ko e palesiteni ʻo e ʻUnivēsiti Pilikihami ʻIongi ʻi Polovo, ʻIutā, USA. Naʻe fiefia moʻoni ʻi heʻene faiakó, fai ʻo e ngaahi fakatotoló, mo e fengāueʻaki mo e fānau ako lao ʻi Sikākoó. Ka, naʻá ne tali ʻi he tui ʻa e kole ke hoko ko e palesiteni hono valu ʻo BYU.
Naʻe fehangahangai ʻa ʻEletā ʻOakesi mo ha meʻa tatau ʻi he 1984 hili hono ui ia ki he Toko Hongofulu Mā Uá, ʻi haʻane toe mavahe mei ha tuʻunga mo ha ngāue naʻá ne manako ai ko ha fakamaau lahi ʻi he siteiti ʻo ʻIutaá. Ka, naʻe kehe ʻa e lilu ia ko ʻení.
ʻI he 1970, mahalo naʻe mei fakakaukau ʻa ʻEletā ʻOakesi ʻe foki ki heʻene ngāue fakalaó ʻi he ʻosi ʻene ngāue ʻi BYU, pea ko hono moʻoní naʻe pehē. Ka naʻe makehe ʻa e ui ʻi he 1984—ko ha tukupā ʻo e fakatapui hono laumālié kakato mo ʻene moʻuí kotoa ki he ʻEikí. Naʻe kāfakafa e mahuʻinga taʻengata mo e fakamāmani lahi ʻa hono ngaahi fatongia foʻoú.
Naʻe fakamatalaʻi ʻe ʻEletā ʻOakesi ʻene ngaahi fakakaukau ki he liliu mahuʻingá ni ʻo pehē:
“Lolotonga e vahaʻa taimi vakavakaiʻi ko ʻení, ʻi he fakakaukau ki he founga ʻe fakaʻaongaʻi ki ai e toenga ʻo ʻeku moʻuí, naʻá ku fehuʻi loto pē pe ko e faʻahinga ʻaposetolo fēfē au ʻi he kahaʻú. Te u hoko ʻapē ko ha loea kuo uiuiʻi ko ha ʻaposetolo, pe ko ha ʻaposetolo naʻe hoko ko ha loea?” Naʻá ku ʻilo ai naʻe makatuʻunga pē tali ki he fehuʻí ni ʻi haʻaku feinga ke fakafenāpasi hoku uiuiʻí ke tatau mo hoku tuʻunga feʻunga fakatāutahá mo e taukeí, pe ko haʻaku foua ʻa e founga fakamamahi ʻo e feinga ke fakafenāpasi au ke u taau mo hoku uiuiʻí.
“Te u feinga nai ke fakahoko hoku uiuiʻí ʻi he ngaahi founga ʻa e māmaní, pe te u feinga ke ʻilo pea muimui ʻi he ngaahi founga ʻae ʻEikí?
“Naʻá ku pehē leva te u feinga ke u liliu ke taau mo hoku uiuiʻí, pea mo feinga ke aʻusia e ngaahi fie maʻu mo e tuʻunga fakalaumālie ʻo ha ʻaposetolo. Ko ha pole ia ki he kotoa ʻo e moʻuí.”1
Kuo hanga ʻe he ʻaloʻofa fakalangi ʻa e ʻEikí, ngaahi aʻusia ʻo e moʻuí, poupou ʻa e fāmilí, mo e ngaahi lelei fakafoʻituitui mo e mapuleʻi kita ne fakatupulaki ʻi he ako faivelengá, ngāue mālohí, mo e ngāue ʻofá ʻo ʻai ke malava ʻa Palesiteni ʻOakesi ʻo “muimui ʻi he ngaahi founga ʻa e ʻEikí” pea hoko moʻoni ko ha ʻAposetolo loto toʻa, ʻa ia naʻe hoko ko ha loeá.
ʻOku hāsino ha ngaahi meʻafoaki fakalaumālie lahi ʻi he moʻui mo e ngāue ʻa Palesiteni Tāleni H. ʻOakesí.
