Ko ha Tāpuaki ʻi he Tohinima ʻa ʻEku Faʻeé
Douglas Hedger
Nevata, USA
Tā fakatātaaʻi ʻe Dilleen Marsh
Naʻá ku fakalaulauloto ʻi ha efiafi ʻe taha pe ko e hā ha pōpoaki te u fai ʻi he konifelenisi fakauooti ne hanganaki maí. Kuó u ako e folofolá ʻi he uiké kotoa, pea neongo ne u maʻu ha fakahinohino lelei pea mo ha ʻilo, ka naʻe teʻeki ke u maʻu ha fakahinohino mahino ki he meʻa naʻe finangalo e ʻEikí ke u vahevahe, ko e palesiteni fakasiteikí, ki he kāingalotu ʻo e uōtí.
ʻI ha lotu fakamātoato, naʻá ku kole ai ha fakahinohino mei he Laumālié ke Ne tataki ʻeku fakakaukaú. Hili iá ne u fakaava leva ʻa e folofolá ʻo kamata ke u toe lau ia. Naʻe ʻalu ʻeku fakakaukaú he taimi pē ko iá ki he ngaahi taumuʻa ngāue ʻa e uōtí naʻá ku toki talanoa ki ai mo e pīsopé kimui ní. Ko e taha ʻo e ngaahi taumuʻa ko iá ke ngāue ʻaki ʻa e Malanga ʻaki ʻEku Ongoongoleleí ʻi he vahevahe ʻo e ongoongoleleí mo e ngaahi kaungāmeʻá mo e kaungāʻapí.
Naʻe ueʻi fakalaumālie au ke u fakakau ʻa e Malanga ʻaki ʻEku Ongoongoleleí ʻi heʻeku ako he efiafi ko iá. Naʻá ku toʻo leva hano tatau ʻo huke ki ha faʻahinga peesi pē. Naʻá ku maʻu ʻi he peesi ko ʻení ha ongo fakamoʻoni fakafolofola naʻe tohinima—1 Nīfai 8:8–11 mo e 1 Nīfai 11:21–22. Naʻá ku fakatokangaʻi ʻi heʻeku vakavakaiʻi fakalelei hifó ko e ongo fakamoʻoni folofolá ni naʻe hiki ia ʻi he tohinima ʻo ʻeku faʻeé. Naʻe mālōlō siʻeku faʻē ʻofá ʻi ha ngaahi taʻu siʻi kimuʻa atu, ʻi he hili pē ha māhina ʻe ua mei hono taʻu 80. Naʻá ne hoko ko e faʻifaʻitakiʻanga ʻo e lototoʻá mo e taʻesiokitá, naʻá ne sio maʻu pē ki he lelei ʻa e kakaí. Pea naʻá ne manako ʻi he folofolá.
Naʻá ku fakaava ʻa e tohi folofolá ki he ongo veesi ko ʻení ke u ʻiloʻi pe ko e hā e meʻa ne ueʻi ia ke ne hiki iá. Ko e taimi naʻá ku lau ai iá, naʻe ʻalu ʻeku fakakaukaú ʻi he taimi pē ko iá ki he pōpoaki ʻoku totonu ke u faí. Ko ha pōpoaki nounou ʻeni ʻe ala ngalo he taimi ʻe niʻihi ʻi he kāingalotu ʻo e Siasí kuo nau ʻosi kai ʻi he fua huʻamelie ʻo e ongoongoleleí, ʻoku ʻi ai mo ha tokolahi kehe ʻoku nau fekumi ki he fua tatau pē ko iá. ʻOku fie maʻu ke tau ala atu ʻo talaange ʻa e feituʻu ke maʻu ai iá.
Naʻá ku fakakaukau ki heʻeku faʻē ʻofá ʻi heʻeku vakai ki he toenga ʻo e Malanga ʻaki ʻEku Ongoongoleleí. Naʻe ʻikai ha hingoa, ʻikai mo ha toe fakamatala, pe ha toe meʻa ke fakahaaʻi ko e tohi ʻeni ʻaʻana. Naʻá ku tangutu moʻutāfuʻua ʻi heʻeku fakakaukau ki he hokohoko ʻo e ngaahi ueʻi fakalaumālie naʻe tataki mai ki he momeniti ko ʻení. Naʻe fakapapauʻi mai ʻe he Laumālié kiate au naʻe tataki au ʻe heʻeku ngaahi fakakaukaú, ʻo hangē pē ko e meʻa naʻá ku lotuá. Ka naʻe ʻikai lavelaveʻiloa ʻe heʻeku fineʻeikí ʻi he ngaahi taʻu lahi kimuʻa naʻá ne hiki ai ʻa e ongo fakamoʻoni fakafolofola ko ʻení, ʻe fakaʻaongaʻi ia ʻe he ʻEikí ko e tali ki he lotu fakatōkilalo ʻa ʻene tamá.