Elder Ricardo P. Giménez

Fitugafulu o le Pulega Aoao

O le a umi ona manatuaina pea e tagata o le Ekalesia i Antofagasta, Chile, le konafesi aoao ia Aperila 2019 mo le fofogaina atu o se malumalu i le lumanai iina ma le valaauina o se atalii moni, o Elder Ricardo P. Giménez, o se Fitugafulu o le Pulega Aoao.

A o ia mafaufau ai i tiutetauave o lona valaauga fou, na maua e Elder Giménez le faatuatua ma le lototele i le faaupuga “Po o ai lava e valaauina e le Alii, e faaagavaaina e le Alii” (Thomas S. Monson, “Duty Calls,” Ensign, May 1996, 44).

“Ua ou aoaoina lena faaupuga i le tele o taimi i le tuanai, ma i le taimi nei ua ou taumafai e faaaoga ia te a’u lava ia,” o lana saunoaga lea. “E valaau oe e le Tama Faalelagi. Na te silafia oe. O lea ia tau lava o le alu atu ma fai mea ua Ia finagalo ai, ma o le a lelei mea uma.”

Na soifua mai Ricardo Patricio Giménez Salazar i le aso 28 o Novema, 1971, o le ulumatua o fanau e toalua na fanauina e Ricardo Benjamín Giménez Gimeno ma Myrto Lucisca Amalia Salazar Signorini. Na ia auai i le Ekalesia i le 11 o ona tausaga ma na siitia atu ma lona tinā ma lona tuafafine i Santiago, Chile, i le mavae ai o le teteaga a ona matua.

I le1995, na ia feiloai ai ia Catherine Ivonne Carrazana Zúñiga i Santiago ina ua amata ona auai [Catherine] i le uarota a [Ricardo] ao nofo [Catherine] iina i sona uncle. Na faamauina i laua i le Malumalu o Santiago Chile i le aso 12 o Setema, 1997, ma o ni matua o ni fanau se toalua.

Na maua e Elder Giménez lona faailoga i le tausitusi ma le suetusi i le Iunivestie o Santiago i le 1997 ma se faailoga o le matua o faiva i pulega faapisinisi i le Iunivesite o Chile i le 2003. Na amata lana galuega faapolofesa i le kamupani maina, ma iu ai ina agai atu i faamatalaga o tekinolosi o se faatonu o tupe mo le Computer Sciences Corporation i Latina Amerika. Na ia toefoi mai i le maina i le 2012, muamua i le Sierra Gorda Mining ma sosoo ai ma le Kamupani Robinson Nevada Mining.

I le taimi o lona valaauga, na auauna atu Elder Giménez o se fesoasoani i se au peresitene o se siteki. Na ia auauna atu foi o se Fitugafulu Eria i le Eria i Saute o Amerika i Saute, peresitene o se siteki, fautua maualuga, epikopo, fesoasoani i se au epikopo ma i se au peresitene o Alii Talavou o se uarota, ma se faifeautalai faamisiona i le Misiona a Chile Concepción.