Ol Besik blong Gospel
Jisas Kraes I Sevem Yumi Aot long Sin mo Ded
From sakrifaes blong Hem, yumi evriwan i gat janis ia blong faenem pis mo glad we i no save finis.
Christ Creating the Earth, i kam long Robert T. Barrett; O My Father, i kam long Simon Dewey; The Burial of Christ, i kam long Carl Heinrich Bloch; Christ Calling Peter and Andrew, i kam long James Taylor Harwood
Yumi lukluk long Jisas Kraes olsem Sevya blong yumi. Hemia from se Hem i bin pemaot praes blong ol sin blong yumi mo i winim paoa blong ded. !Hem i sevem yumi! Sakrifaes blong Hem we yumi singaotem Atonmen, i wan taem we i moa impoten bitim evri nara taem we i bin hapen. From Hem, ded i no en ia. From Hem, yumi save kasem fogivnes from ol sin blong yumi, kam klin bakegen, mo kam moa gud evri dei.
Jisas Kraes I Fasbon
Bifo yumi kam long wol ia, yumi bin laef wetem Papa mo Mama blong yumi long Heven. Olsem Fasbon, Jisas Kraes i bin help blong krietem naesfala wol ia. Oli bin jusum Hem blong i kam Sevya blong yumi mo Hem i bin agri blong bon i kam long wol mekem se Hem i save putum wan eksampol we i stret evriwan, tijim gospel blong Hem, mo flatem Atonmen blong yumi.
Jisas Kraes I Bin Pemaot Ol Sin blong Yumi
Taem Jisas i save se bae Hem i ded i no longtaem, Hem i bin go long wan garen we oli singaotem Getsemane blong prea. Long taem blong prea ia, Hem i stat blong pemaot praes blong ol sin blong yumi. Hem i bin glad blong safa mekem se yumi no nid blong safa, sapos yumi sakem sin. Taem yumi tanembak long ol sin blong yumi mo folem Sevya, yumi save faenem fogivnes mo hiling. Long wan wei we yumi no andastanem fulwan, Jisas i andastanem stret, olsem wanem i fil blong stap olsem wanwan long yumi. Hem i bin filim evri harem nogud, sik, mo soa blong bodi blong yumi. Hemia i fas pat blong Atonmen.
Jisas Kraes I Winim Ded
Christ Creating the Earth, i kam long Robert T. Barrett; O My Father, i kam long Simon Dewey; The Burial of Christ, i kam long Carl Heinrich Bloch; Christ Calling Peter and Andrew, i kam long James Taylor Harwood
Afta long prea blong Hem long Getsemane, oli tanem baksaed long Jisas, arestem hem, mo jajem Hem blong i ded mo hangem Hem long kros. Nomata we Hem i gat evri paoa blong ol paoa, Jisas i letem Hemwan blong i ded long kros. Ol man we oli stap folem Hem, oli putum bodi blong Hem long wan hol blong ston wetem lav. Oli no bin luksave se, nomata we bodi blong Hem i ded, Spirit blong Hem i laef yet long spirit wol. Tri dei afta, Jisas i laef bakegen mo i visitim olgeta, i pruvum long olgeta se Hem i save winim ded, From Jisas i bin laef bakegen long ded, wanwan long yumi bae i laef bakegen long ded afta we yumi ded. Hemia nao i finisim wok blong Atonmen.
Mining blong Krismes mo Ista
Plante ples long wol oli stap selebretem tufala holidei ia we i helpem yumi blong tingbaot Atonmen blong Jisas Kraes. Long taem blong Krismes, yumi stap tingbaot, wetem tangkyu long hat, se Jisas i bin glad mo i bin wantem akseptem misin ia blong kam long wol ia, iven we hemia i minim blong stap safa mo stap ded from yumi. Ista i selebretem win blong Sevya ova long sin mo ded, we i givim yumi hop from wan fiuja mo glad we i no save finis.
?Wanem Nao Ol Skripja Oli Stap Talem Abaot Atonmen?
From se Jisas i save gud huia yumi, Hem i save “helpem” yumi, (luk long Alma 7:11–12).
Ol profet blong bifo oli bin testifae se Sevya bae i andastanem ol harem nogud blong yumi (luk long Aesea 53:2–5).
God i bin sendem Jisas blong sevem yumi from se God i lavem wanwan long yumi (luk long Jon 3:16–17).
Jisas i bin prea from ol man we oli stap folem Hem, we i tekem yumi tu, blong i protektem yumi long devel mo blong yumi stap wan wetem Hem mo Papa long Heven (luk long Jon 17).
Sevya blong yumi i invaetem yumi blong folem Hem mo gobak stap wetem Hem (luk long Doktrin mo Ol Kavenan 19:16–19, 23–24; 132:23).