Tui ki he Fakamoʻuí
ʻOku tāpuekina ʻa Palesiteni ʻOakesi ʻaki ha meʻafoaki fakalaumālie ke ne ʻilo ʻi he mālohi ʻo e Laumālie Māʻoniʻoní ko Sīsū Kalaisí ko e ʻAlo ia ʻo e ʻOtuá (vakai, T&F 46:13–14). ʻOkú ne akoʻi mahino e tokāteline ʻo e Fakamoʻuí pea mo fakamoʻoni kiate Ia ʻi he ʻilo pau. ʻOku hoko e ʻEikí ko ʻene maama ʻi he tapa kotoa ʻo ʻene moʻuí. ʻI he taimi ʻoku ʻilo ai ʻe Tāleni H. ʻOakesi e meʻa ʻoku finangalo ‘a e ʻEikí ke ne faí—ʻokú ne fai ia.
Kuo tokoni ʻa Palesiteni ʻOakesi ʻi heʻene ngaahi akonaki ʻi ha ngaahi taʻu lahi, ke mahino kakato ange ki he kāingalotu ʻo e Siasí ʻa e taumuʻa mo e mahuʻinga ʻo e palani ʻo e fakamoʻui ʻa e Tamaí, Fakalelei ʻa e Fakamoʻuí, mafai mo e ngaahi kī ʻo e lakanga fakataulaʻeikí, ouau toputapu ʻo e sākalamēnití, founga ʻo e ʻikai “fakahoko pē” ka ke “aʻusiá,” faikehekehe ʻi heʻetau moʻuí ʻi he leleí, lelei angé, mo e lelei tahá, pea mo ha ngaahi tefitoʻi moʻoni taʻefaʻalaua kehe ʻo e ongoongoleleí. Kuo hanga ʻe heʻene founga faingofua mo maau ki hono ako e ongoongoleleí ʻo fakamālohia e tui ʻa e Kāingalotu ʻo e Siasí ʻi he funga māmaní.
Faitotonú
Ko Palesiteni ʻOakesí ko ha tangata faitotonu. ʻOku fakavaʻe ʻene tuí mo hono ʻulungāngá ʻi he ngaahi tefitoʻi moʻoni ʻo e ongoongoleleí, pea ʻokú ne moʻui ʻaki e meʻa ʻoku tui ki aí. ʻOku ʻikai teitei hoko e ʻaiʻainoaʻiá ko ha meʻa ke ne fili koeʻuhí kuó ne fakapapau ke fai e meʻa ʻoku totonú, neongo kapau ʻoku ʻikai hiki hake hono ongoongó pe ko ʻene fakakaukaú ʻe ha meʻa te ne fai. ʻOku ʻikai ha halatuʻusi ia ʻi heʻene moʻuí—faitotonu pe tuku ʻaupito.
ʻOku hāsino ʻene angatonú ʻi heʻene loto ke ngāueʻi e ngaahi palopalema mo e ngaahi ngāue faingataʻá. Pea ʻokú ne fai ia ʻi ha founga lelei moʻoni—ko e founga ʻa e ʻEikí. Kuó ne ʻosi akoʻi hangatonu ʻa e ngaahi tefito hangē ko e taukapoʻi ʻo e fāmili totonú, lea fekauʻaki mo e ngaahi meʻa ʻoku fakatuʻutāmaki ki he tauʻatāina fakalotú, maluʻi ʻo e fānaú mei he ngaahi angahala siokita ʻa e kakai lalahí, mo fakafepaki ki he kovi ʻo e ponokalafí.
Angamaluú
ʻOku makehe moʻoni e ngaahi lavameʻa fakafoʻituitui mo fakapalofesinale ʻa Palesiteni ʻOakesí ʻi ha faʻahinga tuʻunga pē. Ka ʻoku fakafōtunga ʻe Palesiteni ʻOakesi ʻa e angamaluú mo e ongoʻi ngofua fakalaumālie ke fakatou ako mei he Laumālie Māʻoniʻoní pea mo e kakai ʻoku kehekehe fau honau puipuituʻá mo e ngaahi taukeí.
