E Tele Mea e Manuia ai
O le tele o faamanuiaga e finagalo le Atua e foai mai ia i tatou e manaomia ai le faatinoga i la tatou vaega—o faatinoga e fua i lo tatou faatuatua ia Iesu Keriso.
O’u uso e ma tuafafine pele, e finagalo lo tatou Tama Faalelagi ma Iesu Keriso e faamanuia i tatou taitoatasi.1 O le fesili pe faapefea ona ulu atu ma maua na faamanuiaga ua avea ma mataupu o finauga ma talanoaga faalelotu mo le tele o seneturi.2 E finau nisi o faamanuiaga ua na o le faia o se mea e maua ai; ua na o a tatou galuega e maua ai. E finau isi ua uma lava ona filifilia e le Atua po o ai o le a Ia faamanuiaina ma pe faapefea foi—ma o nei faaiuga e le masuia. O manatu uma ia e lua e sese faalefaavae. O faamanuiaga mai le lagi e lē maua foi pe a faaputuputu ia tele ni “taui o galuega lelei” pe faatalitali ma le leai o se faamoemoe se’i vaai pe tatou te malo i le loto. Leai, o le upumoni ua sili ona faailoa i se isi uiga ae sili atu ona talafeagai mo le sootaga i le va o se Tama Faalelagi alofa ma Ona suli faamoemoeina—o tatou. O upumoni toefuataiina ua faaalia ai o faamanuiaga e lē tau faia se mea ia maua ai, ae o faatinoga e uunaia e le faatuatua i la tatou vaega, i mea tatou te muai faia ma faifai pea, e taua.3
A o tatou iloiloina pe faapefea ona tatou mauaina faamanuiaga mai le Atua, se’i o tatou faatatauina faamanuiaga faalelagi i se faaputuga tele o fafie. Vaai faalemafaufau i le ogatotonu o i ai se tamai faaputuga fasilaau ninii e matamata ai le afi, o loo fatufatu ai i luga ni fasi laau feololo. Ona sosoo ai lea ma fafie, o tamai ogalaau, ma mulimuli o ogalaau lapopoa. Ua i ai i lenei faaputuga laau le tele o fafie mago, e mafai ai ona maua le malamalama ma le vevela mo le tele o aso. Vaai atu i talaane o le faaputuga fafie o loo i ai se laau afitusi se tasi, le ituaiga lea e i ai le ōne i le tumutumu.4
Ina ia tatala mai le malosiaga o i le faaputuga fafie, e manaomia ona tosiina le afitusi ma faamumu ai fasilaau ninii. O le a vave lava ona ‘apo e fasilaau ninii le afi ma mafua ai loa ona mu fafie lapopoa. O le taimi lava e amata ai ona talalī le afi lea, e faaauau pea seia oo ina mu uma fafie pe faasolo foi ina leai se okesene i le afi.
O le tosiina o le afitusi ma le faamuina o fasilaau ninii o ni faatinoga iti e mafai ai ona tatala mai le malosiaga ua faamoemoeina mai fafie.5 Seiloga lava la e tosi le afitusi, e leai a se mea e tupu, e tusa lava po o le a le telē o le faaputuga fafie. Afai e tosi le afitusi ae le tutuina ai fasilaau ninii, o le tele o le malamalama ma le vevela e faamatuu mai e le afitusi lava ia, ua na o sina mea ma o le malosiaga mai le musaesae o fafie o le a le faamatuu maia. Afai e lē o i ai se sapalai o le okesene i soo se tulaga, e taofia le mu o le afi.
