Akoʻi ʻe he Laumālie Māʻoniʻoní
Naʻe teuteu ʻa e toʻu tupu ko ʻení kimuʻa ʻi he konifelenisi lahí ke akoʻi kinautolu ʻe he Laumālié. Ko e meʻa ʻeni naʻa nau ako mei ha konifelenisi kimuʻa pea mo e meʻa ʻoku kehe ʻenau fakahokó koeʻuhí ko ia.
Fakahinohino fakalaumālie
Ngaahi ʻatá mei he Getty Images
Naʻe ueʻi fakalaumālie au ʻe he konifelenisi lahí. ʻI heʻeku fakafanongo ki he fakahinohino mei hotau kau takí ke tokoniʻi ʻa e niʻihi kehé, falala kia Kalaisi, pea pikimaʻu ki he vaʻa ukameá, naʻá ku ongoʻi hono fakamoʻoniʻi mai ʻe he Laumālie Māʻoniʻoní ʻoku moʻoni ʻa e ongoongolelei ko ʻení pea te tau lava ʻo maʻu ʻa e moʻui taʻengatá ʻi haʻatau tauhi e ngaahi fekaú mo muimui ki he folofola ʻa e ʻOtuá. Naʻá ku fokotuʻu leva ha ngaahi taumuʻa ke u tokoni lahi ange ʻi hoku koló mo fakamālohia ʻeku fakamoʻoní ʻaki haʻaku lotu mo ako fakaʻaho e folofolá. ʻOku ou ʻiloʻi ko ha ʻofefine au ʻo e Tamai Hēvaní. ʻOkú Ne moʻui mo ʻofa ʻiate au ʻo taʻengata pea maʻu ai pē.
Madelyn B., taʻu 16, Telauea, USA
Tali ki he Ngaahi Fehuʻí
Naʻe ʻi ai haʻaku fehuʻi ʻe ua kimuʻa ʻi he konifelenisi lahí: (1) Te u lava fēfē ke kei loto-lelei mo tokoni ki hoku ngaahi kaungāmeʻá ʻi he taimi ʻoku nau fai ai ha ngaahi fili ʻoku koví? mo e (2) Te u lava fēfē ke fakamoʻoni ki he Siasí taʻe te nau manukiʻi au? ʻI he lolotonga ʻo e konifelenisi lahí, naʻe fakamoʻoniʻi mai ʻe he Laumālié ʻoku ʻikai ke u tuēnoa. ʻOku ou ʻilo ʻeni te u maʻu ha tali ki heʻeku ngaahi fehuʻi fekauʻaki mo hoku ngaahi kaungāmeʻá, ʻi haʻaku ako ʻa e folofolá ʻaki hoku lotó kotoa. ʻOku ou ʻiloʻi ʻoku ongoʻi ʻe heʻeku Tamaí ʻa ʻeku ngaahi lotú, pea te u feinga ke lelei ange ʻi he ʻaho takitaha.
Isaak R., taʻu 13, Pisinisa, ʻEkuatoa
Mateuteu ke Ako
ʻOku ou ongoʻi mālohi ʻa e Laumālié ʻi he konifelenisi lahí. Talu mei heʻeku kamata teuteu e ngaahi fehuʻí mo teuteuʻi fakalaumālie au ki he konifelenisí, kuó ne liliu ʻeku moʻuí ʻo mahuʻinga makehe, pea kuó u lava leva ke ako lahi ange mei he lea takitaha. ʻOku ou houngaʻia lahi ko e palōfitá mo e kau ʻaposetoló, pea ʻoku ou ʻiloʻi kuo fekauʻi mai kinautolu mei he Tamai Hēvaní ke taki kitautolu mo fakahinohinoʻi ʻetau moʻuí!
Ben H., taʻu 17, Kenitaki, USA
Fakaafeʻi ke Tupulaki
Naʻe fakamālohia au ʻe he konifelenisi lahí ʻaki ha loto-holi ke muimui ʻi he hala ʻo e ongoongolelei ʻa Sīsū Kalaisí. Naʻe tokoni ke u ʻiloʻi mo mahino kiate au ko e Siasi moʻoní ʻeni, ʻokú ne ʻomi ʻa e māmá mo e fiefiá kiate kitautolu. Naʻá ku ongoʻi hono fakaafeʻi au ʻe he Laumālié ke u tupulaki he ʻaho takitaha pea mo lau e Tohi ʻa Molomoná ke u maʻu ha fakamoʻoni mālohi ki he ongoongoleleí. ʻOku ou tui ʻoku finangalo ʻeku Tamai Hēvaní ke u fanongo ki he ngaahi pōpoaki fakalaumālie ko ʻení.
Vicente A., taʻu 16, Vāhenga Metupolitiení, Silei
Ko e Fekumi ki he Māmá
Naʻe faingataʻa kiate au ʻa e taʻu kimuʻa ʻi he taʻu kuo ʻosí. Naʻe fekuki ʻeku tangataʻeikí mo e kanisaá, pea naʻe fai ha ʻohofi tautoitoi ʻi hoku koló. Naʻá ku fekuki mo e loto-hohaʻá, ʻo u fifili pe te u ongoʻi fēfē nai ʻa e nongá ʻi heʻeku tailiili ki heʻeku malu fakalaumālié mo fakatuʻasinó. Naʻá ku ako mei he konifelenisi lahí te tau lava ʻo maʻu ha nonga ʻi heʻetau moʻui angatonú, fakafonu hotau lotó ʻaki e tuí, mo pukepuke ha fakakaukau taʻengata. Naʻe ueʻi au ke u tafoki kia Kalaisi ʻi he taimi ʻo e faingataʻá kae ʻoua ʻe fakafalala ki heʻeku mahino pē ʻaʻakú. ʻOku ou ʻiloʻi te u lava ʻo ikunaʻi e ngaahi ivi tākiekina ʻo e fakapoʻulí ʻaki haʻaku fekumi ki he ngingila ʻo e maama ʻa Kalaisí.
Olivia H., taʻu 17, Pelisiume