“Te u lava fēfē ke fakaafeʻi ʻa e Laumālié ki hoku ʻapí ʻi he taimi ʻoku kē pe fakafekiki ai ʻa e kakaí?”
Kole Fakamolemole
Kuó u fakatokangaʻi ko e taimi ʻoku hoko ai ha fakafekiki, ʻoku tokoni ʻa e kole fakamolemolé mo e fakahā ange ʻokú ke halá ke fakafoki mai ʻa e melinó ki ha loki, neongo ai pē kapau ʻokú ke pehē pe ʻiloʻi ʻokú ke tonu koe. Hili iá peá ke mavahe, fakalongolongo, liliu ʻa e tefitó, pe kumi ha faʻahinga meʻa ke mou felotoi ai. ʻOku ʻikai fie maʻu ha taimi lōloa ke fakafoki mai ai ʻa e Laumālié.
Tīlani M., taʻu 15, Kalefōnia, USA
ʻOfa Pē
Kuó u fakatokangaʻi ʻoku hoko hono fakahaaʻi ha ʻofa haohaoa ki hoku fāmilí ke fakaafeʻi ai ʻa e Laumālié ke nofoʻia homau ʻapí. Naʻe lea ʻa e palōfitá kau ki he ʻofá ko ha meʻa ia ʻokú ne fakatupu ha liliu pea mo e lolo faitoʻo ʻokú ne fakamoʻui e laumālié. ʻOku ʻomi ʻe ha laumālie ʻo e ʻofá ʻa e malu mo e melino ki he ʻapí.
Siosefa C., taʻu 18, ʻAlesona, USA
Talanoa ki Hoʻo Fāmilí
Kapau ʻoku ʻikai mēmipa ho fāmilí he Siasí, talaange ʻa e ʻikai ke ke fiemālie ʻi he taimi ʻoku nau fakafekiki aí pea kole ange ke fakaleleiʻi. Kapau ʻoku ʻikai ola lelei ia, lotu pea toe feinga pē. Kapau ʻoku nau mēmipa he Siasí, fakamanatu ange ko e fānau kinautolu ʻa e ʻOtuá pea ʻoku totonu ke nau fakaʻehiʻehi mei he keé.
Kalolina S., taʻu 19, Koiasi, Palāsila
Lotua e Laumālié
Ko e taimi pē ʻoku fakafekiki ai ʻa e fāmilí, ʻoku faingataʻa ke ongoʻi ʻa e Laumālié, ka ʻoku ʻikai ʻuhinga ia he ʻikai ke ke lava ʻo ongoʻi kapau ʻokú ke moʻui taau. Fai haʻo lotu ʻi ho lotó ke maʻu lahi ange ʻa e Laumālie ʻo e ʻEikí pea tokanga makehe ki he ueʻi ʻoku fai maí. ʻE lava ʻe he Tamai Hēvaní ʻo tokoniʻi koe ke ke ongoʻi ha nonga mo ʻiloʻi e founga lelei taha ke ʻomi ai ʻa e nonga ko iá ki homou ʻapí.
Keiti G., taʻu 17, ʻIutā, USA
Feinga ke Ngāue Fakataha
Talanoa mo ho fāmilí ke fakaleleiʻi ʻa e palopalemá ʻi ha founga ʻe lelei ki he taha kotoa, pe vahevahe ha potufolofola pe hivaʻi ha himi. Te ke lava foki ke kolea e tokoni ʻa e Tamai Hēvaní ke solova ʻa e palopalemá. ʻI he foungá ni, ʻe nonga hifo ʻa e taha kotoa mo lava ke fakaleleiʻi ʻa e palopalemá ʻo ʻikai fie maʻu ke fai ha kaikaila pe fakamamahi. ʻE fakafonu moʻoni ʻe he Laumālie Māʻoniʻoní ʻa e taha kotoa ʻaki ha nonga mo foaki ki he taha kotoa ha loto-holi ke ʻoua ʻe toe kē.
Luisi F., taʻu 14, Peliā ti Kameni, Mekisikou