Tumana ang Akong mga Sugo
Nakahunahuna ba kamo, “Unsaon nako sa pagpakita sa akong Langitnong Amahan nga ako gusto gayud nga Siya motubag sa akong mga pag-ampo ug mopanalangin kanako?” Ang Manluluwas nga si Jesukristo mihatag nato sa yawe sa dihang Siya miingon, “Kon nahigugma kamo kanako, inyong pagatumanon ang akong mga sugo” (Juan 14:15).
Sa laing mga pulong, gipakita nato ang atong gugma sa Langitnong Amahan pinaagi sa pagtuman sa Iyang mga sugo.
Usahay ang mga tubag dili moabut kanus-a o sa atong gipaabut, ug kita mahimong matintal sa pag-undang o paghunong sa pagkamasulundon. Apan kon kita mapailubon ug maminaw, ang Ginoo motubag sa Iyang kaugalingong panahon ug paagi. Kanunay siyang motubag sa matarung nga mga pag-ampo. Kanunay Siyang mopanalangin sa pagkamasulundon (tan-awa sa Mosiah 2:21–24).
Ang kalibutan nagtudlo nga ang gugma walay mga responsibilidad. Apan ang kaatbang niini tinuod usab. Ang atong gugma sa Dios gipakita pinaagi sa atong pagkaandam ug kakugi sa pagtuman sa Iyang mga sugo.
Si Jesus mitudlo, “Ang kamatuoran magahatag kaninyog kagawasan” (Juan 8:32). Si propeta Alma dugang nga mipahayag, ang “pagkadautan dili gayud mahimo nga kalipay” (Alma 41:10). Ug pinaagi ni Propeta Joseph Smith, ang Ginoo mitudlo, “Adunay usa ka balaod, nga dili mausab nga sugo didto sa langit sa wala pa ang mga katukuran niini nga kalibutan, nga diha ang tanan nga mga panalangin gipasikad—ug kon kita makadawat og bisan unsa nga panalangin gikan sa Dios, kini tungod sa pagsunod niana nga balaod diin diha kini gipasikad” (D&P 130:20–21).
Ang kalipay, mga panalangin, ug giya gikan sa pagkamasulundon. Ang Langitnong Amahan gusto nga kamo magmalipayon ug gawasnon tungod kay Siya nahigugma kaninyo, ug mao nga Siya mihatag og mga sugo. Sa pagpangita og kalinaw nga dili makita sa kalibutan, kinahanglan nga kita makat-on nga ang pagtugyan ngadto sa kabubut-on sa Langitnong Amahan mao ang bugtong paagi ngadto sa kalipay.
Ang Langitnong Amahan gusto nga kamo makakaplag og mahangturong kalipay. Ang Iyang mga propeta gusto nga kamo makakaplag og kalipay nga dili masukod. Gusto kami nga kamo makakaplag og kalinaw nga atong makita sa pagsunod sa Manluluwas. Maglakaw sa dalan nga Iyang gipakita (tan-awa sa “Lord, I Would Follow Thee,” Hymns, nu. 220). Pilia nga mahimong masulundon. Ang inyong pagkaandam sa pagkamasulundon mosangpot ngadto sa tinuod nga kagawasan ug kalipay.