Naʻe fakahaaʻi ʻe ʻEletā ʻOakesi ʻi ha taha ʻo ʻemau ngaahi fakataha fakakōlomú, ha fakakaukau mālohi fekauʻaki mo ha ngāue naʻe tui ʻoku totonu ke fakahoko. Naʻe mahuʻingamālie e ngaahi ʻuhinga naʻá ne fakamatalaʻí, pea naʻe mahulu hake ʻene ʻilo fekauʻaki mo e meʻa ko iá. Naʻe mālohi ʻene taukaveʻi ʻene loto ki he ngāue ko iá.
ʻI heʻemau fealēleaʻaki fakatahá, naʻe fakahaaʻi ʻe ha mēmipa ʻo e Toko Hongofulu Mā Uá ne ʻikai fuoloa hono uiuiʻí, ʻa ʻene loto ki he ngāue ke faí ka naʻá ne fakahā ʻene kiʻi momou fekauʻaki mo e taimi ne fokotuʻú. Naʻe mei lava pē ʻe ʻEletā ʻOakesi ke fakafepakiʻi ʻa e hohaʻá ʻo peheni, “Oku ou tui ʻoku ou taukei ange ʻi he meʻá ni ʻiate koe.” Ka naʻe ʻikai ke fai pehē. Naʻe ʻikai ha kumi ʻuhinga pe ʻita ʻa ʻEletā ʻOakesi, ka naʻá ne kole ange ki he mēmipa ʻo ʻene kōlomú, “Kātaki muʻa ʻo tokoni mai ke mahino kiate au hoʻo momou fekauʻaki mo e taimí?”
Hili e fakafanongo tokanga ʻa ʻEletā ʻOakesi ki hono kaungā ʻaposetoló, naʻá ne fakakaukau ʻi ha kiʻi taimi peá ne toki pehē, “ʻOku mahuʻinga e meʻa kuó ke fokotuʻu maí. Naʻe ʻikai ke u fakakaukauʻi kakato e kaunga ʻa e taimi ʻo e ngāue ko ʻení hangē kuó ke faí, pea ʻoku ou tui ʻoku totonu ke toe liliu ʻa e fokotuʻú ʻo fakatatau mo e meʻa kuo tau ʻilo ʻi he fealēleaʻaki ko ʻení.”
Naʻe fakafanongo ʻa ʻEletā ʻOakesi mo ako mei hono kaungā mēmipa he kōlomú pea toki ʻaʻeva ʻi he angamalū ʻo e Laumālie ʻo e ʻEikí (vakai, T&F 19:23) ke fakahoko ʻa e ola naʻe fie maʻú. Kia Tāleni H. ʻOakesi, ʻoku ʻikai teitei fekauʻaki ha meʻa mo e meʻa naʻá ne fie maʻú; ʻoku fekauʻaki maʻu pē ia mo e meʻa ʻoku finangalo ki ai e ʻEikí pea mo e muimui ʻi Heʻene ngaahi foungá.
Faʻa ʻiloʻiló
ʻOku toe tāpuekina ʻaki foki ʻa Palesiteni ʻOakesi ʻa e meʻafoaki fakalaumālie ʻo e faʻa-ʻiloʻiló mo e malava ke ne fakatokangaʻi ʻa e ngaahi nunuʻa tuʻuloa ʻo e ngaahi fokotuʻú, filí, mo e ngāué. ʻOku fakahaaʻi e meʻa ko ʻení ʻi ha fehuʻi ʻokú ne faʻa fai kiate ia mo e niʻihi kehé: “ʻE iku ia ki fē?”2 He ʻikai ke lava ha taha ʻo talanoa pe fealēleaʻaki mo Palesiteni ʻOakesi pea ʻikai ke ne fakatokangaʻi vave e founga kuo ʻaonga ai ʻeni ki ha niʻihi taʻefaʻalaua mo ha ngaahi fāmili pea mo e Siasí fakakātoa lolotonga ʻene ngāue he kotoa ʻene moʻuí maʻá e ʻEikí.
ʻI ha pō ʻe taha he faʻahitaʻu māfana ʻo e 1970, ne fehangahangai ʻa Palesiteni ʻOakesi mo ha taha kaihaʻa kuo toʻo meʻatau, ʻi he Tafaʻaki Fakatonga ʻo Sikākoó, ʻi heʻene foki atu ki he tauʻanga ʻo ʻene kaá. Naʻe tatali hono uaifi ko Suné ʻi he loto meʻalelé.
