Winim Ol Wari blong Wol
Elda Hans T. Boom
Blong Olgeta Seventi
Ol samting blong wol oli no mas karemaot tingting blong mi blong stap obei long tok blong God.
Mi bin spendem ful aftenun blong mi long baeskel blong mi mo stap go long wan bisnis afta nekis wan, lukaotem wan wok.
Ol pikja droing oli kam long Liam O’Farrell
Iven taem oli promesem ol bigfala blesing long yumi, bae yumi lusum ol blesing ia sapos yumi wari abaot ol samting blong wol be i no tingting blong Lod. Hemia i kamaot klia long eksperiens blong wan man long ol eli dei blong Restoresen.
Jemes Kovel i bin wan minista long wan nara bilif blong 40 yia, be afta we hem i bin harem abaot gospel ia we i kambak long wol, hem i “mekem kavenan wetem Lod se bae hem i obei long eni komanmen we Lod bae i givim long hem tru long Profet Josef.” (Doktrin mo Ol Kavenan 39, seksen heding). Tru long Josef, Lod i talem long Kovel: “Lisin Gud long voes blong mi, we i stap talem long yu se: Girap mo kasem baptaes, mo wasemaot ol sin blong yu; mo singaotem nem blong mi, mo bae yu kasem Spirit blong mi, mo wan blesing we i bigwan tumas we yu neva bin save wan olsem bifo” (Doktrin mo Ol Kavenan 39:10).
Be, i no longtaem Kovel i “sakemaot toktok blong Lod, mo i bin gobak long ol prinsipol mo ol pipol blong hem blong bifo,” (Doktrin mo Ol Kavenan 40, seksen heding). Naoia we yumi stap tokbaot Kovel, Lod i talem se “hem i bin akseptem toktok wetem gladhat, be stret afta, Setan i bin temtem hem; mo fasin blong stap fraet blong kasem hadtaem mo fasin blong kea long ol samting blong wol ia i bin mekem se hem i sakemaot toktok blong mi” (Doktrin mo Ol Kavenan 40:2). From wari blong hem long ol samting blong wol, Kovel i bin lusum blesing we Lod i bin promesem hem.
?Bae Mi Stap o Go?
Long laef blong miwan, mi bin lanem se yumi no mas letem ol wari blong wol i tekemaot lukluk blong yumi blong stap obei long Lod. Mi groap long wan naesfala hom blong lav we papa mo mama blong mi i tijim gud mifala long gospel, mo lav blong olgeta long mifala i soemaot lav blong Papa long Heven long ol pikinini blong Hem.
Taem mi gat 16 yia, oli bin invaetem mi blong wok long wan fam long Yunaeted Stet, wetem posibiliti blong wan dei bildim haos blong miwan long we. Hemia i bin wok gud wetem mi from ples blong mi long Nedalan, i wan smol kantri nomo we i fulap long ol man.
I tru, ol bubu blong mi long saed blong papa blong mi oli bin gat semmak tingting ia blong laef long wan nara ples. Oli bin muv i go long Indonesia, we fastaem ol man Nedalan i bin stap rul long hem. Mi save andastanem gud from wanem. Long Indonesia, weta i naes, ol ples ol naes tumas mo i gat fulap spes. Blad blong mi i gat semmak strong tingting ia blong travel we i bin givim insperesen long ol bubu blong mi. ?Bae mi lego ples blong mi tu blong lukaotem sakses mo lukluk ples?
Long taem ia blong mekem desisen, papa blong mi i givim kopi blong wan leta we misin presiden blong olgeta Donovan van Dam, i bin raetem i go long hem mo ol sista blong hem, plante yia i pas. Presiden van Dam i bin askem olgeta blong stap long Nedalan blong bildim Jos long we. Papa blong mi i talem se hem i disaed blong mekem hemia nao. Mo from famli nem blong Boom i stap long leta ia, hem i taem blong mi nao blong faenemaot wanem blong mekem.
Long ol yia afta long Wol Wo Tu, plante memba blong Jos oli muv i go long Amerika mo Kanada. Hemia i stap gohed yet long ol yia blong 1970, nomata we ol Jos lida i stap leftemap tingting blong ol memba blong stap long kantri blong olgetawan mo mekem Jos i kam moa strong long ples we oli stap long hem. Wetem prea, mi bin mekem desisen ia tu blong stap mo bildim Jos long Nedalan, be mi no bin andastanem fulwan, wanem bae hemia i minim long fiuja.
Ol Desisen, Ol Desisen
Taem mi finisim hae skul long samples en blong 1970, ekonomi blong ol man Nedalan i stap long hadtaem. Fulap man i nomo gat wok. Antap long evri samting, i luk olsem ol samting i no gud tumas. Hem i bin had long olgeta we oli graduet blong disaed long wanem nekis samting blong mekem.
Papa blong mi stap olsem branj presiden. Wan wan taem bae hem i storian wetem mi abaot posibiliti ia blong go long wan fultaem misin. Yes, hemia bae i wan gudfala samting blong mekem. Mi bin stap lukluk fored long hemia long ful laef blong mi.
Be mi no bin luk olsem wanem blong go long wan misin i save helpem mi blong winim mane blong fiuja famli blong mi. Stat long taem we mi smol, oltaem mi bin gat wan strong tingting blong wan dei, faenem lav blong laef blong mi mo bildim wan famli blong mitufala.
