Faaauau le Auaunaga a Peresitene Nelson

Ua faafeiloaia Peresitene Russell M. Nelson ma Elder Enrique R. Falabella o le Fitugafulu i le faigalotu i Lima, Peru.

E le’i umi talu ona maea le konafesi aoao ia Oketopa 2018, ae malaga atu Peresitene Russell M. Nelson i Peru, Bolivia, Parakuei, Iurukuei, ma Chile, lea na ia asia ai tagata o le ekalesia ma faifeautalai ma faia ni faigalotu, e aofia ai se faigalotu a le autalavou i Chile lea na auai le 1,500 [o talavou] ma faasalalauina atu ai foi i le atunuu atoa. Na ia saunoa atu i tagata o le ekalesia i le faaSipaniolo, faapaia le Malumalu o Concepción Chile, ma feiloai i taitai o le malo i le lotoifale.

E afe ma afe tamaitai na tali atu i luga o ala o faasalalauga faaagafesootai i le valaaulia a Peresitene Nelson e lipoti mai o latou aafiag ai lu’i e fa na ia tuuina atu i le konafesi aoao ia Oketopa 2018: (1) anapogi mai ala o faasalalauga faaagafesootai ma faasalalauga le lelei mo le 10 aso, (2) faitau le Tusi a Mamona e oo atu i le faaiuga o le 2018, (3) auai soo i le malumalu, ma (4) auai ma le atoatoa i le Aualofa. “Ou te fia faafetai atu ia te outou uma mo le tali mai i aʻu valaaulia,” o le saunoaga lea a Peresitene Nelson, ma faailoa atu le faamoemoe “o nei valaaulia taitasi ua atili ai ona e latalata atili i le Faaola.”

Na pule faamalumalu Peresitene Nelson i le falelauasiga o lona afafine, o Wendy Nelson Maxfield, o lē na maliu ina ua mavae se taua lototoa ma le kanesa. “O o matou loimata o le faanoanoa o le a liua i loimata o le faamoemoe a o matou maua se vaaiga e faavavau,” na ia saunoa mai ai. Na ia saunoa e uiga i lona afafine i le taimi o se konafesi faapitoa mo tagata o le ekalesia i le Siteki o Chico Kalefonia, lea e aofia ai iunite e lua mai Parataiso na afaina i le afi. “Ua tou silafia e tofu tagata uma ma luitau,” o lana saunoaga lea. “Afai e te manao ia lagona le lelei atili, faagalo oe lava ma auauna atu i se isi tagata.”

I Arisona, ISA, na valaaulia ai e Peresitene Nelson se aofia e 65,000 tagata o le ekalesia na potopoto i se fale taaalo “e fesoasoani e faapotopoto Isaraelu i itu uma o le veli.” Na tusia foi e Peresitene Nelson koluma o malo faaaloalogia i le nusipepa o le Arizona Republic na uunaia ai tagata “e vaai atu i [le Alii] ma faia o Ia ma totonugalemu o lou olaga.” Sa ia auai i se faatalanoaga na faasalalau i luga o le televise a le setete; faia ni taumafataga faatasi ma taitai faalemalo, faaleaoga, ma faaletapuaiga; ma faia se sauniga o fesili ma tali ma talavou nofofua matutua.

Talu mai le taimi na faauuina ai o ia i le aso 14 o Ianuari, 2018, ua asia e Peresitene Nelson atunuu e 5, 16 malo ma teritori, ma aai e 24, femalagaai i ni maila e 55,000 (88,515 km).