Aiaiga Faavae mo Fanau a Matua LGBT, Faaipoipoga a Tagata o le Itupa e Tasi

O matua o e ua faailoa mai i latou lava o se tagata e faatauatane, faatauafafine, pe aafia i mea uma ia e lua [bisexual], po o se tasi ua suia lona itupa [tansgender] ua mafai nei ona talosagaina le faamanuiaina o a latou fanau o ni pepe laitii e sē tasi e agavaa o umia le Perisitua Mekisateko, ma ua mafai foi ona papatisoina a latou fanau pe a atoa lo latou valu tausaga e aunoa ma se faatagaga mai le Au Peresitene Sili, na faasilasila mai ai e Peresitene Dallin H. Oaks, Fesoasoani Muamua i le Au Peresitene Sili, i le taimi o le sauniga mo taitai i le konafesi aoao.

E le gata i lea, e ui o loo mafaufau pea i le faaipoipoga a tagata i le itupa e tasi “o se solitulafono ogaoga,” o le a le toe taulimaina e le Ekalesia o se “liliuese” mo faamoemoega o aoaiga a le Ekalesia. “O amioga le mama i fegalegaleaiga faatauatane po o le faatauafafine o le a taulimaina i le auala lava e tasi,” na saunoa ai Peresitene Oaks.

O nei suiga i le aiaiga faavae “e le o se suiga i aoaoga faavae o le Ekalesia e faatatau i le faaipoipoga po o le poloaiga a le Atua e tusa ai ma le legavia po o le ola mama,” na tusia ai e le Au Peresitene Sili i se faamatalaga aloaia. O le aoaoga faavae o le ata o le faaolataga ma le taua o le ola mama o le a le suia.”

Na saunoa Peresitene Oaks e tatau ona fesoasoani aiaiga faavae i aiga ua aafia, ma, “e le gata i lea, o taumafaiga a o tatou tagata ia faaali atu ai le malamalama sili atu, agaalofa ma o le alofa e tatau ona faateleina ai le faaaloalo ma le malamalama i totonu o tagata uma o faamoemoega lelei.”