Stap Kipim Miusik long Hat blong Wosip

I Kam long Jan Pinborough

Ol Magasin blong Jos

Oltaem miusik i bin—mo oltaem bae i—stap long hat blong wosip, long jos mo long hom.

family gathered around piano

I no fulap wik afta we Jos i oganaes, Lod i bin daerektem Ema Smit blong “jusum ol tabu hym, … we bambae mi glad long hem, we bambae oli yusum insaed long jos blong mi” (Doktrin mo Ol Kavenan 25:11). Ol Sent i nidim ol wei blong lanem ol trutok blong gospel we i jes kamaot long olgeta mo yunaet blong stap presem God. Mo ol hym bae i stap long hat blong wosip blong olgeta mo fasin blong lan.

Plante yia i pas, taem famli blong mi i bin joenem Jos, papa mo mama blong mi oli leftemap tingting blong mifala blong lanem miusik blong niufala bilif blong mifala. Mi gat sam klia memori blong taem ia:

• Stap lanem baehat “Prayer Is the Soul’s Sincere Desire” (Hymns, no. 145) wetem famli blong mi.

• Stap harem “O Papa blong Mi” (Singsing Tabu mo Singsing blong Ol Pikinini, pej 42) mo lanem se mi gat wan Papa mo Mama long Heven we mi save luk bakegen wan dei.

• Stap filim lav blong God taem mi singsing “My Heavenly Father Loves Me” (Children’s Songbook, 228–29)—!nomata we mi stap laef long wan draeples mo mi neva luk wan rilaks tri!

Nao, muv fored i go long wan sakramen miting long let Febwari 2020. Samfala memba blong wod blong yumi oli bin stap fesem kansa, mo mi filim we wod kwaea i leftemap tingting blong mi bigwan taem oli bin singsing “Tijing Blong Jisas Hem i Stamba blong Yumi” (Singsing Tabu mo Singsing blong Ol Pikinini, pej 6.) Sam wik afta, sam samting oli bin hapen we oli no mekem tingting i kwaet olsem: ol kwarantin, jos i kansel, mo plante etkwek mo smol etkwek afta. Mo hym ia i stat blong plei insaed long maen blong mi.

No fraet, no wari, from mi stap wetem yu,

Mi mi God blong yu mo mi mas helpem yu.

Mi helpem, sapotem, mi mekem yu stanap,

From we mi gat paoa, from we mi gat paoa, gat paoa i stap.

Samtaem i luk se ol wol jalenj mo jalenj blong yumi wanwan oli stap kam bigwan evri dei. Moa bitim oltaem, yumi nidim sapot kakae long saed blong spirit blong tabu miusik, ol singsing blong Praemeri, mo ol nara tabu miusik.

I No Gat Jenis long Stamba Tingting o Hamas I Impoten

Be, taem yumi bin jenis i go long tu aoa taem blong miting blong Jos, sam oli stap askem olgetawan sapos rol blong miusik i go daon long wosip blong yumi. Ansa hem i, no.

1. Ol tabu miusik oli pat yet blong evri sakramen miting, wetem fasin blong mekem hat blong yumi i rere from odinens ia we i sakramen miting. Kwaea mo kongregesen singsing mo ol nara tabu miusik oli stil save mekem plan blong gat olgeta blong mekem miting i kam rij, semmak olsem bifo. Long taem blong KOVID 19 wol sik ia, tabu miusik i wan impoten pat yet blong ol sot sakramen miting, iven taem we piano nomo i stap plei long hem.

2. Ol pikinini blong yumi, naoia oli spendem haf taem blong olgeta long Praemeri blong stap lanem gospel tru long miusik.

3. Long nambatu aoa, i no gat fas o las singsing blong ol adalt mo ol yut klas. Be oli save yusum miusik yet long ol klas blong tij mo givim insperesen.

4. Hem i moa isi bitim bifo blong lisin long tabu miusik long ol dijitol tul, mo yusum Ap blong Jos we i Sacred Music.

No Tumas Oda, Moa Tingting blong Hat

Be yet, i gat ol samting we man i no andastanem gud yet. Long wan Ista Sandei, wan tija i talem sore insaed long Gospel Doktrin klas blong hem: “Mi save se yumi no sapos blong singsing long Sandei Skul, be mi rili wantem singsing ‘Mi Save Ridima Hem I Laef’ tugeta.” Ating tija ia i no hemwan we i no andastanem gud ol samting ia.

Wanem i rili stap, i we, miusik, i stap yet olsem wan impoten pat long wosip blong yumi. Witnes impoten apdeit we i stap gohed blong ol hym mo ol singsing blong ol pikinini. Olsem pat blong hadwok ia, ol memba blong Jos raon long wol oli sendem wan bigfala namba, we 16,000 niu hym, singsing mo toktok.

Be wetem smol taem blong singsing long sam long ol Sandei miting blong yumi, yumi no nid blong tingting hevi moa mo gat moa tingting blong stap mekem plan mo yusum miusik.

group of children singing

Tufala ki prinsipol we i save helpem yumi blong kipim miusik i stap long hat blong wosip blong yumi:

1- Wan Nid blong Stap Tij Wetem

Be yumi tingting long ol toktok mo ol toktok storian olsem fas wei blong pasem ol mesej blong gospel long hom mo long Jos. Mo maet bae yumi spendem plante moa taem long ol samting ia. Be miusik i no wan samting antap blong flasem ples. Hem i hat blong stap tij wetem paoa mo wetem Spirit.