Naʻe tuʻutuʻuni atu ʻe he taha fakamālohí, “ʻOmai hoʻo paʻangá.”
Naʻe tali ange ʻe Misa ʻOakesi, mo fakaʻaliʻali ange ʻene ngeʻesi uāletá, “ʻOku ou hala au.”
Ne toe tuʻutuʻuni atu ʻe he taha fakamālohí, “ʻOmai e kī hoʻo kaá.” Naʻe lokaʻi foki e kií ia ʻi he loto kaá fakataha mo Sisitā ʻOakesi. Naʻe kikihi atu e taha kaihaʻá, “Talaange ke ne fakaava e matapaá.” Naʻe talaange ʻe Misa ʻOakesi ia ʻikai.
Ne fakamanamana atu leva e taha kaihaʻá, “ʻAi, pe te u tāmateʻi koe.”
Naʻe tali fefeka ange ʻe Misa ʻOakesi, “He ʻikai ke u fai ia.”
Lolotonga hono toutou fakahoko ange ʻe he taha kaihaʻá ʻene ngaahi fie maʻú mo ʻene fakamanamaná, naʻe fakatokangaʻi ʻe Misa ʻOakesi ha faingamālie ke ne hamusi ai e meʻafaná mei he talavoú. Hangē ko ia naʻe fakamatalaʻi ʻe Palesiteni ʻOakesi ʻi he pōpoaki konifelenisi lahi ʻo e 1992, “ʻI he teuaki pē ke u fakahokó, ne u aʻusia ha meʻa makehe. Naʻe ʻikai ke u mamata pe fanongo ki ha meʻa, ka naʻá ku ʻiloʻi ha meʻa. Naʻá ku ʻilo ʻa e meʻa ʻe hoko kapau te u hamusi e meʻafana ko iá. Te ma tauhamu pea teu fakahanga ʻa e meʻafaná ki he talavou ko iá. ʻE pā ia, pea te ne mate ai. Naʻe toe mahino foki kiate au kuo pau ke ʻoua naʻa moʻua hoku konisēnisí he toenga ʻo ʻeku moʻuí ʻi he pekia e talavou ko iá.”3
Naʻe malava ʻe he fakahā fakaofo ko ʻeni ʻo e meʻafoaki ʻo e faʻaʻiloʻiló ke fakaleleʻi ʻe Palesiteni ʻOakesi ʻa e tūkungá pea iku ʻo ne fakahaofi ʻene moʻuí pea mo e moʻui ʻa e talavou kaihaʻá.
ʻI ha fakataha kimuí ni mai ʻa e Fakataha Alēlea Pule ʻo e Ngāue Fakafaifekaú, ʻa ia naʻe sea ai ʻa ʻEletā ʻOakesi he taimi ko iá, ne mau fealēleaʻaki fakataha ki ha fokotuʻu fekauʻaki mo e kau faifekau naʻa nau ngāue ʻi ha feituʻu pau he māmaní. Hili hono fakahaaʻi ʻe he kau mēmipa kotoa ʻo e fakataha alēleá ʻenau fakakaukaú, ne fai ʻe ʻEletā ʻOakesi ha ngaahi fehuʻi mo aofangatuku e meʻa kuo ʻiló. Naʻá ne pehē leva, “ʻOku ʻikai ke u ongoʻi kuo tau fiemālie ki he meʻá ni. ʻOku totonu ke tau tatali ki he ʻEikí ʻo ʻoua te tau fai ha tuʻutuʻuni aofangatuku he taimí ni.”
Naʻe fakamahino ʻe he ngaahi meʻa ne hoko ʻi he ngaahi māhina kimui aí ʻa e tataki fakalaumālie naʻe kau ʻi he tuʻutuʻuni ko ia ke tatalí. Kuo tāpuekina e fakataha alēleá, ʻi he tataki fakalaumālie ʻa ʻEletā ʻOakesí, ke nau fai e tuʻutuʻuni totonú, ʻi he taimi totonu, pea ʻi he founga ʻa e ʻEikí ke maluʻi ʻa e kau faifekaú mo fakatupulekina ʻa e ngāué.
