Ta eo Kabun̄ in ej lo ilo jukjukin pād?

Juon meļeļe eo eaorōk ilo ad lo jukjukin pād eo ej ribōk eddo. Ejjab meļeļe bwe an armej ro laļin im remaron̄ kōm̧m̧ane men eo rekōņaan ak men̄e jej eddoik ad jerbali menin jeraam̧m̧an ko (lale Katak im Bujen ko 104:13–15). Men̄e “eļap bwe eo ie im n̄an leļo̧k” (Katak im Bujen ko 104:17), Anij eaar kōņaan bwe jen kōjerbal men ko an laļ in ilo jejjet (lale Katak im Bujen ko 59:20).

Anij eaar kōm̧anm̧an laļ im kar kwaļo̧k An kōm̧anm̧an “em̧m̧an” (lale Jenesis 1:1, 31). Laļ in kar kōm̧anm̧ane n̄an ro nejin Anij āinwōt m̧ōttan karōk in lo̧mo̧o̧r eo An. Laļ make enaaj ekwōjarjar im bōk aiboojoj an selestial (lale Katak im Bujen ko 88:18–19).

Anij eaar jab kōm̧anm̧an wōt laļ n̄an jeraam̧m̧an ak ekar aiboojoj. Men ko an laļ “rekar kōm̧m̧an n̄an em̧m̧an im kōjerbal n̄an armej, jim̧or n̄an kam̧ōņōņō māj im kalan̄lōn̄ bōro” im barāinwōt “n̄an kōmour jetōb” (Katak im Bujen ko 59:18–19).

Jej aikuj kautiej Anij ilo kam̧m̧oolol kōm̧anm̧an ko An, kwaļo̧k ad kam̧m̧oolol kaki, im kajjieon̄ in dāpij wōt aer aiboojoj. Jej aikuj kōjparok menin jeraam̧an ko, kōjparoki, im jab katoone im kakkure.