Ruo Peij ko Robrak kōn Kam̧m̧oolol

Elise Dahlen

Utah, USA

Jema eaar en̄taan aolepān mour eo an jān jeleke e make im en̄jake ko kōn jab aorōk. Kar karrūtoļo̧k jān juon jemen eo ekadōkdōk me emakijkij an kōn jiron̄ e ewi jon̄an an jejtokjān ilo an kar ļōmņak kake. Kam̧m̧oolol, jema eaar jab erom juon eo ekadōkdōk e make, bōtaab ekar jab jiron̄ eō im ro jeiū im jatū bwe ekar uteij būruwōn kōn kōm ak nōbar kōm kōn men ko kōm ekar em̧m̧an am kōm̧m̧ani. Rūttoļo̧k, iaar kajjieon̄ in kam̧ōņōņōik e, bōtaab iien otemjej iaar en̄jake ikar jab maron̄ em̧m̧an n̄an kam̧ōņōņōiki. Menin ekar kōm̧m̧an bwe en wōr juon am kadkad eo ejjab em̧m̧an.

Juon iiō, iaar kwaļo̧k menin n̄an bisop eo aō elo̧ļe. Eaar kōkapilōlōk eō n̄an je juon leta n̄an jema jiron̄ e aolep un ko iaar kam̧m̧oolol kōn e. Menin enaaj kar juon men epen n̄an eō. En̄jake ko aō rekanooj nana, im iaar jab kōņaan bwe leta in kam̧m̧oolol eo aō en erom juon menin illu. Kōn menin ikar jar. Kōn Jetōb eo bwe en tōl eō, un ko me iaar kam̧m̧oolol kaki kōn jema raar jino jiōbtok. Ekar bōk iien, bōtaab ke iaar kadedeļo̧k, iaar kobrak ruo peij ko robrak.

Iaar bōkļo̧k leta eo aō, jab jeļā ekōjkan an jema naaj kar uwaak. Bōtaab iaar jeļā bwe iaar jab kāālet uwaak eo an. Iaar aikuj wōt in lale būruwō make im keememej etke iaar je leta eo.

Jibbon̄ōn eo tok juon, iaar bōk juon taļboon kūr jān kōrā eo jinō. Ekar jan̄. Ekar jiron̄ eō bwe jema ekar riiti im bar riiti im bar riiti leta eo. Liin eaar ba ejjab maron̄ in kar kōnono n̄an eō kōnke ekar lukkuun in jan̄.

“Kom̧m̧ool!” eaar ba. “Jemam̧ ekar aikuji menin.”

Tokālk ilo raan eo, jema eaar kūrtok eō n̄an kam̧m̧oolol eō. Eaar kūrtok eō aolep raan ium̧win jet raan ko n̄an kwaļo̧k ewi jon̄an an leta eo aorōk n̄an e.

Iakwe ke in kar ba bwe kōtaan eo am ekar em̧m̧anļo̧k ilo kabwilōn̄lōn̄, bōtaab ej ļap wōt ijo kōmij aikuj kōm̧m̧ane. Ium̧win iien ko, en̄jake ko aō raar jino em̧m̧anļo̧k, im kōtaan eo am eaar em̧m̧anļo̧k. Āliktata, iaar maron̄ in jeorļo̧k an bōd.

Jet iiō tokālik, ālkin juon tariņae em̧m̧an kōn kāānjōr, jema eaar mej. Ij tōmak ej kiiō en̄jake lan̄lōn̄ eļap āinwōt an Rilo̧mo̧o̧r eo jipan̄ e mour jān iiō in kakkure ko. Ijeļā bwe ikar en̄jake kōmour kōn kajoor eo an Pinmuur eo an Jisōs Kraist. Rilo̧mo̧o̧r eo ej meļeļe aikuj ko ad im emaron̄ jipan̄ kōj kōm̧akūtļo̧k nana eo an kōmetak im dike jān jetōb ko ad. Ijeļā bwe kam̧m̧oolol, jeorļo̧k bōd, im iakwe rej kein kōmour ko rekajoor.