Ol Yang Adalt
Stap Kam Ol Moa Gud Man blong Lukaot long Wol Ia we God I Bin Krietem blong Yumi
Elda Marcus B. Nash
Blong Olgeta Seventi
I Kam long wan toktok we i hem i givim long namba 18 yia Stegna Senta Simposiom long Yunivesiti blong Yuta long Sol Lek Siti long 12 Epril 2013.
Taem yumi lukaot moa gud long wol ia mo evri samting insaed long hem, moa bae wol i sapotem, givim insperesen, givim moa paoa, mo i mekem hat mo spirit blong yumi i hapi.
Wan samting we mi laekem blong mekem long fri taem blong mi, i blong stap long neja, blong stap wokbaot ol longfala rod, ski, kayak long solwota, ron long baeskel, o iven blong ronron mo lukluk ples long trak. Taem mi wan pikinini, mi laekem tumas blong stap long bus mo filim kwaet mo strong witnes blong ol bigbigfala grin tri abaot Krieta. Taem mi groap i kam olsem wan adalt, mi bin lanem tru long stadi mo fet se, sapos yumi andastanem huia yumi, stamba tingting blong laef ia, mo from wanem oli bin krietem wol ia—mo stap tingbaot ol samting ia—bae yumi tritim wol ia mo evri samting insaed long hem long wan wei we i moa hae mo i gat moa valiu.
Stamba Tingting blong God blong Krietem Wol Ia
Lod, tru long tugeta, ol profet blong Hem blong bifo mo naoia, i bin traem blong helpem yumi blong andastanem mo talem tangkyu from presen ia blong stap laef long naesfala wol ia. Long OlTesteman, David i stap tingting long ol bigbigfala kriesen blong God mo i stap askem hemwan se from wanem—long medel blong ol naesfala samting ia—God i tingbaot fulap ol man (luk long Ol Sam 8:4). Long en, David i talem se yumi ol man, yumi spesel, “hem i hae we i hae, we yu nomo yu hae moa long hem” (Ol Sam 8:5).
Moses tu, i bin luk long wan visen, ol wol we i no gat namba blong hem1 mo talemaot: “Nao, from hemia, mi save se man i nating nomo, mo samting ia, mi neva ting long hem” (Moses 1:10).
Long fasin blong Moses blong putum tingting blong hem i stap daon long fored blong ol kriesen blong God we i naes tumas, i mekem se hem i no bin save andastanem wan bigfala trutok. Mekem se Lod i soem long hem bakegen kriesen blong Hem we i gat limit mo talemaot stret se Hem—God—nao i mekem ol samting ia “blong mekem man i nomo save ded mo i kasem laef we i no save finis” (Moses 1:39). Wol ia—mo evri kriesen—oli mekem blong i helpem yumi blong nomo save ded mo kasem laef we i no save finis.
Lod i talem taem Hem i stap tokbaot stamba tingting blong wol ia se: “bae yumi mekem wan wol we olgeta ia [olgeta ia i minim yumi] bae oli stap long hem; mo bae yumi testem olgeta long wei ia, blong luk sapos bae oli mekem evri samting we Lod, God blong olgeta bae i givim oda long olgeta” (Ebraham 3:24–25; luk tu long ves 26). Tugeta, laef long wol ia mo presen blong gat fridom blong jusum, i givim janis long yumi blong jusum blong lukaot ol samting blong God mo kasem evri samting we Hem i stap givim.2
Taem oli finis blong krietem wol ia, God i bin glad from Hem i luk se bae i helpem stamba tingting we Hem i gat blong yumi, ol pikinini blong Hem.3 Ol pikinini boe mo gel blong God mo ol famli we oli mekem, oli no ol man we oli kam nating nomo olsem long wol ia; be, oli senta long stamba tingting blong wol ia.4
Yumi Sapos blong Stap Olsem Ol Gudfala Man blong Lukaot long Wol Ia
Laef long wol ia i wan blesing mo wan responsabiliti. Lod i talemaot se: “From luk, ol animol long plantesen mo ol pijin long skae, mo evri samting we i kamaot long graon, God i odenem blong man i yusum blong kaekae mo klos, blong hem i save gat fulap” (Doktrin mo Ol Kavenan 49:19). Be, from wol ia mo evri samting insaed long hem “oli ol samting we [Hem i] mekem wetem han blong [Hem]” (Doktrin mo Ol Kavenan 29:25), evri samting i blong Hem.5 Olsem ol man blong stap smol taem long wol ia, yumi ol man blong lukaot long ol samting nomo—yumi no ol ona blong ol samting. From hemia, yumi akaontebol long God—ona blong wol ia—from ol samting we yumi mekem wetem kriesen blong Hem: “From hem i nid blong mi, Lod, mi mas mekem evri man i ansa from ol samting we hem i mekem, olsem wan man blong lukaot long ol blesing we mi givim long wol ia, we mi bin mekem mo mi bin rere blong olgeta man we mi krietem” (Doktrin mo Ol Kavenan 104:13).