Mi bin gat 17 yia long taem ia, mo from mi no save wanem nekis samting blong mekem, mi statem nekis level long edukesen blong mi. Be afta long sam wik, mi bin faenem se stadi ia bae i no mekem mi hapi. Mi gat ol kwestin abaot stadi ia se bae i save givim wan gudfala wok long mi o no. Mi bin tingting blong stop skul.
Papa mo mama blong mi i no hapi tumas abaot hemia. Oli talem long mi se mi save stop skul nomo sapos mi gat wan wok. Ating oli stap tingting se bae mi neva faenem wan wok from hadtaem ia long saed blong ekonomi. Mi spendem ful aftenun blong mi long baeskel blong mi mo stap go long wan bisnis afta nekis wan. Long en, wan kampani i tekem mi blong wok long dokhaos blong olgeta.
Plan blong Mi
Nomata we mi bin tekem temporeri wok ia, mi bin gat wan plan. Bae mi kam wan polisman. Blong stap wok blong gavman bae i wan gudfala wei blong stap winim mane blong fiuja famli blong mi mo bae evri samting i wok aot.
Mi tingbaot dei we mi bin go blong mekem ol eksam blong go long polis skul. Mi bin go long tren long eli moning mo spendem ful dei blong mekem eni kaen tes. Long en blong dei, oli singaotem mi i go long ofis. Oli talem long mi se mi bin pasem evri eksam blong mi mo bae oli glad tumas blong tekem mi, be, from se mi gat 17 yia, mi yang tumas. Oli talem long mi blong traem bakegen long wan yia taem.
Wol blong mi brokbrok, mo long ful rod gobak long haos, mi stap tingting: “?Wanem nekis samting?” Long haos, papa blong mi i lisin long kros blong mi mo i askem blong givim wan blesing long mi. Mi bin tingting se bae Lod i talem long mi se bae evri samting i oraet mo bae oli tekem mi i go long skul blong polis long wan wei blong merikel. Be, Lod i talem long mi se sapos mi jusum blong putum Hem faswan, bae oltaem mi gat bred long tebol blong mi mo ol samting we mi nidim blong lukaot long fiuja famli blong mi.
Wan Plan We I Moa Gud
Olsem ansa long ol prea blong mi, mi kasem ansa se, long mi, blong putum Lod faswan, i minim blong go long wan fultaem misin. Oltaem mi bin wantem blong mekem hemia, be mi no bin luk olsem wanem, wan step bae i lid i go long wan nara wan. Naoia mi save se blong go long wan misin i wanem we bae mi mekem, mo mi bin wantem blong mekem hemia hariap nomo.
Long ol taem ia, kos blong wan misin i bin 10,000 gaelda long olfala mane blong ol man Nedalan, o samples salari blong wan yia. Mi gohed blong wok long dokhaos mo long Samataem blong 1981, mi bin gat 10,000 gaelda blong mi. Mi bin gat 18 yia tu. Papa blong mi we i branj presiden i talem long mi se mi yangfala tumas blong go long misin, semmak olsem distrik mo misin presiden. Long taem ia, yu mas gat 19 yia. Be long betdei blong 19 yia blong mi, mi go long dokta mo dentis miwan nomo mo mekem olgeta i fulumap ol pat blong olgeta long misinari aplikesen blong mi.
Mi bin save mekem ol lida blong mi blong intaviu long mi mo givim aplikesen blong mi i go. Afta mifala i wet. Mi no bin save se papa blong mi olsem wan branj presiden, i bin kasem wan leta. Aplikesen ia i bin kambak long hem wetem wan notis se mi yang tumas. Be hem i no bin wantem serem hemia wetem mi yet, mekem se hem i holemtaet i stap long jaket blong hem blong sam wik be i no letem mi save. I bin gud se long semmak taem ia, hem i bin kasem wan nara notis. Notis ia i talem se long sam situesen ol Prishud Brata oli save letem ol yang man i go moa eli sapos oli rere gud. I no longtaem, oli singaotem mi blong givim seves long Inglan London Is Misin. Misin blong mi i bin kam wan blesing blong laef taem.
Ol Blesing we i kam long Lod
Tri manis afta we mi bin kambak long misin blong mi, mi bin mitim lav blong laef blong mi. Wan yia afta, mitufala i mared mo sil long London Inglan Tempol. Ekonomi i stil no stap gud yet, be oltaem mi bin save gat wan wok mo winim mane blong famli blong mi. Oltaem i bin gat bred long tebol mo wan ruf ova long hed blong mifala.
Olsem wan misinari, hemia i bin kam wan long ol fevret skripja blong mi: “folem hamas we bae yu obei long ol komanmen blong God, bae yu kam antap gud long graon ia” (Alma 36:1). Wetem hemia olsem wan gaed, mi disaed blong mekem wanem papa blong mi i bin mekem—blong stap long Nedalan mo bildim Jos long hom ples blong mi.
Famli blong Elda mo Sista Boom long 2019. Stat long taem ia, wan nara bubu gel i bin bon i kam long wol.
Tedei, smol branj we mi bin groap long hem, naoia i wan naesfala wod we ol smosmol bubu blong mifala i stap glad long kampani blong plante fren we oli kam tugeta long bigfala Praemeri klas. Ol boe blong mifala i gat ol gudfala wok mo oli gat blesing blong gat bred long tebol. Mi luk se ol desisen blong mi oli bin gat paoa long nekis jeneresen, we oli gat tingting ia tu blong putum Lod i faswan long laef blong olgeta.
Mi talem tangkyu we mi bin lanem eli long laef blong se raet desisen hem i blong winim ol wari blong wol mo putum Papa long Heven faswan. Hem i bin givim mi ol blesing we sapos no, bae mi neva save.