Hariap blong Go long Sakramen Miting
Mi ting se mifala i mestem sakramen—bakegen.
Foto i kam long Getty Images
Taem mifala i bin muvaot long Yunaeted Stet i go long Vietnam, hasban blong mi mo mi i tingting strong blong neva mestem jos. Afta long wan yia, mitufala i no mestem wan singgel Sandei miting, be fulap taem mitufala i stap let mo sam taem stap mestem sakramen. Sakramen miting blong mifala i stat long 8:30 a.m. Sam taem i luk olsem blong stap rere blong go long jos long taem i no posibol nomo wetem tri smosmol pikinini.
Olsem wan famli, mifala i disaed se mifala i nid blong stap go long jos long taem mo tekpat long sakramen. Hem i bin wan jalenj, be mifala i stap go long jos long taem nao blong fo Sandei we i folfolem olgeta. Mi luksave ol samting we i defren from ol efot we mifala i mekem. Mifala i gat moa eksperiens long saed blong spirit truaot long wik.
Be, long Sandei we i folem, mifala i wekap let. Taem i 7:30 a.m finis. Mi talem long hasban blong mi se i nomo gat hop, be afta, mi tingbaot olsem wanem bae mifala i kasem blesing sapos mifala i mekem bes blong rere nomata long taem. Mekem se, !mifala i harhariap!
Taem mifala i kasem jos, mifala i let long 20 minit. Mi filim se mifala i no bin winim. Mifala i harem singsing taem mifala i wokbaot i go insaed, mo taem mi openem doa, wan man i stap go antap blong prea.
“?Hemia nao fas hym?” Mi wispa long misinari we i stap stanap long doa.
“Yes,” hem i talem. “Yumi stat let tedei.”
Mi bin sapraes. Mi bin ting se mifala i bin foldaon sot bakegen, be !mifala i kam long jos long stret taem! Wota blong ae i ron daon long fes blong mi taem mi filim lav blong Papa long Heven from smol famli blong mi mo mi.
Afta, mifala i lanem se taem ol misinari oli bin kam long jos long Sandei ia, oli jes luksave se i nogat wan i bin pem bred blong sakramen. I nogat wan stoa kolosap, mo i save had blong faenem bred long Vietnam. Afta long wan taem blong seksek, ol elda oli tingbaot se oli gat bred long haos.
Sam dei bifo, ol elda oli bin kam long haos blong mifala blong dina. Long naet ia, mi bin rere long sam bred blong olgeta. Jos i bin stat let long Sandei moning ia from !ol elda oli bin ron i go long haos blong karem bred ia we mi bin mekem blong olgeta!
God i stap luk ol efot blong yumi taem yumi stap traehad blong kipim ol komanmen blong Hem. Nomata se samtaem yumi foldaon sot, Hem i lavem yumi mo bae i rere long ol rod blong yumi gat sakses—iven taem i blong kasem jos nomo long taem.