Poto he Huá mo Angaʻofa
ʻOku poto ʻa Palesiteni ʻOakesi he tūkuhuá. Hangē ko ʻení, ʻi he fakaʻosinga ʻo ha maʻu meʻatokoni hoʻatā naʻe kau kotoa ki ai ʻa e kau mēmipa ʻo e Toko Hongofulu Mā Uá, ne fokotuʻu ange ʻe ha taha ʻo e Kau Takí ʻe faingataʻa ke kei ʻāʻā ha taha ʻi he hoʻataá hili ʻenau maʻu ha meʻatokoni ifo peheé. Naʻe malimali lahi ʻa Palesiteni ʻOakesi mo pehē ange, “ʻO kapau pē he ʻikai te ke maʻu ha feituʻu lelei ke mohe ai.”
ʻOkú ne faʻa fakakataʻaki pē ia mo ʻene tulá. Ka ʻe toe lava foki ʻo hoko ko ha taukapo mālohi ʻo kinautolu ʻoku siʻi honau louʻulú. ʻOkú ne faʻa pehē, “Naʻe fakatupu ʻe he ʻEikí ha ngaahi foʻi ʻulu lahi, pea ko kinautolu ʻoku ʻikai fuʻu fakaʻofoʻofá naʻá ne foaki ki ai e louʻulú.”
ʻOku fakamāfana ʻene poto ʻi he huá, pea ʻokú ne fakaʻatuʻi maʻu pē mo angaʻofa. ʻOku faʻa pehē ʻe he kakaí hili haʻanau feohi mo Palesiteni ʻOakesi ʻoku nau saʻia ʻi he founga ʻo ʻene fakanonga kinautolú koeʻuhí pē koʻene poto he huá, moʻoni ʻo ʻene ʻofá, pea mo ʻene natula tokangá.
Ivi Tākiekina ʻo e Kau Fafine Angatonú
ʻI he ngaahi lavameʻa mo e ngeia fekauʻaki mo e fakaofo ʻo ʻene moʻuí, ko Palesiteni ʻOakesi ʻa e fuofua taha ke ne fakahaaʻi e ivi tākiekina lahi ʻo e kakai fefine angatonu ʻe tolu ʻi heʻene moʻuí: Sitela Hālisi ʻOakesi, Sune Tikisoni ʻOakesi, mo Kilisiteni M. Makameini ʻOakesi.
Naʻe taʻu fitu pē ʻa Tāleni ʻOakesi ʻi he taimi naʻe mālōlō ai ʻene tangataʻeikí, ʻa Loiti E. ʻOakesi, ko ha toketā fakafaitoʻo, tupu mei he fatafatavaivaí ʻoku kei taʻu 36. Naʻe telio ia ʻi he fakamanatu e taʻu 11 ʻo ʻene mali mo e fineʻeiki ʻa Palesiteni ʻOakesí, ʻa Sitela Hālisi ʻOakesí. Naʻe ʻikai ke toe mali ʻi he toenga ʻo ʻene moʻuí ka ne ohi pē ʻena fānau ʻe toko tolú.
ʻOku pehē ʻe Palesiteni ʻOakesi, “Naʻe tāpuekina au ʻaki ha faʻē fita. Ko e taha moʻoni ia ʻo e kau fafine fakaʻeiʻeiki kuo moʻui ʻi he ngaahi ʻaho kimui ní.”4
Naʻe fetaulaki ʻa Palesiteni ʻOakesi mo Sune Tikisoni ʻi hono taʻu ʻuluaki ʻi BYU. Naʻá na mali ʻi he 1952 pea naʻe tāpuekina kinaua ʻaki ha fānau ʻe toko ono. Naʻe pehē ʻe Palesiteni ʻOakesi, “Naʻe ʻikai ke tuʻu maʻu maʻu pē ʻeku akó ʻi ha tuʻunga māʻolunga kae tālunga ʻeku fetaulaki mo Suné. Ko e konga lahi ʻoku ʻeku ngaahi lavameʻá ko ia.”5 ʻI he ʻaho 21 ʻo Sune 1998, ne mālōlō ai ʻa Sune tupu mei he kanisaá.
