Jab Mijak in Kwaļo̧k Mool eo
Dim kōn juon naan in kam̧ool kōn gospel in im kōjeraam̧m̧an ko ie, Fabian eaar jab bōjrak jen an kajoor, membōr mijenede eo ejjab mijak.
Romaak in aļ epād ilo Las Tomas, juon jikin kalōke ioon bo̧k ilo Antofagasta. Ilaļ, meram rejino romaak āinwōt jem̧ļo̧kin juon raan ilo turear in Chile.
Ej jotanin Jādede, 13 iiō rūttoon Fabian H. emaron̄ kar etal ippān ro m̧ōttan. Ak Fabian, juon membōr eo ekāāl an Kabun̄ in, kar kālet n̄an joļo̧k iien ippān mijenede ro re jerbal aolep raan joteen eo. Eiien “n̄an jipan̄ aiintok Israel.”1
Ilubwiljin membōr ro rej jerbal in mijenede retiljek me Kellen VanNatter im Jordan Shelton raar jerbal ilo mijen ko aer ilo Chile, Fabian eaar kōm̧m̧an jidikin.
Kelly eaar ba, “eļan̄n̄e ejjeļo̧k an iien, ej itok ippam̧ tok n̄an kōm̧m̧ane jerbal.” “N̄e jōm̧ar ejem̧ļo̧k, ej būrom̧ōj bwe eaikuj ro̧o̧l n̄an jikuuļ ak kōnke ejjeļo̧k an iien in itok ippam̧.”
Jordan, eo eaar joļo̧k jet allōn̄ āinwōt m̧ōttan Kellen, eaar ba, “Fabian emaron̄ itok ippam̧ tok emān ak laļem kōttan ilo juon wiik—aolep wiik—ilo ammim kar jerbal ippān doon ilo Antofagasta. Eaar membōr eo ej jerbal in mijenede eo em̧m̧antata kōm eaar jerbal ippān.
Ta eo ekōm̧m̧an bwe juon ļaddik en kōņaan kōm̧m̧ane jerbal in mijenede ijeļo̧kin jān kūlaaj ro an im jān ruwamājet? N̄an Fabian, uwaak eo ej pedped ilo kōjeraam̧m̧an ko e im baam̧le eo an rej būki jān ke raar bōk gospel in—kōjeraam̧m̧an ko ej kōņaan kwaļo̧ki n̄an ro jet.
“Lan̄lōn̄”
Fabian eaar jino būki katak ko an mijenede ro ālkin an mijenede ro rej jerbal aolep raan kar kōllalaļ. Ej keememej wōt kweilo̧k in kwojkwoj eo an jinointata.
Eaar ba, “iaar jab jeļā kajjien aolep ke ij deļo̧n̄e m̧ōnjar eo, iaar jidik ikum̧kum̧.” “Ak iaar en̄jake juon men ekabwilōn̄lōn̄. Iaar en̄jake āinwōt n̄e iaar pād ilo Kabun̄ in ilowaan elōn̄ iiō ko.
Ilo iien pepaij eo an eo wiik ko tok, “iaar en̄jake lan̄lōn̄ ke ij tuļo̧k ilo dān eo im bar waļo̧k. Iaar en̄jake juon armej ekāāl, jeļā bwe iaar ļoor Jisōs Kraist im kōm̧m̧ane ijo em̧m̧antata n̄an kōjparok kien ko An.
Jinen im jemen Fabian raar jab m̧are, Leonardo im Angela, raar pād ippān ļaddik eo nejier ilo katak ko an mijenede ro, raar katak kōn tampeļ m̧are im baam̧le indeeo. Fabian eaar ba, “Juon wiik tok ālik, jema eaar karōk juon raan in m̧are.” “Jinō eaar lukkuun m̧ōņōņō.”
Emen allōn̄ ālkin an Fabian kobatok n̄an Kabun̄ in, Angela eaar ļoor e n̄an dānin peptaij. Eaar ba, “eaar juon kōjeraam̧m̧an eļap.”
Kōjeraam̧m̧an ko jet raar m̧ōkaj in waļo̧k. Leonardo, eo eaar peptaij ke eaar dik, eaar jepļaaktok n̄an m̧akūtkūt ko an Kabun̄ in. Ekkatak gospel in eaar jino kōm̧m̧an ilo m̧weeo im̧weer. Ro uwaan baam̧le eo raar epaake doon. Leonardo eaar m̧ōkaj in elolo jerbal. Im Fabian eaar bōk Priesthood eo an Aron.
Fabian eaar ba, “Ij m̧ōņōņō in kabwijer priesthood eo bwe in maron̄ leto-letak kwojkwoj eo n̄an ro uwaan ward eo im jipan̄ er kōkāāl bujen ko aer.” “Eļap aō m̧ōņōņō n̄e ij leļo̧k n̄an baam̧le eo aō im n̄an elder ro me raar katakin eō. An jema m̧ōņōņō in lo n̄a ke ej reitok im lo aō leto-letak kwojkwoj eo ekōm̧m̧an bwe in m̧ōņōņō.”
