Stap Eksperiensem Prishud Paoa
Oli bin askem ol woman we oli help blong lidim Jos, abaot olsem wanem paoa blong prishud i gat paoa long laef blong olgeta. Hemia samfala tingting we oli bin serem.
Ol droing oli kam long Matisse Hales
“Ol man mo ol woman oli gat ol defren be ikwol impoten responsabiliti long hom mo long Jos. Prishud paoa i save helpem wanwan man blong mekem ol responsabiliti blong gud blong evriwan.
“From se prishud paoa blong God i stap long wol tedei, ol bigfala blesing i stap blong evri memba blong Jos we i klin inaf, nomata we oli olfala o yangfala, man o woman, singgel o mared.”
— Presiden Joy D. Jones, Praemeri Jeneral Presiden
“Seves i mekem sol blong yumi kam moa bigwan, i mekem lukluk blong yumi i kam moa bigwan, mo i letem yumi blong yusum plante moa, paoa blong God. Lod i save hemia, be Setan i save tu. Oltaem hem i stap wajem gud yumi blong traem blong mekem yumi stap longwe long paoa blong God, enemi bae i kavremap yumi o mekem yumi filim se wanem yumi gat blong givim i no inaf. …
“… Neva tingting tu long wan aksen blong stap kaen.
“Taem yumi wantem blong stap givim seves long ol narawan i kam pat blong laef blong yumi, bae yumi faenemaot ol sikret blong God. Bae yumi kasem, faenem paoa, mo kasem wan paoa we i moa bigwan taem yumi givim seves long Sevya blong yumi, Jisas Kraes.”
— Presiden Bonnie H. Cordon, Yang Woman Jeneral Presiden
“Plante taem, ol woman oli stap komperem olgetawan wetem ol narawan. Be i nogat wan long yumi i filim gud blong stap komperem yumi. Wanwan woman i gat ol defdefren kaen paoa mo talen we i spesel, mo oli ol presen we God i givim. From nomo se yu mo mi i no semmak—o eni nara namba blong ol woman i no semmak—i no mekem yumi bigwan moa o smol moa bitim narawan. Yumi nid blong faenem ol presen blong yumi mo developem olgeta, mo tingbaot huia i givim ol presen ia long yumi, mo afta, yusum blong ol stamba tingting blong Hem. Taem yumi serem ol presen blong yumi blong blesem ol narawan, yumi stap eksperiensem paoa blong prishud long laef blong yumi.”
— Presiden Jean B. Bingham, Rilif Sosaeti Jeneral Presiden
“Oltaem lukaotem ol janis blong mekem save blong yu abaot ‘doktrin blong prishud’ i kam moa bigwan. Wanwan long yumi bae i nidim blong lukaotem save ia blong yumiwan.
“Blong stap stadi long ol skripja mo ol toktok blong ol profet blong tedei, bae i givim wan rij fandesen blong save ia i gro. Semmak olsem fasin blong obei long ol komanmen blong God mo stap laef tru long ol ol kavenan we yumi bin mekem tru long ol prishud odinens. Oli givim save long yumi tru long ‘tijing folem tijing, rul folem rul,’[2 Nifae 28:30]. Tru long revelesen blong yuwan, bae hem i ‘olsem smosmol ren blong moning’ long sol blong yumi [Doktrin mo Ol Kavenan 121:45].”
— Sista Lisa L. Harkness, Fas Kaonsela Insaed long Praemeri Jeneral Presidensi
“Wanwan long yumi i stap long rod blong wan longfala wokbaot. … Yumi wokbaot tru long ol jalenj blong rilesensip, mane, mo helt jalenj long saed blong tingting mo bodi. Yumi wokbaot tru long ol asaenmen we i kavremap yumi mo ol lis blong ol samting blong mekem evri dei. Maet sam long yumi i stap wokbaot tru long harem nogud, o iven fasin blong stap yuwan o nogat samting blong mekem. Ol jalenj blong yumi oli defren, be yumi evriwan i gat.
“Blong stap kipim ol kavenan blong yumi i no minim se bae oli karemaot ol jalenj ia, be i minim se Lod i promes blong stap wetem yumi.”
— Sista Michelle D. Craig, Fas Kaonsela insaed long Yang Woman Jeneral Presidensi
“Mi mi luk prishud paoa olsem wan singgel, smut, waet tred we i kam long God mo i go insaed mo aotsaed, antap mo raon, olsem we hem i gat daereksen blong hemwan long laef blong yumi. Be taem taem i stap go, bae ditel blong paten ia bae i kamaot. Disaen ia i kavremap olta blong God, ples we i moa tabu we yumi joen long wol mo long heven. …
“Eni taem mi luk wan olta kaliko long tabu tempol, mi filim se hem i wan long ol saen we i gat moa paoa long tempol long olsem wanem Lod i stap givim paoa blong Hem i go long ol fetful pikinini blong Hem blong mekem se oli save kam tugeta mo joen tugeta long wan tabu disaen we i gat fulap ditel.”
— Sista Sharon Eubank, Fas Kaonsela insaed long Rilif Sosaeti Jeneral Presidensi
“Tru long ol laef eksperiens blong miwan, mi save se blong stap kipim ol komanmen blong Lod, gat fet, mo trastem Hem fulwan, oli ol wei we yumi save aksesem prishud paoa blong Hem. …
”… Taem yumi gohed blong stap fetful, yumi save kasem ol prishud paoa mo blesing long evri samting long laef blong yumi. Hem i save givim yumi proteksen, kamfot, paoa, pis, mo ol promes we bae i kasem ol taem we i no save finis. Tru long prishud paoa ia, Tabu Spirit i helpem mi tu blong tingbaot ol eksperiens long laef blong mi we i gohed blong bildimap testemoni mo fet blong mi long God.”
— Sista Cristina B. Franco, Sekem Kaonsela insaed long Praemeri Jeneral Presidensi
“Fulap yia i bin pas stat long taem we mi bin kasem petriakel blesing blong mi, be mi stil tingbaot eksperiens ia klia nomo. …
”Eksperiens ia i bin gat paoa long fulap desisen we mi bin mekem truaot long laef blong mi. I bin save se, blong save mekem ol blesing ia we mi wantem blong kam tru, mi mas mekem pat blong mi.
”Naoia mi luk se i gat fulap moa we Papa blong yumi i wantem blong mi kasem, iven moa bitim wanem we oli talem long petriakel blesing blong mi.”
— Sista Becky Craven, Seken Kaonsela insaed long Yang Woman Jeneral Presidensi
“Mi bin joenem Jos Ia blong Jisas Kraes blong Ol Lata-dei Sent taem mi gat 26 yia. Nomata we mi gat wan gudfala filing long hat blong mi taem mi folem tingting blong hat blong mi blong kasem blesing we i kam long God taem mi mekem kavenan wetem Hem, mi save se save blong mi long kavenan ia i olsem wan smol sid nomo long taem ia.
“Taem ol yia i stap go, mo mi bin stap mekem wan efot blong kipim kavenan blong baptaes blong mi wetem ol nara kavenan we mi bin mekem wetem Papa long Heven, mi filim se Hem i bin blesem mi wetem wan save we i moa dip abaot Hem, abaot Sevya blong mi, mo wok blong mi olsem wan kavenan gel blong Papa mo Mama long Heven.”
— Sista Reyna I. Aburto, Seken Kaonsela insaed long Rilif Sosaeti Jeneral Presidensi