“Mi Wantem Go long Paradaes”
Taem mi bin prea mo askem God abaot niufala rod ia, mi filim moa tras long trutok we mi faenem.
Foto i kam long Getty Images, oli yusum ol model
Mi bin wan memba blong wan nara jos we mi givim mi fulwan long hem, be afta, mi stat blong stadi long ol tijing blong hem abaot wan ples blong kam klin. Aedia ia i tijim se, sol, afta long ded blong bodi, i go long wan ples we i semmak long kalabus, wan ples we sol i mas kam klin gud bifo i go long paradaes.
Taem mi stap tingbaot ol sol we oli stap safa long ples ia blong kam klin, mi luklukbak long fiuja blong miwan long saed blong spirit mo long rilesensip blong mi wetem Jisas Kraes. Mi stat blong prea: “?Wanem nao mi mas mekem blong ronwe long ples ia blong kam klin? Mi wantem go long paradaes.”
Fas samting we i kam long maen blong mi hem i blong laef folem ol Ten Komanmen. Mi filim se sapos mi mekem hemia, bae gladhat mo sore blong Lod i letem mi blong ronwe long ples ia blong kam klin. Mi komitim miwan blong kipim ol komanmen mo stat blong stap lego kakae blong ol longfala taem, stap prea, stap stadi ol skripja mo stap tingting hevi.
Long taem ia, mi filim wan strong filing blong askem wan kwestin we i no nomol tumas long wan dokta long klinik we mi stap wok long hem olsem wan jif akaonten.
“Dokta Thibaut,” mi talem: “?Lod Jisas Kraes i stap long jos blong yu?”
Hem i talem se hem i blong Jos Ia blong Jisas Kraes Ia blong Ol Lata-dei Sent. Stat long taem ia, Spirit i bin gaedem storian blong mitufala. Mi bin askem ol samting we i defren abaot jos blong hem mo jos blong mi. Hem i talem long mi abaot Buk blong Momon. Taem mitufala i stap gohed long storian blong mitufala, glad i fulumap hat blong mi. Mi filim se mi stap kasem ol ansa long ol prea blong mi.
Tu dei afta, ol misinari oli givim mi wan Buk blong Momon, we mi bin ridim mo stadi wetem olgeta. Mi faenem i naes tumas blong lanem ol niu samting aot long ol skripja. Mi stat blong obei long Tok blong Waes.
Taem mi luksave se mi bin lusum intres long jos blong mi we mi bin tekpat fulap long hem, mi stat blong tingting long miwan se wanem i stap hapen. Mi prea mo askem God abaot niufala rod ia. Taem mi bin prea, mi filim moa tras long trutok we mi faenem. Mi disaed blong joenem Jos, nomata we mi bin save se bae mi fesem hadtaem blong ol man i agensem mi.
Hadtaem ia i bin kam, be Lod i bin mekem mi moa strong. Mi save se Jos Ia blong Jisas Kraes Ia blong Ol Lata-dei Sent i bin ansa long prea blong mi we i kam long hat: “Mi wantem go long paradaes.” Mi save se mi save go long we afta we mi ded, sapos mi stap fetful long ol komanmen blong God.