Founga ʻe 5 ke Ako ai mei he Konifelenisi Lahí
Ko e konifelenisi lahí ko ha faingamālie fakaofo ia ke kau fakataha ai mo e kāingalotu ʻo e Siasí he funga ʻo e māmaní ʻi he fanongo ki he kau taki ʻo e Siasí mo maʻu fakahinohino mei he ʻEikí. ʻE hoko hoʻo mamata, fakafanongo, pea mo hoʻo ako e ngaahi pōpoaki ʻo e konifelenisi lahí ke ke maʻu ai ʻa e Laumālié ʻi hoʻo moʻuí pea tokoni ke fakamālohia hoʻo fakamoʻoní. Ko ha faingamālie ia ke ke maʻu ai mo ngāueʻi e fakahā fakafoʻituituí.
Ko ha founga ʻeni ʻe nima te ke lava ai ʻo ako mei he konifelenisi lahí.
1. Hiki hoʻo ngaahi fehuʻí kimuʻa pea toki kamata ʻa e konifelenisi lahí
Tuku ha taimi ke ke hiki ai hoʻo ngaahi fehuʻí kimuʻa pea toki kamata ʻa e konifelenisí, pea tokanga ki he ngaahi tali te ke maʻu he lolotonga ʻo e konifelenisí. ʻE lava ke tali hoʻo ngaahi lotú mo e fehuʻí ʻi hoʻo kau mo fakafanongo ki he Laumālié.
2. Fekumi ke ako ʻia Kalaisi
Toʻo mei he Kalaisi mo e Talavou Koloaʻiá, tā ʻe Heinrich Hoffmann.
ʻOku fakamoʻoni mo akoʻi ʻe he kau palōfitá fekauʻaki mo e Fakamoʻuí (vakai, Ngāue 10:43). ʻI hoʻo fanongo ko ia ki he ngaahi pōpoaki ʻo e konifelenisi lahí, te ke lava ʻo fakakaukau ki he meʻa ʻoku akoʻi atu ʻe he kau leá fekauʻaki mo Sīsū Kalaisí. Te ke lava foki ke fokotuʻu ha lisi ʻi hoʻo kiʻi fakamatalá.
3. Fakatokangaʻi ʻa e ngaahi kaveingá
Ngaahi ʻatá mei he Getty Images; tā ʻo e talavou ʻi he funga moʻungá mei he Joshua Earle/Unsplash
Ka hili haʻo mamata ʻi ha niʻihi ʻo e konifelenisi lahí, te ke ala fakatokangaʻi ne ke fanongo ki ha tefito pe kaveinga ne lea ʻaki tuʻo ua pe lahi ange. Ko e ngaahi sīpinga ʻokú ke fakatokangaʻí mahalo ko e taha ia ʻo e founga ʻoku tokoni atu ai ʻa e Laumālié ke ke fakatokangaʻi ha faʻahinga meʻa ke ke ako.
4. Fakatokangaʻi e Tohi ʻa Molomoná
Te ke lava ʻo ako ha meʻa lahi ka ke tokanga ki he ngaahi potufolofola ʻoku ngāue ʻaki ʻe he kau taki ʻo e Siasí, tautautefito ki he Tohi ʻa Molomoná, he ko e “maka-tuʻu-loto ia ʻo ʻetau tui fakalotú” (Talamuʻaki ki he Tohi ʻa Molomoná). Feinga angé pe te ke lava ʻo muimuiʻi e tuʻo lahi hono fakaʻaongaʻi ʻi he konifelenisi lahí. Te ke ofo ʻi he meʻa te ke ʻiló!
5. ʻAi ke ke loto ʻaki mo ueʻi koe ke ke ngāue
Hiki ʻa e ngaahi pōpoaki mo e kupuʻi lea ʻokú ne ueʻi pe fakaafeʻi koe ke ke ngāué. ʻE lava ʻo tokoni ʻeni ke ke fakaʻaongaʻi ʻa e meʻa ʻokú ke akó—mo tokoni ke ke manatuʻi ʻamui ange hoʻo ngaahi fakakaukaú ʻi he taimi ʻe fie maʻu ai ke fakamanatu atú!