I se ala talitutusa, o le tele o faamanuiaga a le Atua e finagalo e foai mai ia i tatou e manaomia ai le faatinoga i la tatou vaega—o faatinoga e fua i lo tatou faatuatua ia Iesu Keriso. O le faatuatua i le Faaola o se mataupu faavae o le faatinoga ma le mana.6 Muamua tatou te faatino i le faatuatua; ona oo mai lea o le mana—e tusa ma le finagalo ma le taimi a le Atua. E taua le faasologa.7 E ui i lea, o le faatinoga manaomia e laitiiti lava pe a faatusa i faamanuiaga tatou te maua mulimuli ane.8
Mafaufau i le mea na tupu i gata ūogo felelei na oo mai ia Isaraelu anamua i luga o le ala i le nuu folafolaina. O le ū a se gata ūoga sa lamatia. Ae o le tagata ua ūina na mafai ona faamaloloina e ala i le vaai atu i se gata apamemea na fausia e Mose ma tuu i luga o se pou.9 O le a le tele o le malosi e manaomia e vaai ai i se mea? O i latou uma na vaai sa mauaina mana o le lagi ma sa faamaloloina. O isi tagata Isaraelu sa ūina na lē vaai i le gata apamemea ma feoti ai. Masalo sa leai so latou faatuatua e vaai atu ai.10 Masalo sa latou lē talitonu o se faatinoga faigofie faapena na mafai ona maua ai le faamalologa folafolaina. Pe masalo foi sa latou faamaaaina ma le loto i ai o latou loto ma teenaina le fautuaga a le perofeta a le Atua.11
O le mataupu faavae e faamatuā’ia ai faamanuiaga e tafe mai le Atua, e faavavau. E pei o na Isaraelu anamua, e tatau foi ia i tatou ona faatino lo tatou faatuatua ia Iesu Keriso ina ia manuia ai. Ua faaali mai e le Atua e faapea “e i ai se tulafono na folafola lē maaveesea i le lagi i luma atu o le faavaega o le lalolagi lenei, ua faavae ai i luga faamanuiaga uma—ma a tatou maua se faamanuiaga mai le Atua, e maua i le usiusitai i lena tulafono ua faavae ai i luga.”12 I le ta’ua ai o lena mea, e te lē tau faia se mea ia maua ai se faamanuiaga—e sese lena manatu—ae e ao ona e agavaa mo lena faamanuiaga. O lo tatou faaolataga ua na o galuega ma le alofa tunoa o Iesu Keriso e oo mai ai.13 O le lautele o Lana taulaga togiola o lona uiga o faamanuiaga e lē mafuatia; o a tatou faatinoga iti e le faatusalia i Lana taulaga. Ae le faapea e leai se tau, ma leai se taua; i le pogisa, o se laau afitusi e tutuina e mafai ona iloa mai maila e tele. O le mea moni, e mafai ona iloa mai le lagi ona o nai faatinoga iti o le faatuatua e manaomia e maua ai folafolaga a le Atua.14
Ina ia maua se faamanuiaga manaomia mai le Atua, faatino le faatuatua, e faagaoioia ai le malosiaga faalelagi lea e faalagolago i ai le faamanuiaga. Mo se faataitaiga, o se tasi o faamoemoega o le tatalo, o le faamautuina o faamanuiaga ua finagalo le Atua e to mai, ae e faalagolago i lo tatou ōle atu iai.15 Sa tagi atu Alema mo le alofa mutimutivale, ma na aveesea ona tiga; sa le’i toe lagā atuatuvaleina o ia i le manatuaina o ana agasala. Sa lofituina e lona olioli ona tiga—o ia mea uma ona sa ia tagi atu ma le faatuatua ia Iesu Keriso.16 O le malosiaga ola e manaomia mo i tatou, o le lava lea o le faatuatua ia Keriso e ōle atu ai ma le faamaoni i le Atua i le tatalo ma talia Lona finagalo ma [Lana] taimi mo le tali.
O le tele o taimi, o le malosiaga ola e manaomia mo faamanuiaga e manaomia ai le sili atu nai lo le tau na ona vaai atu pe ōle atu: o faatinoga e tumu i le faatuatua e faifai pea ma faisoo, e manaomia. I le ogatotonu o le seneturi 19, sa faatonu ai e Polika Iaga se vaega o le Au Paia o Aso e Gata Ai ia ō e vaavaai ma nofoīa Arisona, o se itulagi toāfa i Amerika i Matu. Ina ua taunuu i Arisona, sa leai se vai a le vaega ma sa popole ne’i latou fano. Sa latou aioi atu i le Atua mo se fesoasoani. Sa le’i pine ae to mai timuga ma le kiona, na mafai ai ona latou faatumuina a latou paelo i vai ma faainu ai a latou manu. I le lotofaafetai ma le faafouina, sa latou toefoi atu i le Aai o Sate Leki ma le olioli i le agalelei o le Atua. Ina ua latou taunuu, sa latou lipoti atu faamatalaga o le latou malaga ia Polika Iaga ma tautino atu le latou faaiuga e faapea e le mafai ona faato’a Arisona.
