Auauna Atu, Feiloai, ma Auai Tuafafine

Ua otootoina atu e Sister Jean B. Bingham, Peresitene Aoao o le Aualofa, ma Bonnie H. Cordon, Peresitene Aoao o Tamaitai Talavou, le tele o polokalama fesoasoaniga alofa a le Ekalesia e pei o vai mama, tausiga o pepe faatoa fananau mai, ma tuipuipui, faapea foi ma polokalama o le ‘aotauina ma le faitautusi, ao latou feiloai ai ma taitai o malo ma auauna atu i tagata o le Ekalesia i Kana, Nigeria, ma Ivory Coast (Côte d’Ivoire).

“O le faamoemoega o la matou asiasiga ina ia feiloai ma le Au Paia, faia ni aoaoga mo tamaitai, ia faalogo i o latou luitau, ia lagona o latou loto, ma tau atu ia i latou matou te alolofa ia i latou,” na saunoa ai Sister Bingham.

Sai faia e Sister Bingham ma Sister Cordon se faigalotu mo faifeautalai o le Misiona a Kana Accra i Sisifo. Sa la feiloai foi ma nisi tagata o le ekalesia i o latou fale. Na auai Sister Bingham i se polokalama faitautusi faataitai a le talalelei, lea e aoao atua tagata i le ala e faitau ai ao aoaoina i latou e uiga i le talalelei a Iesu Keriso. Ma sa auai uma foi tamaitai i se aoaoga faaletataitai na faasalalau tuusao mai i Accra, lea na oo atu i le silia ma le 100 faalapotopotoga i Aferika i Sisifo, feiloai ma le First Lady o Kana ma le Failautusi Autu o le Matagaluega o Tamaitai ma le Faaitiitia o le Mativa o le Malo o le Setete o Lagos i Nigeria.

Ina ua mavae le feiloai ma tamaitai i Ivory Coast, na saunoa Sister Cordon, “O lo latou talitonuga ma le malamalama e uiga i le Atua ma po o ai o Ia ma le mea e mafai ona Ia faia i o latou loto, e ofoofogia ia te a’u.” Fai mai o ia pe a ia talanoa e uiga i le i ai o se malumalu i Abidjan, sa tagi se tasi o tamaitai ma loimata o le olioli. “O le a matou o ese atu ma se vaaiga e taulai atu i Aferika,” na saunoa ai Sister Cordon. “O le a matou o ese atu ma loto fou.”

O Sister Joy D. Jones, Peresitene Aoao o le Peraimeri, o loo tuuina atu tupe na mauaina e ala i gaoioiga o le Faasusulu Atu le Malamalama i taitai ma ofisa o nisi o faalapotopotoga auaunaga alofa i Manhattan, Niu Ioka, ISA. Matou te faamamaluina le Faaola o Iesu Keriso e ala i auaunaga,” na saunoa ai Sister Jones, ma matauina le ofoofogia o le vaaia o mea e tutupu “pe a iloa e tagata le suamalie o le avanoa e foai atu ai.”

I le Aai o Sate Leki, Iuta, ISA, na tauaaoina atu ai e Sister Sharon Eubank, Fesoasoani Muamua i le Au Peresitene Aoao o le Aualofa ni tupe na mauaina mai le Faasusulu Atu le Malamalama i le Lalolagi “tuuina atu o ni masini” i se faletupe o meaai, o se auaunaga alofa lea e tuuina atu le tausiga mo mata o tamaiti, ma o se nofoaga autu mo le sulufaiga. O nisi nei o ni nai vaega o le $2.3 miliona na maua mai masini i Arisona, Niu Ioka, ma Iuta, ISA, ma i Lonetona, Egelani, ma Manila, Filipaina, ma tufa atu i auaunaga alofa i le lalolagi atoa.