Founga Fakakomipiutá Pē
Lēsoni ʻe 4 mei hono ʻOmai ʻe Siosefa Sāmita e Tohi ʻa Molomoná
ʻI he kei taʻu 24 pē ʻa Siosefa Sāmitá, naʻá ne fehangahangai ai mo ha ngaahi faingataʻa ʻi heʻene feinga ke fakahoko e ngaahi fekau ʻa e ʻOtuá. Ka naʻá ne ikunaʻi ʻaki e tokoni ʻa e ʻOtuá, pea ʻe pehē pē foki mo kitautolu.
ʻI hotau tuʻunga ko e kakai lalahi kei talavoú, mahalo naʻa kole mai ke tau fai ha ngaahi meʻa ʻe ngali taʻemalava ka ne taʻeʻoua e tokoni ʻa e ʻOtuá. Ko e meʻa tatau pē naʻe hoko ʻi he kei taʻu 24 ʻa Siosefa Sāmitá, naʻá ne fehangahangai mo e ngaahi faingataʻá mo ongoʻi taʻetaau ʻi heʻene feinga ke fakahoko ha fekau mahuʻinga—ko hono pulusi e liliu ʻo e Tohi ʻa Molomoná. Ka ʻi he tokoni ʻa e ʻOtuá, naʻá ne fakakakato e meʻa kotoa naʻe kole kiate iá, pea ʻoku fakahaaʻi ʻe heʻene sīpingá ha ngaahi founga te tau lava ai ʻo ʻai ʻa e meʻa ʻoku taʻemalavá ke malava, ʻi he taimi ʻoku tau kau ai mo e ʻOtuá.
-
ʻOku ʻikai ko ha meʻa pau ke tau maʻongoʻonga kae toki fakahoko ʻe he ʻOtuá ʻa e ngaahi maná ʻiate kitautolu. ʻI he taimi naʻe teuteu ai ʻe Siosefa ke pulusi e Tohi ʻa Molomoná, ko ha taha lahi kei talavou pē ia naʻe ʻikai lahi haʻane paʻanga pe tuʻunga fakaako fēfē—tuku kehe atu ha ʻilo ki he founga ke liliu mo pulusi ai ha lekooti mahuʻinga pehē. Ka, naʻá ne laka atu ʻi he tui, fakataha mo e meʻafoaki pea mo e mālohi ʻo e ʻOtuá ke fakakakato ʻa e ngāue naʻe kole ke ne faí. Kapau te tau falala ki he Tamai Hēvaní, te Ne lava ʻo ʻai ke tau lava ʻo fai ʻEne ngāué.
-
Ko e taimi ʻoku tuku mai ai ʻe he ʻOtuá kiate kitautolu ha ngāué, te Ne teuteu ha founga ke tau lavaʻi ai. ʻOku pau naʻe ngali hā taʻemalava kia Siosefa ʻa hono pulusi ha tatau ʻe 5,000 ʻo e tohi ne peesi ʻe 590. Ka, ʻi he hokosia e taimi ke pulusi ai ʻe meʻa ne liliú, naʻe ueʻi ʻe he ʻEikí ʻa Māteni Hālisi ke ne mōkesi ʻa ʻene fāmá, ke maʻu ai ha $3,000 (tatau ia mo e paʻanga nai ʻe $76,000 he ʻahó ni) ke tokoni ke fakahoko ʻe Siosefa hono misioná. Hangē ko ia ne akoʻi ʻe Nīfaí, “ʻe teuteu [ʻe he ʻEikí] ha hala maʻanautolu ke nau lava ai ʻo fai ʻa e meʻa kuó ne fekau kiate kinautolú” (1 Nīfai 3:7). Naʻe tuku ʻe he Tamai Hēvaní ʻa e ngaahi maʻuʻanga tokoni naʻe fie maʻú ki he nima ʻo Siosefá ke fakaʻosi ʻa e ngāué. Pea te Ne fai e meʻa tatau maʻatautolu.
-
ʻOku foaki ʻe he ʻOtuá ha faingamālie hono ua. Naʻe fakahoko ʻe Siosefa Sāmita ha ngaahi fehālaaki ʻo iku mole ai ʻa e peesi ʻe 116 ne ʻosi liliu ʻo e Tohi ʻa Molomoná. Koeʻuhí ko e mole ʻa e peesi ʻe 116, naʻe mole ai foki meia Siosefa ʻa e malava ke liliú ʻi ha vahaʻa taimi. Ka koeʻuhí naʻá ne fili ke fakatomala, naʻe iku ai ʻo fakamolemoleʻi ia pea ʻoange hano toe faingamālie ke fakakakato ai hono misioná. Naʻe folofola ʻa e ʻEikí, “Kae manatu, ʻoku ʻaloʻofa ʻa e ʻOtuá; ko ia, fakatomala mei he meʻa kuó ke faí ʻa ia ʻoku fepaki mo e fekau naʻá ku fai kiate koé, pea ʻoku kei fili pē koe, pea ʻoku toe ui koe ki he ngāué” (T&F 3:10). ʻE fonu fehālaaki ʻetau moʻuí ʻi he moʻui ko ʻení, ka ʻi heʻetau fakatomala mo fakatonutonu hotau lotó, ʻe foaki mai maʻu pē ʻe he ʻEikí ha toe faingamālie.
-
ʻE lava ʻe he sioloto ki he fiefia naʻe talaʻofá ʻo tokoni ke tau fakalaka atu ʻi he ngaahi faingataʻá. Neongo ʻa e ngaahi faingataʻa naʻe fehangahangai mo Siosefá, ka naʻá ne maʻu ha ngaahi tāpuaki lahi mo foua ha fiefia moʻoni ʻi heʻene ngāue ke ʻomi ʻa e Tohi ʻa Molomoná. Hili hono pulusi ʻo e Tohi ʻa Molomoná, naʻe fokotuʻu leva ʻa e Siasí pea naʻe papitaiso mo e ongomātuʻa ʻa Siosefá. Naʻe ʻalu toko taha ʻa Siosefa ʻi he ʻaho ko iá ki he vao ʻakaú ʻo kamata ke tangi ʻi he fiefia. Kapau te tau tuiaki atu pē ʻi hotau ngaahi faingataʻá mo lotolahi pea falala kakato ki he ʻOtuá, te tau lava mo kitautolu ʻo maʻu ha fiefia mo ha nonga.