Elder Benjamin M. Z. Tai

Fitugafulu o le Pulega Aoao

O le tamamatua o Elder Benjamin M. Z. Tai na pueina, faafalepuipuiina, ma fasiotia e le autau a Iapani lea na osofaia Hong Kong i le taimi o le Taua Lona II a le Lalolagi.

I le tele o tausaga mulimuli ane, na feiloai ai Elder Tai i lana avā o le lumanai, o Naomi Toma, mai Iapani, a o auauna atu o se peresitene o le korama a toeaina i lana uarota o tamaiti aoga i le Iunivesite o Polika Iaga. Sa auauna atu Naomi o se peresitene o le Aualofa.

Ina ua ta’u atu e Benjamin i lona tamā, o se Pulega Aoao faamalolo faamamaluina o Elder Kwok Yuen Tai, sa ia tafao faamasani ma faamoemoe e faaipoipo ia Naomi, e le’i faaalia e lona tamā se lagona ita. O le mea moni, na o mai matua o Naomi, o Rikuo ma Fumiko Toma, i Hong Kong e asiasi i matua o Benjamin. Na matauina e ona matua [Naomi] o le talalelei a Iesu Keriso na mafai ai ona la faaipoipo. Sa faaipoipo le ulugalii i le Malumalu o Sate Leki i le aso 23 o Tesema, 1995. O i laua o ni matua o se fanau e toaono.

“Ma te o mai mai ni aganuu e eseese, ae o loo i ai ni mataupu faavae o le faatuatua ma le ositaulaga o loo faasoaina,” na saunoa ai Elder Tai. E silafia e Elder Tai o na mataupu faavae o le faatuatua ma le ositaulaga o le a fesootai ai o ia ma le Au Paia o Aso e Gata Ai i le lalolagi atoa.

Na soifua mai Benjamin Ming Zhe Tai i le aso 20 o Me, 1972, i Hong Kong ia Kwok Yuen ma Hui Hua Tai. O le galuega a lona tamā na avatua le aiga i le salafa o le lalolagi a o le’i malaga atu i Kalefonia i Saute, ISA, lea na faaalu ai e Elder Tai ona tausaga talavou. I lo latou aiga, na faaali atu ai e ona matua se tusitaai o i ai upu nei o tusia ai i le gagana Saina: “A o a’u nei ma lo’u aiga, matou te auauna ia Ieova” (Iosua 24:15). Na avea lenei [mau] ma mautauave a le aiga o Tai.

I le maea ai ona auauna atu i le Misiona a Melepone Ausetalia, na mauaina e Elder Tai se faailoga o le tagata malaga i mataupu faasaienisi mai le BYU i le 1996 ma se faailoga o le matua o faiva o pulega faapisinisi mai le Iunivesite o Kalefonia, Los Angeles (UCLA), i le 2003. Sa galue o ia i Iapani ma Hong Kong i teugatupe teufaafaigaluega ma le atinaeina o fanua faatau.

Na auauna atu Elder Tai o se Fitugafulu Eria, peresitene o le itu, fesoasoani i se au peresitene o le itu, failautusi faapitoa o le itu, peresitene o le korama a toeaina, peresitene o le paranesi, ma se faiaoga o le Aoga Sa.