Olsem we Aposol Pol i talem long ol fasfala Sent: “Yufala i mas letem tok ya blong Kraes, we i fulap gud long ol gudgudfala samting, i stap oltaem long tingting blong yufala. Oltaem yufala i mas tijim yufala long ol tok we i waes, blong i save soemaot rod long yufala. I gud yufala i stap sing long God long Ol Sam mo ol hym, mo ol sing blong presem God, we long tingting blong yufala, yufala i stap talem tangkyu long hem.” (Kolosi 3:16).

Miusik i save tekem, wantaem nomo, Spirit i kam insaed long wan lesen o miting. Blong stap jusum wan singsing long taem blong wan Sandei Skul klas o wan toktok storian raon long Kam Folem Mi i nidim yumi blong gat semfala fasin blong tingting plante mo prea from, semmak olsem se bae yumi jusum wan skripja blong ridim, o i pat blong lesen we yumi jusum blong serem Miusik we oli jusum wetem prea, i save tajem ol hat, i putum ol filing long saed blong spirit we i save stap wan ful laef.

2. “Wan Prea long Mi”

Long samfala taem, bae yumi evriwan i save gotru sam taem we yumi filim se yumi harem nogud tumas we i katem leg blong yumi, sam taem we rod long fored i no klia tumas. Samtaem, i olsem se yumi stap sakem semfala kwik nid ia i go long heven, mo i no gat wan ansa o wei blong stretem. Long ol taem olsem, maet bae yumi gat temtesen blong talem se God i no kea, o se yumi no klin inaf blong kasem kea blong Hem. Samtaem, yumi save filim olsem yumi stap givap long prea.

Blong ol taem ia we yumi filim se yumi no konek wetem heven long saed blong spirit, i gat trutok i stap we i save leftemap tingting: Tabu Miusik i save stap olsem wan prea. Lod Hemwan i eksplenem hemia taem we Hem i bin givim wok ia long Ema blong mekem fas hymbuk blong yumi: “From we sol blong mi i glad tumas long singsing we i kam long hat; yes, singsing blong ol stret mo gud man, hem i wan prea we i kam long mi, mo bambae mi ansa long hem wetem wan blesing long hed blong hem.” (Doktrin mo Ol Kavenan 25:12; oli ademap italik).

Mo taem we yumi stap givim singsing wetem tru hat, Lod i bin promesem blong oltaem ansa wetem wan blesing: “Mo bambae mi ansa long hem wetem wan blesing long hed blong hem. Taswe, leftemap hat blong yu mo stap glad, mo holemtaet ol kavenan we yu bin mekem” (Doktrin mo Ol Kavenan 25:12–13).

Long wan taem insaed long laef blong mi we i bin had tumas, mi no save luksave ol ansa blong ol prea blong hat blong mi blong wan longfala taem. Wan dia fren blong mi i bin stap gotru long sam taem we i had blong hemwan. Be taem mifala i stap plei mo singsing ol hym mo ol singsing blong gospel tugeta, plante taem yumi filim ol filing we oli bigwan tumas se yumi gat sapot mo testemoni. Naoia, mi luksave se Lod i stap mekem ol promes blong Hem ol kam tru. Hem i bin stap ansarem ol singsing blong hat blong mi, bakegen mo bakegen. Mo hemia i rili helpem mi blong leftemap hat blong mi mo gohed.

young woman visiting a cemetery

Photograph by Robert Casey

Long Eni Sandei

Long eni Sandei, yumi sua se sam long ol kongregesen blong yumi, sam we oli stap long klas, mo sam long ol famli blong yumi, oli stap long wota we i dip, ol wota blong hadtaem blong yumiwan. Ol narawan, bae oli stap long ol vale blong pis, wetem ol blesing we oli kapkapsaed. Be yet, i gat ol narawan we oli stap lanem ol besik blong trutok blong gospel.

Taem we yumi stap holem taet miusik long stret ples blong hem, we i long hat blong wosip blong yumi, yumi save helpem evriwan blong faenem ol janis blong filim Spirit, blong lanem ol trutok blong gospel, mo blong presem Lod from gud fasin blong Hem. Mo yumi save helpem evriwan blong gat ol singsing blong hat, blong oli kasem ansa long ol wei we, Papa blong yumi nomo we i no save finis mo i gat lav, i save givim.

Paoa blong Miusik

“Miusik i gat paoa blong givim kaekae long saed blong spirit. Miusik i gat hiling paoa. Miusik i gat paoa blong mekem wosip i hapen, letem yumi tingting dip long Atonmen mo long Restoresen blong gospel, wetem ol prinsipol blong hem we i sevem man, mo wetem ol odinens blong hem we i mekem man i save kam olsem wan god. Hem i givim paoa blong yumi talemaot ol tingting insaed long prea mo talemaot testemoni blong yumi abaot ol tabu trutok.”

Presiden Russell M. Nelson, President of The Church of Jesus Christ of Latter-day Saints, “The Power and Protection of Worthy Music,” Ensign, Dec. 2009, 16.

Miusik I Wan Tabu Lanwis

Ol enjel mo ol kriesen blong God oli presem Hem wetem ol singsing (luk long Alma 36:22 mo Doktrin mo Ol Kavenan 128:23).

Miusik i talemaot fet (luk long Ol Wok 16:25).

I talemaot glad blong jenisim laef mo fasin blong pemaot man (luk long Alma 5:26 mo Alma 26:13).

Mo evriwan ia, bae oli singsing long taem we Lod i stap kam.

Kasem taem we evriwan i save mi, olgeta ia we oli stap, olgeta we oli daon go kasem olgeta we oli hae, mo bambae oli fulap wetem save abaot Lod, mo bambae oli luk long ae blong olgeta, mo bambae oli leftemap voes blong olgeta, mo wetem voes, tugeta bae oli singsing long niufala singsing ia” (Doktrin mo Ol Kavenan 84:98; ridim toktok blong singsing we i stap long ol ves 99–102).