Kalapu Lau Tohi ʻa Molomoná

Kau mai ʻaki hano lau e Tohi ʻa Molomoná! Te ke lava ʻo laukonga ʻiate koe pē, fakataha mo ho fāmilí, pe mo ha kaungāmeʻa. ʻOmai hao laʻitā hoʻo lau e Tohi ʻa Molomoná pea fakamatala mai ha meʻa kuó ke ako pe talanoa ʻokú ke manako taha ai ʻi he Tohi ʻa Molomoná. ʻOmi ia ʻi he liahona.lds.org (lomiʻi e “Submit an Article”).

Ko e potu folofola ki he māhina ní: Molonai 10:4

“… Pea kapau te mou kole ʻi he loto-fakamātoato, mo e loto-moʻoni, ʻo maʻu ʻa e tui kia Kalaisi, te ne fakahā ʻa hono moʻoní kiate kimoutolu, ʻi he mālohi ʻo e Laumālie Māʻoniʻoní.”

ʻOku maʻu ʻa e talanoa ʻoku ou manako taha ai mei he Tohi ʻa Molomoná ʻi he 3 Nīfai 17, pea ʻoku fekauʻaki ia mo hono tāpuakiʻi ʻe Sīsū ʻa e fānaú. ʻOku ou saiʻia ʻi he talanoá koeʻuhí ʻoku fakamatala ai hono lahi ʻo e ʻofa ʻa Sīsū mo e Tamai Hēvaní ʻiate kitautolú. ʻOku lava ke u kau mo e fānaú, pea ʻoku ou fakakaukauloto ʻoku ou tuʻu ai.

Pāpola J., taʻu 11, Lepālulika Sekí

ʻOku ou saiʻia ʻi he Tohi ʻa Molomoná he ko ha tohi ia ʻoku moʻoni. Naʻe tohi ia ʻe he kau palōfitá. ʻOku tokoni mai ke u fili ʻa e totonú, pea ko e taimi ʻoku ʻi ai ai haʻaku palopalemá, ʻokú ne tokoni mai. ʻOku ou tui ki ai.

Seisoni S., taʻu 10, Mahalasitulā, ʻInitia