Pija ko kōn Tōmak
Wilson Di Paula
San José, Uruguay
Juon ākjintōn in wōtōbai ekōm̧m̧an bwe Wilson en mej rājetin. Juon iiō tokālik kōrā eo ippān eaar mej. Juon eo emej pāleen ippān ruo nejin leddik jiddik, Wilson eaar jab jeļā ta eo en kōm̧m̧ane. Eaar jab jeļā eļan̄n̄e ekar wōr jibadbad in mour. Wilson emaron̄ kar būrom̧ōj. Ijoke, eaar jino pukot m̧ool eo.
Cody Bell, ripija
Ālkin ākjitōn eo aō im an jako kōrā eo ippa, epād wōt ippa ruo leddik jiddik n̄an aō lale er. Iaar jab lukkuun jeļā elmen aō naaj lale leddik ro nejin ilo aō pād ilo wiiljiea. Ākjitōn in eaar lukkuun ukōt mour eo aō.
Elōn̄ bwijin aō kajjitōk. Etke men ko renana rej waļo̧k? Iaar make kajjieon̄ kōm̧m̧ani men ko rejim̧we, im kōrā eo ippa eaar būki jān n̄a im kiin ij pād ilo wiijiea, taktō ro rej m̧adm̧ade n̄an joļo̧k tum̧ōr eo ilo bōran leddik eo neju. Iaar jino ļōmņake bwe ejej tokjān mour in.
Iaar jeļā bwe iaar aikuj in pukōt m̧ool eo. Iaar etale juon m̧ōnjar ņa etan Kabun̄ eo an Jisōs Kraist im Armej ro Rekwōjarjar ilo Raan-ko-Āliktata. Iaar en̄jake ke ekar m̧ool.
Iaar ekkatak bwe ewōr juon mour ālkin mour in, im n̄e jemej, jemaron̄ in bar pād ippān ro jej iakwe. Eaar letok n̄an eō m̧ōņōņō kōn 10 iiō ko rem̧m̧an ippān kōrā eo ippa.
Lo gospel eo eaar ukōt mour eo aō ilo aolep meļeļe. Iaar jino jab inepata im likjab. Lem̧ōņōņō eaar deļo̧n̄ ilo baam̧le eo aō ilo ammim etal n̄an jar kajjojo Jabōt. Kōm kajoorļo̧k n̄e kōm̧ij ro̧o̧ltok. Kōm kar peptaij im aaet kar liāp n̄an indeeo ilo tampeļ eo ilo Argentina.
Kiiō ij wōnm̧aanļo̧k wōt ilo Kabun̄ in. Iaar jerbal āinwōt juon rikakpilōklōk ilo bisoprik eo, im ij kajjieon̄ ekkatak jān aolep en̄jake ko aō, jān aolep mālijon̄ ko an mour. Menin eletok n̄an eō kajoor. Ilo aō jijet ilo wiiljiea eo aō ium̧we 20 iiō ko, iaar jeļā lem̧ōņōņō ej itok jen tulowa. Armej rej ekkatak aolep raan. Kōn menin ij kam̧m̧oolol kake.
Kiiō ijeļā bwe ewōr juon jibadbad ioon laļ in. Jej pād ijin āinwōt m̧ōttan karōk indeeo eo an Jemedwōj Ilan̄. Ewōr juon Rilo̧mo̧o̧r eo eaar anjo̧ jen mej im kar jerkakepeje. Jeļā bwe menin eletok n̄an eō kajoor. Kiiō, ij kajjieon̄ in dāpdep wōt im wōnm̧aanļo̧k wōt. Ewōr juon aō jibadbad im ijeļā bwe ilo aō kajjieon̄ in mour erreeo, emaron̄ in wōr aō baam̧le indeeo.
Anjo̧ jān apan̄ ko Wilson im leddik eo nejin Sofia raar iooni, gospel in eaar leļo̧k n̄an er aenōm̧m̧an, lem̧ōņōņō, im kajoor. Sofia eaar jokwe ippān jemān jān iien eo eaar m̧wijm̧wij. Wilson eaar lo m̧ōņōņō ilo Kabun̄ in.
Kōmāt ilo an jijet ioon wiiljiea ipeļaakin jikin kōmat ej juon iaan kapeeļ ko Wilson eaar kōm̧m̧ani jān tōre eo eaar ākjitōn.
Wilson eaar lo kōjatdikdik im kajoor jān Rilo̧mo̧o̧r ilo an ekkatak jān jeje ko rekwojarjar.
Mijenede ro rej kobaļo̧k ilo kejota eo ippān baam̧le eo an Di Paula. Iakwe eo an Wilson n̄an gospel in ej juon kajoor ilo baam̧le eo an im n̄an Kabun̄ in.
Ālkin juon ākjitōn eo eļap im mej eo an kōrā eo ippān, Wilson eaar kajjitōkin jibadbad eo an mour in. Eaar lo jibadbad eo ke eaar lo gospel eo an Jisōs Kraist.
Wilson im Sofia raar lo kōjatdikdik ilo gospel in. Joļo̧k elōn̄ļo̧k jān 20 iiō ko ioon juon willjiea eaar jab kabōjrak Wilson jān an leļo̧k jerbal in jipan̄ ilo elōn̄ wāween ko.
Etōn̄dikdik eo an Wilson eaar kwaļo̧k kam̧ool eo kōn mour in jetōb eo ilo mour eo an. Wilson eaar ba, “Lem̧ōņōņō ej itok jān itulowa,”. “Armej rej ekkatak aolep raan.”
Ilo aer m̧ōn̄ā ippān doon, baamle eo an Di Paula raar kwaļo̧k elōn̄ļo̧k jān m̧ōn̄ā n̄an mijenede, raar bar kwaļo̧k aer iakwe im kam̧m̧oolol kōn gospel in.