Ainikien Armej ro Rekwojarjar ilo Raan-ko Āliktata
Kar tōlļo̧k n̄an Monica
Rosana Soares
Utah, USA
Kōmeļeļe jān Stan Fellows
Ke iaar jokwe ilo São Paulo, Brazil, iaar jeļā kajjien juon kōrā em̧m̧an kar etan Graça. Liin eaar juon kōrā eo em̧m̧an im jouj im m̧ōttan aolep.
Graça eaar eo m̧ōtta ilo jerbal in loļo̧k an kōrā. Liin eaar jinen jilu ajri ro, jerbal part-time, im eaar ejjeļo̧k waan ak an taļboon, bōtaab ejjeļo̧k iaan men kein raar kabōjrak e jān an jerbal.
Jān po eo aō, imaron̄ lo wintō eo emake ilo m̧weo im̧ōn. N̄e liin ekar pād, Graça ekōn likūt juon m̧ōttan ebūrōrō ilo wintōn eo n̄an kwaļo̧k bwe ekar pojak n̄an loļo̧k. Liin ejjan̄in kar lo juon kein jekpen ņae n̄an jab jerbal. Emakijkij aō kōn ļōmņak kōn kakōļļe eo an Graça im waanjon̄ak eo an em̧m̧an kōn tiljek im jerbal in jipan̄ eo eļem waan.
Juon en̄jake emakeļo̧k ilo ļōmņak eo aō. Kōm kar kōppopo im jar m̧okta jān etal n̄an loļo̧k juon iaan sister ro am. Ke kōm kar epaakeļo̧ke m̧weo im̧ōn, ilo m̧ool kōm kar kattōrļo̧k n̄an m̧weo im̧ōn bar juon sister! Kar kappeik kōm n̄an loļo̧k sister in, m̧am̧a an ruo ajri ro reddik ejeniknik, bōtaab kar jab kōm̧m̧an karōk n̄an loļo̧k e raan jab eo. Kōnke kōm kar pād ijo, kōm kar kaļļaļļaļ, bōtaab ejjeļo̧k juon eaar uwaak.
Kōm kar kāālet n̄an kūtarre im kōttar. Sister eo, Monica, āliktata kar itok im jiron̄ kōm eaar poub. Kōm kar kile liin eaar m̧ōk im enan̄in dān in kōmejaaļaļ. Ke kōm kar ba kōm kar pād ijo n̄an jipan̄, liin eaar kadeļo̧n̄ kōm. Nin̄nin̄ eo nejin eaar jan̄, kōn menin kōm kar jiron̄ e n̄an lale nin̄nin̄ eo im kōm naaj kar kōttar. Ke Monica eaar walōn̄ļo̧k ippān nin̄nin̄ eo, kōm kar jino jerbal, karreoik jet ruum̧ im lim aolep nuknuk ko kōm kar maron̄ loi.
Ke Monca eaar lo ewi jon̄an an em̧m̧an lale m̧weo im̧ōn, liin eaar jino jan̄, kar kōpeļļo̧k būruwōn n̄an kōm, im kar kwaļo̧k jet iaan apan̄ ko an. Kōm kar kallim̧ur n̄an jipan̄ e, im kōm kar kōnono n̄an būreejtōn eo an Doulul eo an Kōrā ro kōn apan̄ ko an. Jabōt eo tok juon, Monica eaar pād lo m̧ōn jar eo.
Monica eaar jino niknik, juon sister em̧ōņōņō, im kōm kar wōnm̧aanļo̧k n̄an jerbal in karejar n̄an e kōn iakwe im kea. Liin ej pad wōt apan̄ ko wōt an, bōtaab liin eaar maron̄ in ņa mejļaer kōn eļapļo̧k tōmak im peran kōnke kōn niknik eo an ilo Kabun̄ in.
Ij kanooj kam̧m̧oolol kōn waanjon̄ak eo an Graça ilo am kar jerbal ippān doon. Kōm kar jar kōn tōl, im Anij eaar tōlļo̧k kōm n̄an Monica.