Naʻe ʻosi talanoa ʻa Sune mo Tāleni fekauʻaki mo e kahaʻu hona fāmilí kimuʻa pea toki mālōloó. Naʻá na felotoi ʻe hoko haʻane toe mali ko ha tāpuaki ia kiate ia pea mo hona fāmilí. ʻI he ʻaho 25 ʻo ʻAokosi 2000, ne mali ai ʻa ʻEletā ʻOakesi mo Kilisiteni M. Makameini.
ʻOku fakamatalaʻi ʻe Kilisiteni ʻOakesi ʻene moʻui mo Palesiteni ʻOakesí ʻaki ha foʻi sētesi pē taha: “ʻOkú ma fakataha ʻi he ngāue ʻa e ʻEikí pea kuo fakahaaʻi mai kiate kimauá ʻaki e ngaahi tāpuaki ʻoku ʻikai lava fakamatalaʻi.” ʻOkú ne fokotuʻutuʻu ha ngaahi fakataha fakafāmili ki he lahi taha ʻe lavá he ʻokú ne ʻomi ha fiefia lahi ki he fāmilí fakakātoa. ʻOku hoko maʻu pē ʻa Sune ko ha konga ʻo e fepōtalanoaʻaki.
Tā mo e kāingalotu ʻi ʻĒsiá mei he Deseret News; tā mo hono uaifí, Kilisiteni, ʻi he Roots Tech, naʻe fai ʻe Jeffrey D. Allred, Deseret News
ʻI he taimi ʻoku akoʻi mo fakamoʻoniʻi ai ʻe Palesiteni ʻOakesi e ngaahi moʻoni ʻoku ʻi he “Ko e Fāmilí: Ko ha Fanongonongo ki Māmaní,” ʻokú ne ʻiloʻi tonu hono mahuʻinga ʻo e hoko ko e husepāniti mo e tamaí. Kuó ne ʻosi ako ha ngaahi meʻa mahuʻinga fekauʻaki mo e ngaahi fatongia ʻoku vahevahe ʻe he husepānití mo e uaifí “ke na feʻofaʻaki mo fetauhiʻaki pea ki heʻena fānaú foki”—pea “ʻi he ngaahi fatongia toputapú ni, ʻoku haʻisia ai ʻa e [ngaahi husepānití mo e] ngaahi tamaí mo e [ngaahi uaifí mo e] ngaahi faʻeé ke nau fetokoniʻaki ko ha kaungā-ngāue tuʻunga tatau.”6 Kuo muimui maʻu pē ʻa Palesiteni ʻOakesi pea ki he lelei taha ʻokú ne malavá, ʻi heʻene moʻui fakafāmilí, ki he ngaahi founga ʻa e ʻEikí.
Ko e Fakatapui ʻo e Moʻuí Kakato
ʻI he ʻaho 6 ʻo ʻEpeleli 2018, ne fokotuʻu ai ʻa Palesiteni Lāsolo M. Nalesoni ko e Palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, mo Palesiteni Tāleni H. ʻOakesi ko e Tokoni ʻUluaki ʻi he Kau Palesitenisī ʻUluakí pea mo Palesiteni Henelī B. ʻAealingi ko e Tokoni Ua.
ʻOku haʻu ʻa Palesiteni ʻOakesi ki heʻene ngāue foʻou ʻi he kōlomu pule ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní mo e “nonga pea mo ha līʻoa tuʻuloa ʻi he moʻuí”7—ko ha moʻui kuo fakatapui ki he Fakamoʻuí mo Hono Siasi kuo fakafoki maí. ʻE tākiekina lelei ʻe he tuʻunga fakaākonga ʻo Palesiteni ʻOakesí, ʻe heʻene ngaahi akonaki leleí, pea mo e pau ʻo ʻene sīpinga angatonú ʻa e kakai ʻi he funga ʻo e māmaní pea mo tokoniʻi kinautolu ʻi he muimui ki he ngaahi hala ʻo e ʻEikí.