Ina ua faalogo atu i le lipoti, sa fesili atu Polika Iaga i se alii i totonu o le potu po o le a sona manatu e uiga i le malaga ma le vavega. Sa tali sa’o mai lena alii, o Daniel W. Jones, “Semanu e toe faatutumu a’u vai, toe alu, ma toe tatalo foi.” Sa tuu e Uso Polika lona lima i le tauau o Uso Jones ma fai atu, “O le tagata lenei o le a taitaia le isi malaga e sosoo ai i Arisona.”17
E mafai ona tatou manatua uma ni taimi na tatou tulei ai pea i luma ma toe tatalo foi—ma maua ai faamanuiaga. O aafiaga o Michael ma Marian Holmes ua faaalia ai nei mataupu faavae. Sa ma auauna faatasi ma Michael o ni Fitugafulu Eria. Sa faagaaetia lava a’u i soo se taimi e valaauina ai o ia e tatalo i a matou fonotaga ona sa iloagofie lava le loloto o lona faaleagaga; sa ia iloa le auala e talanoa ai ma le Atua. Ou te fiafia lava e faalogo o ia tatalo. E ui i lea, i le popofou o le la ulugalii, sa le’i tatalo pe auai Michael ma Marian i le lotu. Sa pisi i la’ua i le la fanau laiti e toatolu ma se kamupani konekarate faamanuiaina. Sa le’i lagona e Michael o ia o se tagata lotu. I se tasi afiafi, sa alu atu ai le la epikopo i le la fale ma faamalosiau ia i la’ua ia amata ona tatalo.
Ina ua aluese le epikopo, sa tonu ia Michael ma Marian o le a la taumafai e tatalo. A o le’i momoe, sa la tootutuli i talaane o le la moega, ma le lē toafimalie, sa amata tatalo Michael. I le mavae ai o ni nai upu uiga ese o le tatalo, sa tu faafuasei i luga Michael, ma faapea atu, “Marian, e lē mafai ona ou faia lenei mea.” A o ia tu ai ma amata savali ese, sa uu mai e Marian lona lima, toso mai o ia i lalo i ona tulivae, ma fai atu, “Mike, e mafai ona e faia. Toe taumafai!” I lea faamalosiauga, sa maea ai se tatalo puupuu a Michael.
Sa amata ona tatalo soo le au Holmes. Sa la talia le valaaulia a se tuaoi e auai i le lotu. A o latou savavali atu i le falesa ma faalogo atu i le viiga amata, sa musumusu atu le Agaga ia i latou, “E moni lenei mea.” Mulimuli ane, sa aunoa ma le vaaia pe talosagaina, sa fesoasoani ai Michael e ao le lapisi mai le falelotu. A o ia faia, sa ia lagonaina se uunaiga manino, “O Lo’u fale lenei.”
Sa talia e Michael ma Marian ni valaauga i le Ekalesia ma auauna atu i le la uarota ma le siteki. Sa faamauina i la’ua i le tasi ma le isi, ma sa faamauina le la fanau e toa 3 ia i la’ua. Sa mulimuli mai nisi fanau, ma atoa ai le 12. Sa auauna atu faatasi le au Holmes o se peresitene o le misiona ma se soa—e faalua.
O le uluai tatalo uiga ese, o se tatalo laitiiti ae o se faatinoga sa tumu i le faatuatua lea na minoi ai faamanuiaga o le lagi. Sa fafagaina e le au Holmes le afi o le faatuatua e ala i le auai i le lotu ma auaunaga. O lo la tuuto atu i le avea ai ma soo i le aluga o tausaga na taitai atu ai i se faatuatua musaesae lea o loo uunaia pea e oo mai i lenei aso.
