Jān RIKAKTŪTŪ n̄an Peptaij
Jān Elder Hugo Montoya
Jān Jiljilimjuonn̄oul eo
Ami jem̧jerā im waanjon̄ok em̧m̧an enaaj kōjeraam̧m̧an ro m̧ōttam̧ im epepen ko rej itok.
Kōmeļeļe ko jān Brooke Smart
Ke ekar 17 iiō retta, iaar ioon iaio̧ ko reppen ilo high school eo aō. Ro m̧ōtta raar jab kwaļo̧k jon̄ak ko aō. Ro m̧ōtta im n̄a kar bōk kūņaam̧ ilo m̧akūtkūt ko rekkar āinwōt ikkure basketball ak football. Im raar bar rikadōk im rikōbaatat—ruo ikkure ko iaar jab ikkure ippāer.
Juon raan juon iaan ro ilo kurup eo eaar ekkatak n̄an juon teej enaaj kōm̧m̧an rālepān eo. Ippa ekwe ruo m̧ōtta ro repaaktata, Juan im Francisco (etaer em̧ōj an oktak). Ilo juon tōre, juon eaar tile jikka eo. Iaar ļōmņak ro m̧ōtta raar m̧akoko in ekkatak im kar meļo̧kļo̧k ke ipād ijo. Iaar jeļā ikar bōd ke raar letok n̄an im ba, “Kiiō ettōreen bwe Hugo en ekkatak kōbaatat.”
M̧okta jen aō bōke, Juan im Francisco raar m̧aļtok n̄an n̄a im jibwe peiū, juon ilo̧k juon ilo jait. Raar lelaļļo̧k peiū ilo an juon kadeļo̧n̄tok jikka eo kōtaan tiiō. Ānbwiniū eaar m̧ōkaj in m̧akoko, im iaar kajidikdiki jikka eo ioon laļ, kattoļo̧ke jen n̄a. Tokālik, iaar en̄jake bwiin ebaidiid iturin meja. Raar kamijak eo, im ba, “Kōmij bar tile jikka e, im kwoj ekkatak kōbaatat. Jab joļo̧k ioon laļ. N̄e konej kōm̧m̧ane, eban em̧m̧an.”
Ilo iien eo, iaar jeļā ke ipād ilo jorrāān. Iaar kil meja im ba juon jar em̧ōkaj kajjitōk kōn jipan̄. Ke ej m̧ōj aō jar, waan rūkaki eo ammim eaar bōjrak tok itūrūm̧. Rūkaki eo ammim eaar diwōjtok im kajjitōk kōmij ita. Ro m̧ōtta raar kōtļo̧k n̄a. Raar ba n̄an rūkaki eo, “kōm pojak n̄an teej eo.” Kōm eaar etal n̄an jikuuļ eo im bōk teej eo, im jekjek eo eaar bōjrak.
Kōn an pen en̄jake eo, Iaar jeo̧rļo̧k an ro m̧ōtta bōd kōn ta eo raar kōm̧m̧ane. Iaar jeļā raar jab jeļā jon̄ok ko aō im jokālet ko an mour kake Kien Māletlet, kōn menin iaar jeo̧rļo̧k aer bōd im kar kālet n̄an jab bōk en̄jake ko renana ņae er. Ke ej m̧ōj ammim jikuuļ, iaar etal n̄an mijen ak iaar bwebwenato wōt ippān Juan im Francisco. Eaar emakijkij aō jeje n̄an er im kwaļo̧k gospel in n̄an er im naan in kam̧ool eo aō kōn Jisōs Kraist. Iaar karuwaineneik er n̄an ukweļo̧k im itok n̄an jar. N̄an ilbōk eo aō, juon iaer eaar etal.
Emakijkij aō karuwaineneik ro m̧ōtta n̄an kweilo̧k ko an Jabōt m̧okta, ak ejjeļo̧k en eaar bōke m̧ae kiiō. Men̄e iaar jab kobaļo̧k ippān Juan, brother ro aō im jema raar jipan̄ er im m̧ōttaik e. Baam̧le eo aō raar bōk e, im Juan eaar lukkuun en̄jake aenōm̧m̧an ilo m̧ōnjar eo. Eaar jino oktak jidik kōn jidik m̧ae iien eaar kōm̧m̧ane jokālet eo n̄an peptaij. Iaar ilbōk kōn e im ilbōk eļapļo̧k ke eaar ba n̄an eō ke eaar jeļā n̄an iakwe Jisōs Kraist kōn wōt leta ko aō. Ke iaar ro̧o̧ltok jen mijen eo aō, iaar bar jino epaake Francisco, im ālkin jidik iien, e im kōrā eo ippān raar bar peptaij. Rainin, Juan im Francisco rej ro wōt m̧ōtta repaaktata.
Menin eaar jelet mour eo aō. Iaar jeļā iaļ eo em̧m̧antata n̄an im̧we mour ko n̄an mour jim̧we, iakwe ro jet, im pukotļo̧k. N̄an Kōkajoorļo̧k Jodrikdrik ro bok eo ej ba, “N̄an bōk ro m̧ōttam̧ rem̧m̧an, kwon juon m̧ōttā eo em̧m̧an. Kwaļo̧k am̧ itok limo ilo ro jet; ettōn̄ dikdik im kōm̧m̧an bwe ren jeļā bwe kom̧ij kea kōn er.”1 En̄in ej ta eo Irooj eaar jipan̄ n̄a kōm̧m̧ane ippān Juan im Francisco. Jen wōt menin, ewōr ruo m̧ōtta ro rem̧m̧antata iaar jeļā, im kiiō kōmij jerbal ippān doon n̄an rie aelōn̄ in kiin̄ eo an Anij āinwōt membōr in Kabun̄ in.
Iien otemjej kotak jon̄ok ko an Kabun̄ in, men̄e kwoj pād ilo juon jekjek eo elukkuun in pen āinwōt kar n̄a. N̄an Kōkajoorļo̧k Jodikdik ej kōmeļeļe “Ilo ami pukōt n̄an erom juon m̧ōttan ro jet, jab lelaļtak jon̄ak ko ami. Eļan̄n̄e ro m̧ōttami rej kōņaan bwe kom̧in kōm̧m̧ani men ko me rebōd, kom̧in juon eo me ej jutak kōn jim̧we eo.”2 Men̄e ro jet rej kōm̧m̧ane eoktak ļo̧k n̄an jum̧ae kien ko, kajoor wōt kōnke waanjon̄ok eo am̧ ekajoor. Kwon juon waanjon̄ok eo me ro m̧ōttam̧ remaron̄ ļōmņake ilo iien aikuj ko aer. Ilo jet jekjek āinwōt n̄a, jem̧jerā eo am̧ emaron̄ in men eo me ejipan̄ er jeļā, ukweļo̧k, im oktak.