Kae ʻOua Ke Tau Toe Fakataha Mai
Ko ʻEtau Hikinima Poupoú
Mei ha lea ʻi he konifelenisi lahi ʻo ʻOkatopa 2005.
Ko ha konga lahi ʻo e fakahinohino fakalaumālié ʻoku makatuʻunga ia ʻi heʻetau fengāueʻaki lelei mo e … kau palōfitá, … kau tangata kikité, … mo e kau tangata maʻu fakahaá.
ʻOku ou fie lea fekauʻaki mo e ngaahi tuʻunga toputapu ʻo kinautolu ko e kau taki lakanga fakataulaʻeiki kuo “ui mo fili” (T&F 55:1) ke nau tataki ʻa e Siasí ʻi he kuonga ní. …
… Ko hoku Ngaahi Tokoua [ʻi he Kōlomu ʻo e Kau ʻAposetolo ʻe Toko Hongofulu Mā Uá], ko ha kau tangata lelei, fakaʻeiʻeiki, mo falalaʻanga, taʻe hano tatau. ʻOku ou ʻiloʻi honau lotó. Ko e kau tamaioʻeiki kinautolu ʻa e ʻEikí. Ko ʻenau fakaʻamú pē taha ke ngāue ʻi he honau ngaahi uiuiʻi maʻongoʻongá mo langa hake ʻa e puleʻanga ʻo e ʻOtuá he māmaní. Ko hotau Kau Taki ʻoku ngāue ʻi he kuonga mo e taimi ko ʻení, ʻoku fakamoʻoniʻi, siviʻi, pea mo moʻoni. … Ko honau lotó ʻoku maʻa, ko ʻenau aʻusiá ʻoku maʻongoʻonga, ko honau ʻatamaí ʻoku māsila, pea ko honau poto fakalaumālié ʻoku mātuʻaki loloto ʻoku hoko ai ia ko ha fakafiemālie ke te ʻi honau lotolotongá.
… [Ko e taimi naʻe ui ai aú, naʻe faleʻi au] ko e meʻa mahuʻinga taha ʻoku totonu ke u faí ko ʻeku uouongataha maʻu pē mo hoku kau Takí. … Ne hoko maʻu pē ia ko ha meʻa ne u fie fakahoko ʻaki e kotoa hoku lotó.
… Kuó u pehē ai ko e konga lahi ʻo e tataki fakalaumālié ʻoku makatuʻunga ia ʻi he uouangataha mo e Palesiteni ʻo e Siasí, kau Palesitenisī ʻUluakí mo e Kōlomu ʻo e Toko Hongofulu Mā Uá—ʻa ia kuo hikinimaʻi kotoa … ko e kau palōfita, kau tangata kikite, mo e kau tangata maʻu fakahā. ʻOku ʻikai te u ʻilo pe ʻe anga fēfē haʻatau feongoongoi kakato mo e Laumālie ʻo e ʻEikí ʻo kapau ʻoku ʻikai ke tau faaitaha mo e Palesiteni ʻo e Siasí mo e toenga ʻo e kau palōfitá, kau tangata kikité mo e kau tangata maʻu fakahaá. …
ʻOku ou naʻinaʻi atu ki he kāingalotu ʻo e Siasí ke mou poupouʻi ʻa e Palesiteni ʻo e Siasí, Kau Palesitenisī ʻUluakí, Kōlomu ʻo e Toko Hongofulu Mā Uá mo e toenga ʻo e Kau Taki Māʻolunga ʻo e Siasí, ʻaki ʻa e kotoa hotau lotó mo e laumālié. Kapau te tau fai ia, te tau tūʻuta ki ha taulanga malu. …
ʻOku fie maʻu foki ke tau tokoniʻi mo poupouʻi hotau kau taki fakalotofonuá he kuo “uiuiʻi mo fili” foki mo kinautolu. ʻE lava ke maʻu ʻe he mēmipa kotoa pē ʻo e Siasí ni ha faleʻi mei ha pīsope pe palesiteni fakakolo, palesiteni fakasiteiki pe fakamisiona, pea pehē ki he Palesiteni ʻo e Siasí mo hono kaungāngāué. Naʻe ʻikai kole ʻe ha taha ia ʻo e kau takí ni hano uiuiʻi. ʻOku ʻikai ha taha ia ʻe haohaoa. Ka ʻoku nau hoko ko e kau tamaioʻeiki ʻa e ʻEikí, naʻá Ne uiuiʻi kinautolu ʻo fakafou ʻi he niʻihi ʻoku ʻi ai ʻenau totonu ki ha tataki fakalaumālié. ʻOku ʻi ai e totonu ʻa e niʻihi kuo uiuiʻi, hikinimaʻi mo vaheʻí, ke nau maʻu ʻetau poupoú.