Ainikien Armej ro Rekwojarjar ilo Raan-ko Āliktata
Raar Katōk juon Ine ilo Būruwō
Marta Algarve
Santa Catarina, Brazil
Kōmeļeļe jān Rafael López
Ia eo iaar itok jān e? Ta eo ij kōm̧m̧ane ijin? Ia eo ij etal n̄ane ālkin mour in?
Ke iaar 29, kajjitōk kein kar jab bōjrak aer itok n̄an eō. Ro jinō im jema raar mej. Iaar būrom̧ōj kōn jako eo an m̧aanje nin̄nin̄ ļaddik eo nejū. Eaar wōr jilu bar neju ajri ro n̄an karrūtļo̧k er im juon mour eobrak kōn apan̄ ko.
Irooj eaar jino uwaaki kajjitōk ko aō ke Eaar tōlļo̧k ruo mijenede ro reddik n̄an m̧weo im̧ō. Ke iaar karuwaineneik er n̄an lowaan m̧weo, raar kajjitōk eļan̄n̄e ekar wōr jabdewōt men iaar en̄jake eaar jako ilo mour eo aō. Iaar jiron̄ er kōn ro jinō im jema im ļaddik eo nejū. Iaar jiron̄ er iaar ļōmņak enaaj kar jab jetjet n̄an an wōr ajri ro im n̄an ejake baam̧le ko eļan̄n̄e aolep men otemjej raar jem̧ļo̧k kōn mej. Iaar kajjitōk eļan̄n̄e imaron̄ in kar bar lo ro jinō im jema im ļaddik eo nejū.
“Marta,” raar ba, “komaron̄ baam̧le n̄an indeeo.”
Lan̄lōn̄ ekar kobrak būruwō. Iaar kōņaan jeļā eļapļo̧k. Ilo lotok eo aer tok juon, raar katakin eō eļapļo̧k kōn gospel eo an Jisōs Kraist. Raar letok n̄an eō juon Bok in Mormon im idajon̄jon̄e eō n̄an riiti im kajjitōk ippān Anij eļan̄n̄e ej An naan. Iaar bōk idajon̄jon̄ eo aer. Ke iaar jar, uwaak eo an Anij eaar itok ilo an alikkar āinwōt meram in aļ. Iaar jeļā ilo būruwō eaar m̧ool.
Ejerata, ke iaar bōk juon jerbal kāāl, eaar jako aō ioon mijenede ro. Ilo allōn̄ ko raar itok, m̧are eo aō eaar jem̧ļo̧k im iaar kajjieon̄ jino juon mour kāāl ippān ajri ro nejū.
Āliktata, iaar bar m̧are. Juon raan ļeo pāleō eaar ba ebūrom̧ōj kōn an jako Anij ilo mour eo an. Kōm kar kāālet n̄an etal n̄an m̧ōn jar eo ekōn etal n̄ane. Ke kōm kar deļo̧n̄ļo̧k ilo im̧weo, iaar lo juon Bok in Mormon ioon juon tebōļ ilo ettōņaak eo. En̄in ekar ejja m̧ōnjar eo wōt kar kwaļo̧k kadkade in m̧okta! Iaar iakwe Jetōb eo iaar en̄jake ijo. Ke kōm kar ilo̧k, ikar kajjitōk ippān ļeo pāleeō ekōjkan aō maron̄ peptaij.
“Kwoj aikuj in katakin jān mijenede ro,” eaar ba.
“Iaar ekkatak ļalem iiō ko remootļo̧k!” Iaar uwaak.
Kar katakin ajri ro nejū im n̄a katak ko. Raan in peptaij eo am eaar raan eo em̧ōņōņō tata ilo mour ko am.
Jet iiō ko tokālik, iaar en̄jake bwe iaar aikuj in jiron̄ sister ro me raar m̧oktata katakin eō bwe em̧ōj aō kobatok ilo Kabun̄ in. Ilo Facebook, iaar lo juon kumi an mijenede ro raar ro̧o̧l jān Brazil Santa Maria Mijen. Ekar pād ie juon iaan sister ro me raar katakin eō. Iaar jilkinļo̧k n̄an e juon kajjitōk n̄an m̧ōttā im eaar jiron̄ e wōn kar n̄a, ekōjkan aō kar erom juon uwaan Kabun̄ in, bwe baam̧le eo am eaar liāp ilo tampeļ, im bwe ļaddik eo nejū eaar jerbale juon mijen edipio. Iaar jiron̄ liin aolep men kein kar pidodo kōnke e im eo m̧ōttan kar katōk ine eo an gospel eo kar kōjepļaaktok ilo būruwō.