“Enaaj Em̧m̧an”
Fabian eaar jino kōm̧m̧ane membōr jerbal in mijenede m̧okta jen an kar peptaij.
“Iaar jiron̄ ļo̧k ro m̧ōtta jilu ke ij tin peptaij. Eaar ba, ruo iaer raar itok.” “Iaar kōņaan kwaļo̧k gospel eo bwe ro m̧ōtta ren meļeļe ta eo jej tōmake im ta eo jej kōm̧m̧ane ilo m̧ōnjar eo im bwe ren jeļā kōn gospel in, peptaij, im mour mour elem̧ōņōņō. Inaaj lukkuun m̧ōņōņō n̄e juon iaer enej peptaij im erom̧ membōr in doulul eo aō. Enaaj Em̧m̧an.”
Fabian eaar kakoņ juon Bok in Mormon ilo jikuuļ eo an, im ej bōk ippān bok ko an mijenede n̄an ro m̧ōttan. Ej m̧ōņōņō in uwaake kajjitōk ko kōn Kabun̄ in im karuwaineneik ro m̧ōttan n̄an kweilo̧k ko an Jabōt im m̧akūtkūt ko an jodikdik ro. Im ejjab mijak in kōnono n̄an armej ro ilo iaļ eo, āinwōt n̄e mijenede ro rej katakin e, karuwaineneik er n̄an ekkatak kōn Kabun̄ in im keppopo n̄an peptaij.
Kellen eaar ba, “Fabian ejjab kea n̄e ro jet rej ļōmņak ebwebwe kōn an kwaļo̧k naan in kam̧ool eo an.” “Ejeļā ej kōm̧m̧ane ta eo ejim̧we. Ejeļā bwe men ko an jetōb raorōk jen men ko jet.”
Jordan eaar ba, N̄e Fabian ej kwaļo̧k an naan in kam̧ool, ej bōk kajoor jān an oktak, an iakwe n̄an gospel in, im kōjeraam̧m̧an ko an.
Jordan eaar ba, “Eaar lo kōjeraam̧m̧an ko me rej itok n̄an baam̧le eo an, eo me ej im̧we e n̄an kōm̧m̧ane ekajoor im ekajju n̄an kwaļo̧k gospel eo ippān ro m̧ōttan.” “N̄e ej kam̧ool n̄an juon rikatak kōn ta kōjeraam̧m̧an ko n̄an ro jinen im jemen bwe ren m̧are ak ewi an kar pen bwe en kar kōttar emen allōn̄ ālkin an peptaij bwe jinen en peptaij. En̄jake eo an eaar itok ioon, im ekar jan̄. Innām eaar kam̧ool bwe n̄e jej kōjparok kien ko, Anij enaaj kea kōn kōj.”
Kellen eaar ba, naan in kam̧ool eo an Fabian eaar kōm̧m̧an bwe en kajoor membōr mijenede.
“Ejjab kōņaan, ‘O, iaar ron̄ an juon ba ilo m̧ōnjar eo.’ Ijoke, eaar aolep iien kwaļo̧k an make en̄jake—āinwōt an en̄jake n̄e ej etal n̄an m̧ōnjar kar jinoin im an en̄jake ke ej riiti Bok in Mormon. Elukkuun m̧ool im jejjet.”
“Ij Iien Otemjej ”En̄jake Em̧m̧an tata”
N̄an Fabian, kwaļo̧k gospel eo eaar bar bōktok kōjeraam̧m̧an.
Eaar ba, “jet iien men ko renana rej waļo̧k n̄an n̄a ilo jikuuļ, ak ke mijenede ro raar itok im kōllaļlaļ ilo kōjem eo aō im kajjitōk eļan̄n̄e im̧ōņōn̄ō in jipan̄ er katakin.” “Ālkin etal ippāer ļo̧k, iaar en̄jake āinwōt n̄e ejjeļo̧k aō inepata. Ij iien otemjej en̄jake em̧m̧antata n̄e ij etal ippaer, riiti jeje ko rekwojarjar ippāer, im jipan̄ er kwaļo̧k gospel in. Kwaļo̧k gospel eo im aō oktak ekōkajoor naan in kam̧ool eo aō. Im kwaļo̧k gospel in eletok n̄an eō iien em̧m̧an bwe in waanjon̄ok n̄an ro jet, ekoba leddik ro jatū.”
Ejjab kailbōkbōk bwe juon iaan kōttōbar ko an Fabian reļļaptata ej n̄an erom̧ juon mijenede eo ej jerbal aolep raan ippān make ālkin diwōjļo̧k jen high school.
Eaar ba, “ikōņaan kwaļo̧k m̧ool eo n̄an ro rejjab jeļā kake.” “Ikōņaan karuwaineneik er n̄an jeo̧rļo̧k jerawiwi ko aer. Ikōņaan katakin er ewi wāween aer maron̄ erom̧ baam̧le indeeo. Ikōņaan karuwainenek er n̄an m̧ōņōn̄ō kiiō im mour ilo juon jekjek in lem̧ōņōņō eo ejjeļo̧k jem̧ļo̧kin ālkin mour in.”