Ko ha Mana ʻi he Fale ʻo e ʻEikí ʻi Kīví
Doru Vasile
Pukalesi, Lomēnia
Tā fakatātā ʻa Allen Garns
Naʻá ku fiefia mo hoku fāmilí ke mau fononga kā mei Lomēnia ki Kiivi, ʻIukuleini, ki he fakatapui ʻo e temipalé ʻi ʻAokosi 2010. ʻI heʻemau ʻiloʻi ʻe hoko ʻeni ko e temipale ki he Kāingalotu ʻi he Misiona Lomēnia/Molotová, naʻa mau fononga ai ʻi ha meimei houa ʻe 14 ke aʻu ki ai. Ko e taimi ne mau aʻu atu aí, ne mau fetaulaki mo ha kulupu ʻe taha ne nau kau foki mo kinautolu ʻi he fononga mai mei Lomēniá. Naʻa mau fiefia kotoa ke ʻi Kiivi ke mau kau ki he meʻa toputapu ko ʻeni ne hokó.
ʻI he ʻaho ne fai ai ʻa e fakatapuí, naʻe vahe ʻemau kulupu mei Lomēniá ke mau mamata ki he fakatapuí ʻo fakafou ʻi ha fakamafola ʻi ha loki ʻi he fungavaka ʻuluaki ʻo e temipalé. Naʻe kamata ke fakahaaʻi ʻe ha niʻihi ʻenau loto-taʻefiemālié. Naʻa nau ʻamanaki ke kau mo e palōfitá ʻi he fakatapuí ʻi he loki silesitalé. Naʻe aʻu ʻo pehē ʻe ha niʻihi naʻe mei lava pē ke nau nofo ʻo mamata he fakamafolá mei he falelotu ʻi Lomēniá.
Naʻe kamata ke u lotu loto pē, “Tamai Hēvani, ʻe lava fēfē ke mau tokoni ki he kāingalotu mei Lomēniá ke nau maʻu ha aʻusia fakangalongataʻa ʻi Ho falé?”
Naʻe teʻeki ke u maʻu ha tali ʻi he taimi naʻe kamata ai ʻa e sēsini fakatapuí. Naʻe ʻikai fuoloa ne mau ʻiloʻi, ʻe hifo mai ʻa Palesiteni Tōmasi S. Monisoni (1927–2018), ʻo fokotuʻu ʻa e makatulikí ʻi hono tuʻuʻangá. Mahalo ko ʻemau talí ʻeni! Naʻá ku lotua ha founga ke meʻa mai ai ʻa e palōfitá ʻo feʻiloaki mo e Kāingalotu Lomēniá.
Naʻá ku lotu ʻo pehē, “ʻOku ʻikai ko haʻaku kole ʻeni maʻaku, ka maʻa hoku ngaahi kāingá.”
ʻI he hili e ouau ʻo e makatulikí, naʻe lue mai ʻa Palesiteni Monisoni ʻi homau veʻe lokí, ʻi heʻene foki ki he loki silesitialé. Fakafokifā pē, ne u ongoʻi ʻi hoku lotó ʻoku totonu ke u tuʻu ʻo fakaafeʻi ia ke ne hū mai ki homau lokí.
Naʻá ku tuʻu leva ʻo pehē, “ʻE homau palōfita! Meʻa mai ʻo vakaiʻi kimautolu. Ko kimautolú mei Lomēnia.”
Naʻe hangē naʻe ʻikai ke ne ongoʻi ʻeku leá. Ne hili ha momeniti mei ai, naʻá ne foki mai. ʻI heʻene hū mai ki he lokí, naʻá ne pehē mai, “Lomēnia!”
Naʻá ne fakafeʻiloaki kiate kimautolu kotoa peá ne pehē mai ʻokú ne ʻofa lahi ʻiate kimautolu. Naʻe fonu hoku lotó ʻi he fiefia ʻi heʻeku mamata ki he fofonga fiefia siʻomau kāingalotu ʻofeiná. Naʻá ku lotu ʻo pehē, “Mālō, ʻe Tamai ʻofa, koeʻuhí ko e mana ko ʻeni ʻi Ho falé.”
Ko e taimi naʻe mavahe ai ʻa e palōfitá mei he lokí, naʻe ʻikai ke toe loto-mamahi ha taha. Naʻá ku ongoʻi ne mau ʻi he loki monūʻia taha ʻi he temipalé. Ko ha aʻusia ia he ʻikai toe ngalo ʻiate au.