Pōpoaki mei he Kau Taki Fakaʻēliá

Heka Heʻenau Pasikalá

Fai ‘e ʻEletā Carl Maurer

Taimi ʻe niʻihi ʻoku tau fie maʻu ke tokoniʻi e niʻihi kehé ka ʻoku ʻikai fuʻu mahino feʻunga ʻa e meʻa ʻoku hoko ʻi heʻenau moʻuí ke ne fakatupu ha liliu. ʻE lava ke ola lelei ange ʻetau ala atu ʻo tokoniʻi ʻa e niʻihi kehé ʻi he taimi ʻoku tau tokangaʻi, ʻofa mo maʻu ʻa e mahinó, pea mo tataki kitautolu ʻe he laumālié.

Ko e hā ha ngaahi founga ʻe lava ke tau ngāue fakaetauhi lelei ange ai ki he kakai ʻoku tau tokangaʻí?

ʻOku akoʻi kitautolu ʻe Palesiteni Lāsolo M. Nalesoni (Fakataha Fakatakimuʻi ʻi he Konifelenisi Lahí, Māʻasi 2018) ‘i heʻetau ngāue fakaetauhi ʻi he founga ‘a e Fakamoʻuí “. . . ʻe fakaava ʻa e ngaahi matapaá, pea ʻe tāpuekina ai ʻa e kakaí. ‘E fakamoʻui ʻa e ngaahi lotó, pea fakamaʻamaʻa ʻa e ngaahi kavengá”.

ʻOku ou manatuʻi ha aʻusia ʻa ha faifekau fefine naʻá ne vahevahe mai ʻi ha tohi naʻá ne fai kiate au. Kuó ne hoko ʻo makehe kiate au maʻu pē.

Naʻe ngāue ʻa e faifekau ko ʻení mo hono hoá ʻi ha māhinaʻe fā mo e konga. Ko ha faifekau faivelenga, talangofua mo loto vēkeveke ‘a Sisitā Matiseni. Naʻá ne ngāue tōtōivi pea fiefia ke heka pasikala ke fakavaveʻi ia ki he ʻū ʻapoinimení.

Naʻe angaʻofa, fakafiefiemālie mo haʻu e hoa ʻa Sisitā Matisení mei ha kiʻi motu ʻi he Pasifikí.

Kimuʻa peá ne ʻalu ʻo ngāue fakafaifekaú, naʻe māmālie pē ʻa e moʻuí mo fiemālie ange. Ko ia, naʻe fie maʻu ha taimi ke ne anga ki he hoa mo Sisitā Matisení, ʻi heʻena ʻā pongipongiá, femoʻuekina ʻi he ngāue fakafaifekaú pea mo heka pasikala ʻi ha ngaahi feituʻu lalahi.

ʻI ha ʻaho ʻe taha lolotonga ʻena heka ki ha ʻapoinimeni, naʻe māmalie ange ʻi he angamahení ʻa hono hoá pea ne kamata ke ongoʻi ʻita ʻa Sisitā Matiseni. ʻI he fakaʻau ke ne toe ʻita angé naʻá ne kamata ke hiva lolotonga ʻene ʻaká—mo tatali ke feinga mai hono hoá. “Feinga ke u hangē ko Sīsū, Muimui Hono hala, Feinga ke ʻofa ki hoku hoa ʻi he meʻa kotoa pē”.

Hili ‘ene fanongo ki ha toe ngaahi lāunga, naʻe fakakaukau loto ʻa Sisitā Matiseni, ʻoku ʻikai pē te ne fie fai e ngāué ʻi heʻeku foungá. Hili ʻena fononga ʻi ha meimei kilomita ʻe taha, naʻe faifai pea tuʻu hono hoá pea ne kaila, “ʻE Sisitā Matiseni . . . TE U MATE!”

Naʻe tafoki ʻa Sisitā Matiseni pea ʻi he loto mamahi lahi naʻá ne pehē atu, “Sai, ʻomi kiate au hoʻo pasikalá, pea ke kiʻi heka heʻeku pasikalá!” Naʻá ne ongoʻi loto fakatōkilalo moʻoni ʻi he taimi pē ko iá. Naʻe loka ʻa e taʻofi ʻo e vaʻe muí pea ʻikai lava ke fakahomohomo. Naʻá ne pehē, “Naʻe ʻikai te u lava ʻo ʻaka ʻi ha mita ʻe 100 ʻi heʻene pasikalá! pea ko ʻeni ne u toho mai ia ʻi ha meimei kilomita ʻe taha.” ‘Oku ou ofo ʻi heʻene kei lava ke ʻaka mamaʻo peheé”.

Naʻe toki fakakaukau ʻa Sisitā Matiseni ʻo pehē, “Kuo ʻikai ke u haohaoa ʻi he taʻu ʻe 10 kuohilí (talu ʻeku foki mai mei he malaʻe ngāue fakafaifekaú) kae talu mei he mōmeniti ko iá kuó u feinga ke hoko ia ko e konga ʻo ʻeku moʻuí ke ‘heka he pasikala ʻa ha taha kehe’ ‘i he taimi naʻá ku feinga ke mahino kiate au ʻa e fie maʻu ʻa e niʻihi kehé”.