Peitai, e tatau ona maua e se afi se sapalai tumau o le okesene ina ia i’u ai ina tatala mai e fafie lona gafatia atoa. E pei ona faaalia e Michael ma Marian Homes, o le faatuatua ia Keriso e manaomia ai faatinoga faifai pea ina ia faaauau ai pea ona musaesae. O a tatou faatinoga laiti e fafagaina lo tatou tomai e savavali ai i luga o le ala o feagaiga ma taitai atu ai i faamanuiaga silisili e mafai ona ofo mai e le Atua. Ae na o le pau le mea e maua ai le okesene [o le faatuatua] pe afai lea tatou te savavali pea i luma. O nisi taimi tatou te manaomia ai ona faia se aufana ma se ‘aū a o le’i oo mai se faaaliga po o fea e tatau ona tatou saili i ai mo ni meaai.18 O nisi taimi tatou te manaomia ai ona faia ni meafaigaluega a o le’i oo mai faaaliga pe faapefea ona fau se vaa.19 O nisi taimi, i le faatonuga a le perofeta a le Alii, e manaomia ai ona tatou taoina se tamai keke mai sina ga’o itiiti ma se falaoamata o ia i tatou ina ia maua ai ma le mautinoa se ulo ga’o ma se paelo falaoamata.20 Ma o nisi taimi e manaomia ona tatou “filemu ma iloa o [le Atua] o le Atua,” ma faalagolago i Lana taimi.21
A e mauaina soo se faamanuiaga mai le Atua, e mafai ona e faapea ua e tausisia se tulafono e faavavau lea o loo puleaina le mauaina o lena faamanuiaga.22 Ae manatua o le tulafono “na folafola le maaveesea” e le fuaina i le taimi faaletagata, o lona uiga, e oo mai faamanuiaga i le taimi a le Atua. E oo lava i perofeta anamua i le sailiga o lo latou aiga faalelagi23 “na oti [i le] faatuatua, e lei maua mea na folafolaina, a ua iloa ai e i latou a e mamao … na mautinoa … ma talia.”24 Afai e le’i mauaina lava se faamanuiaga manaomia mai le Atua—ia—e le manaomia la ona e atuatuvale, ma tuufesili po o a nisi mea e manaomia ona e faia. Ae, faalogo i le fautuaga a Iosefa Samita ia “faia ma le fiafia mea uma ua i ai i [lou] mana; ona … tutu [lea], ma le mautinoa atoatoa, e vaai i le … aao [o le Atua] e faaali mai.”25 O nisi faamanuiaga e faapolopolo mo se taimi o mulimuli mai, e oo lava i fanau sili ona totoa a le Atua.26
I le ono masina talu ai, sa faalauiloa mai ai se fuafuaga e faatotonugalemu-i-le-aiga, ma lagolagoina-e-le-Ekalesia e aoao ai aoaoga faavae, faamalosia ai le faatuatua, ma faamalolosia ai tagata taitoatasi ma aiga. Sa folafola mai e Peresitene Russell M. Nelson o ia suiga e mafai ona fesoasoani ia i tatou ia ola ai faaleagaga, faateleina lo tatou olioli i le talalelei, ma faalolotoina lo tatou liua i le Tama Faalelagi ma Iesu Keriso.27 Ae ua tuu mai lava i lo tatou faitalia e mauaina nei faamanuiaga. E nafa i tatou taitoatasi ma le tiute e susu’e ma suesue le Sau, Mulimuli Mai ia te A’u—Mo Tagata Taitoatasi ma Aiga, faatasi ai ma tusitusiga paia ma isi anomea o le Sau, Mulimuli Mai ia te A’u.28 E manaomia ona tatou talanoaina faatasi ma o tatou aiga ma uo ma faatulaga o tatou aso Sapati e faamumu ai se afi o le faatuatua. A leai, ia tatou tuu ai pea punaoa i luga o se faaputuga i o tatou fale faatasi ma le malosiaga faamoemoeina e tanumia ai pea i totonu.
Ou te valaaulia outou ia faagaoioi ma le faamaoni mana o le lagi ia maua ai faamanuiaga faapitoa mai le Atua. Faatino le faatuatua e tosi ai le afitusi ma faamumu ai le afi o galuega e tatau ai. Sapalai atu le okesene manaomia o le faatuatua a o e faatalitali ma le onosai i le Alii. Faatasi ai ma nei valaaulia, ou te tatalo ia taialaina ma taitaiina oe e le Agaga Paia, ina ia mafai ona pei oe o le tagata faamaoni o loo faamatalaina i le Faataoto, “e tele mea e manuia ai.”29 Ou te molimau atu o loo soifua lo outou Tama Faalelagi ma Lona Alo Pele, o Iesu Keriso, ma o loo popole mo lo outou manuia, ma fiafia e faamanuia ia te outou, i le suafa o Iesu Keriso, amene.