Malelega Faaiu
Tau ina ia tatou faapaiaina ma toe faapaiaina o tatou olaga e auauna atu i le Atua ma Ana fanau—i itu uma e lua o le veli.
Ou uso e ma tuafafine pele, a o tatou oo mai ai i le faaiuga o lenei konafesi faasolopito, tatou te faafetai i le Alii mo Ana musumusuga ma le puipuiga. E aoaoina ma faagaeetiaina i tatou e savali.
E le’i atofaina ni autu i failauga. Sa tatalo i latou taitoatasi mo faaaliga faaletagata lava ia i le sauniaina o a latou savali. Ia te a’u, e ofoofogia le auala e matuā fesootai lelei ai na autu i le tasi ma le isi. Pe a outou suesueina [ia savali], saili atu e aoao mea o loo taumafai le Alii e aoao atu ia te oe e auala atu i Ana auauna.
Ua mamalu lava musika. Tatou te matuā faafetai tele i le toatele o tagata musika o ē ua tuufaatasia a latou taleni e aumai ai le Agaga o le Alii i sauniga taitasi. Ma ua Ia faamanuiaina tatalo ma le faapotopotoga i sauniga uma. O le mea moni, ua toe avea foi le konafesi ma se taumafataga tele faaleagaga mo i tatou uma.
Matou te faamoemoe ma tatalo o le a avea fale o tagata taitoatasi o le ekalesia ma se malutaga moni o le faatuatua, lea e mafai ona afio ai le Agaga o le Alii. E ui i finauga o loo siomia ai i tatou, e mafai lava ona avea le fale o se tasi ma se nofoaga faaleagaga, se nofoaga o suesuega, tatalo, ma le faatuatua e mafai ona tuufaatasia ma le alofa. E mafai ona avea moni lava i tatou ma soo o le Alii, tutu atu ma tautatala atu mo Ia i soo se mea tatou te i ai.
O le sini a le Atua e tatau ona avea ma a tatou sini. E finagalo o Ia i Lana fanau ia filifili e toefoi atu ia te Ia, ua saunia, ua agavaa, ua maua faaeega paia, ua faamauina, ma faamaoni i feagaiga ua osia i totonu o malumalu paia.
Ua 162 nei a tatou malumalu ua faapaiaina. O uluai malumalu o loo tutu o ni faatusa o le faatuatua ma le vaaiga mamao a o tatou paionia pele. O malumalu taitasi na latou fausiaina na tupu mai ia latou osigataulaga ma taumafaiga maoae faaletagata lava ia. E tu malumalu taitasi o se maataua ofoofogia i le palealii o ausiaga a paionia.
O lo tatou tiutetauave paia la o le tausia o ia [malumalu]. O le mea lea, o nei malumalu paionia o le a lē pine ae faagasolo le toefaafouga ma le faaleleia mo se vaitaimi, ma, mo nisi, o se toefuataiga tele lava. O le a faia taumafaiga e faasao ai tulaga maoti faasolopito iloga o malumalu taitasi i soo se mea e mafai ai, faasaoina o le matagofie faagaeetia ma galuega faatufugaga tulaga ese o tupulaga ua loa ona mavae atu.
Ua maea ona faalauiloa atu auiliiliga mo le Malumalu o St. George Iuta. O fuafuaga mo le toefaafouga o le Malumalu o Sate Leki, Lotoa o le Malumalu, ma le palasa e sosoo atu e latalata ane i le Maota o Ofisa o le Ekalesia o le a faasilasila atu i le Aso Faraile, 19 Aperila, 2019.
O le a toefaafouina foi Malumalu o Manti ma Logan Iuta i tausaga o lumanai. A sauniaina na fuafuaga, o le a faalauiloaina atu foi.
O lenei galuega o le a manaomia ai ona tapunia malumalu taitasi mo se vaitaimi. E mafai e tagata o le Ekalesia ona faaauau pea ona olioli i tapuaiga i le malumalu ma auaunaga i isi malumalu o lata ane. A maea ia galuega faatino taitasi, o le a toefaapaiaina ia malumalu faasolopito taitasi.
Uso e ma tuafafine, tatou te faaaloalo i se malumalu o le maota sili ona paia lea i le Ekalesia. A tatou faasilasila atu ni fuafuaga e fausia se malumalu fou, e avea ma se vaega o la tatou talafaasolopito paia. O lenei, faamolemole ia faafofoga ma le totoa ma le faaaloalo. Afai ou te faasilasila atua se malumalu i se nofoaga e faapitoa ia te oe, e mafai ona ou fautua atu ia tau lava o le punou o lou ao ma fai se tatalo leleoa o le agaga faafetai i lou loto. Matou te lē mananao i soo se alalaga leotetele e faaitiitia ai le natura paia o lenei konafesi atoa ai ma malumalu paia o le Alii.
O le asō matou te fiafia lava e faasilasila atu fuafuaga e fausiaina nisi malumalu i nofoaga nei:
Pago Pago, Amerika Samoa; Aai o Okinawa, Okinawa; Neiafu, Toga; Vanu o Tooele, Iuta; Moses Lake, Uosigitone; San Pedro Sula, Honduras; Antofagasta, Chile; Budapest, Hungary.
Faafetai lava, o‘u uso e, ma tuafafine.
A tatou talanoa e uiga ia tatou malumalu tuai ma fou, talosia ia faailoa atu e i tatou taitoatasi e ala i a tatou amioga o i tatou o ni soo moni o le Alii o Iesu Keriso. Tau ina ia tatou faafouina o tatou olaga e ala i lo tatou faatuatua ma le faalagolago ia te Ia. Tau ina ia tatou mauaina le mana o Lana Togiola e ala i lo tatou salamo i aso taitasi. Ma tau ina ia tatou faapaiaina ma toe faapaiaina o tatou olaga e auauna atu i le Atua ma Ana fanau—i itu uma e lua o le veli.
Ou te tuua lo’u alofa ma la’u faamanuiaga ia te outou, ma faamautinoa atu ia te outou o loo faaauau pea faaaliga i le Ekalesia lenei a le Alii. O le a faaauau pea seia oo ina “faataunuu faamoemoega o le Atua, ma fetalai ai le Ieova Silisili ua maea le galuega.”1
Ou te faamanuia ai ia te outou ma ou te molimau atu ai o loo soifua le Atua! O Iesu o le Keriso! O Lana Ekalesia lenei. O i tatou o Lona nuu. I le suafa paia o Iesu Keriso, amene.