Ko e hā ʻoku fakamamafaʻi ʻe he aʻusia ko ʻení kiate kitautolu pea ʻe founga fēfē haʻatau ngāue fakaetauhi ʻi he founga ʻa e Fakamoʻuí?

• Kumi ha ngaahi founga ke fakatupulaki ai ʻetau tokanga ʻi he anga faka-Kalaisí ki he niʻihi kehé. ʻOku ʻuhinga ʻeni ko ʻetau maʻu ʻa e ʻilo mo e mahino ki heʻenau ngaahi fie maʻu fakalaumālié mo fakatuʻasinó fakatouʻosi. ʻI heʻetau lotu ke maʻu ha ngaahi ʻulungaanga faka-Kalaisi mo fakatupulaki ʻi he tuí, faivelengá, faʻa kātakí mo e kātaki fuoloá (ʻAlamā 32:41–43), ‘oku tau lava lelei ange ai ke ngāue ʻo hangē ko e Fakamoʻuí.

• ‘E lava ke tau lotua ha tataki fakalaumālie. Feinga ke mahino pea vakai ki he ngaahi fie maʻu ‘a kinautolu ʻokú ke ngāue fakaetauhi ki aí. Lotua ha ngaahi founga ke faitāpuekina ʻEne fānaú ke tokoni ke nau moʻui ʻaki ʻa e ongoongoleleí mo moʻui fakafalala pē kiate kinautolu ʻo lahi ange. Mahalo he ʻikai maʻu fakaʻangataha ʻa e ngaahi ueʻi ko ʻení ka ʻe hoko mai ʻi heʻetau hokohoko atu ke lotu, fakalaulauloto mo muimui ki he ngaahi fakakaukau ʻe haʻu kiate kitautolú.

• ‘E lava ke tau fehuʻi, vakaiʻi pea fakafanongo. ʻE lava ke tau feau ʻa e ngaahi fie maʻu moʻoní ki muʻa ʻaki ʻetau tokanga feʻunga ke fai ha ngaahi fehuʻi kuo ueʻi kitautolu ki aí, ʻeke pe ʻoku nau ongoʻi fēfē pea vakai mo fakafanogo. Kuo pau ke tau “. . . tangi fakataha mo kinautolu ʻoku tangí; ʻio, pea fakafiemālieʻi ʻa kinautolu ʻoku ʻaonga ki ai ʻa e fakafiemālié” (Mōsaia 18:9).

• Ngāue ke feau ʻa e ngaahi fie maʻú. ʻI heʻetau ngāue fakaetauhí, ʻoku tau “fakapapauʻi ʻo fakafou ʻi he fetuʻutakí mo e ueʻi fakalaumālié ʻa e tuʻo lahi pea mo e faʻahinga fetuʻutaki ʻoku [tau] maʻu mo kinautolu te [tau] tokangaʻí” (Ngāue Fakaetauhí, Ngaahi Fehuʻi ʻoku Lahi Hono ʻEké).

ʻI he hokohoko atu ʻetau feinga ke hangē ko hotau Fakamoʻui ko Sīsū Kalaisí ʻi he fetauhiʻakí, te Ne tokoniʻi kitautolu. ‘Okú Ne fakaafeʻi kitautolu ke tau hoko ʻo hangē pē ko Iá (Mātiu 5:48). ʻOkú Ne tokaimaʻananga e kotoa ʻo ʻEne fānau fuakavá, ʻo faʻa fakafou ʻiate kitautolu. ʻOku ʻomi ʻe he Fakalelei ʻa Sīsū Kalaisí ʻa e mālohi ʻoku tau fie maʻu ke ne tāpuakiʻi kitautolú ʻi heʻetau ala atu ʻo faitāpuekina e niʻihi kehé. ‘Oku finangalo ʻa e Fakamoʻuí ke tau ʻiloʻi ʻa e founga ke tau feʻofaʻaki moʻoni aí.

‘Oku ou lotua ke tau fai ha meʻa lahi ange ke mahino kiate kitautolu ʻa e kotoa ʻo e fānau ʻa e ʻOtuá, ke Heka heʻenau Pasikalá ʻi heʻtau ngāue fakaetauhi ke feau e ngaahi fie maʻú. ʻI heʻetau fai ʻení te tau mamata ki he tupulaki ʻa e tui ʻi he Tamai Hēvaní mo Sīsū Kalaisi mo ʻEne Fakaleleí, ʻa ia ʻoku fakamālohia ai ha niʻihi fakafoʻituitui mo e ngaahi fāmilí ʻo fakafou ʻi he ngaahi ouaú mo e ngaahi fuakavá. (T&F 20:47, 53; Tohi Tuʻutuʻuni Fika 2, 9.1.1.).