Talafou mo Faifeautalai

Faafesootai atu i le aiga. Ua faatagaina nei faifeautalai ona fesootai atu i o latou aiga i vaiaso taitasi i aso o sauniuniga e ala i feau tusitusia, feau i luga o le initoneti, valaau i telefoni, ma talanoaga faavitio e faaopoopo atu i tusi ma imeli.

Meafaigaluega mo le fuafuaina mo faifeautalai faasauniuni. Ua mafai ona fesoasoani se meafaigaluega fou mo le fuafuaina o le misiona i luga o le initoneti mai le Matagaluega o Faifeautalai a le Ekalesia i faifeautalai faasauniuni ina ia sili atu ona faautauta ma mafaufau loloto ao latou filifili po o afea o le a sili atu ai ona latou saunia e auauna atu i le Alii o se faifeautalai.

Auauna atu i misiona. E amata atu ia Ianuari 2019, ua ta’ua faifeautalai talavou o auaunaga a le ekalesia o “faifeautalai o auaunaga.” O talavou matutua uma o e na talosaga mo se auaunaga faafaifeautalai o le a faia i lea lava ala e tasi, e ala i se faitotoa i le initoneti, ma o valaauga uma o le misiona—pe o se misiona talai po o se misiona o le auaunaga—e sau mai le perofeta. O talavou nofofua agavaa ona o mafuaaga eseese ua tuusaunoaina mai le auauna atu i se misiona talai e mafai ona valaauina i se misiona o auaunaga.

E mafai e tuafafine faifeautalai ona laeiina ni ofuvae. Ua i ai nei i faifeautalai faamisiona le filifiliga o le laeiina o ofuvae i le taimi o gaoioiga masani o aso uma, e ui e tatau i tuafafine ona faaauau le laeiina o ofutalaloa po o sakete pe a auai i le malumalu ma le taimi o sauniga o tapuaiga i le Aso Sa, konafesi faaletaitai ma faalesone, sauniga o papatisoga, ma faigalotu o nofoaga autu mo le aoaoina o faifeautalai. O le laeiina o ofuvae e mafai ona fesoasoani e puipuia tuafafine mai i siama e maua mai le namu, faamafanafanaina tuafafine i tau malulu, ma faigofie ai mo tuafafine ona tietie i uila.

Misiona ua toefatuina, tuaoi ua toe faatulagaina. E fa misiona fou ua fatuina, ae sefululua misiona o le a tuuina i totonu o misiona o i ai nei. O ia suiga e oo mai i lea taimi i lea taimi ina ia fetuunai i fuainumera o faifeautalai o loo auauna atu. O misiona fou o Democratic Republic of the Congo Kinshasa East, Guatemala Antigua, Peru Limatambo, ma Philippines Antipolo. O matua o faifeautalai o loo auauna atu i misiona ua aafia—pe ua fatuina pe le toe i ai—o le a maua faamatalaga faaopoopo mai a latou peresitene o misiona.

Fetuunaia fuainumera o nofoaga autu e aoao ai faifeautalai. Ina ia sili atu ona aoga faalauaitele nofoaga autu e aoao ai faifeautalai i le lalolagi atoa, ua tapunia nofoaga autu i Atenitina, Sepania, Chile, ma le Ripapelika Tominiko. Faatasi ai ma le tapuniga, o le a faagaoioia e le Ekalesia nofoaga autu e aoao ai faifeautalai e 11, i nofoaga o Pasila; Kolomupia; Egelani; Kana; Kuatemala; Mekisiko; Niusila; Peru; Filipaina; Provo, Iuta, ISA; ma Aferika i Saute.

Vitio o le saogalemu. O faasologa fou o vaega 12 o vitio The Safety Zone ua mamanuina e faateleina ai le saogalemu o faifeautalai faamisiona e 65,000 o loo auauna atu i le taimi nei faapena foi ma i latou o le a auauna atu. O le vitio muamua ua mamanuina e maimoa ai faifeautalai faasauniuni ma o latou matua pe a maea ona maua se valaauga o le misiona ma ao lei ulufale atu i se nofoaga autu e aoao ai faifeautalai. I le NAF, o le a toe maimoa ai le faifeautalai i le vitio muamua e faapena foi i isi [vitio] e 11. O le a tuuina soo atu faamanatu o le saogalemu i faifeautalai i a latou misiona.