Olsem wanem yumi kea long wol ia, olsem wanem yumi yusum mo serem ol fulap samting blong hem, mo olsem wanem yumi tritim evri samting we oli bin givim long yumi, i pat blong tes blong yumi long laef ia. Yumi mas yusum gud ol samting we Lod i bin givim long yumi wetem fasin blong talem tangkyu, no westem laef mo ol risos, mo yusum ol fulap samting blong wol ia blong kea long olgeta pua.6 Lod i kea fulap blong evri laef, speseli ol pikinini blong Hem, mo bae yumi akaontebol long Hem from wanem yumi jusum blong mekem (o no mekem) wetem ol fulap samting blong kriesen blong Hem.
Lod i promesem yumi se sapos yumi folem Hem mo yusum gud wetem waes, ol risos blong wol ia wetem fasin blong talem tangkyu mo respek, “evri samting long wol ia i blong [yumi]; ol animol long plantesen mo ol pijin long skae. … Mo hemia i mekem God i glad, se hem i givim evri samting ia long man; from stamba tingting ia nao, God i bin mekem olgeta samting ia blong man i yusum; wetem gud jajmen; i no blong man i yusum i ova, mo i no wetem fos” (Doktrin mo Ol Kavenan 59:16, 20).
Yumi mas yusum ol risos ia wetem waes tingting mo tangkyu, wetem tingting blong wantem helpem ol narawan—ol jeneresen naoia, long pas mo fiuja—oli kasem ol blesing we Papa blong yumi long Heven i wantem blong ol pikinini blong Hem.
Stap Lukluk i go moa bitim Yumiwan
Sore we tedei, yumi laef long wan wol we maet wanwan man o woman i jusum blong go agensem God mo tritim nogud kriesen blong Hem. Taem hemia i hapen, God mo kriesen blong Hem i harem nogud.
Inok i raetem we God i bin krae from ol nogud joes mo selfis blong ol pikinini blong Hem.7 Moronae i bin profesae se long ol las dei, bae i gat “ol faea, mo ol hariken, mo ol hot stim blong smok … [mo] plante doti samting long fes blong wol,” mo we ol situesen olsem bae i kam wetem “evri kaen fasin blong rabis sin; taem we bae i gat plante we bae oli talem, Mekem samting ia, o mekem narafala samting ia mo i nomata” (Momon 8:29, 31). Taem man i mekem doti long wol ia long saed blong spirit o wol, i no God nomo we i safa, be !neja i safa tu!8
Moa impoten, ol blesing mo paoa we i stap tru long Jos mo gospel blong Lod we i kambak long wol, i gat paoa ia blong save go moa bigwan mo jenisim sol blong yumi ol man bitim wanem we i save, blong givim insperesen long lav blong God mo kriesen blong Hem, mo blong helpem yumi blong tingbaot gudlaef blong ol narawan mo tingting long ol nid blong ol fiuja jeneresen.
Neja I Karem Yumi Moa Kolosap long God
Wol mo laef blong evri samting insaed long hem i moa bitim ol samting blong yusum mo/o sevem; sam pat blong hem i blong yumi !sevem blong fiuja tu! Neja we oli no spolem mo “evri samting we oli kamaot long graon … oli stap blong helpem man … blong i luk naes long ae blong hem mo blong i mekem hat blong hem i glad … mo blong givim paoa long sol” (Doktrin mo Ol Kavenan 59:18–19).
Neja we oli no tajem o spolem, i karem yumi kam moa kolosap long God, i kliarem maen mo hat long ol noes blong samting we i pulumaot tingting long ol samting blong wol, i leftemap yumi i go long wan ples we i moa hae, mo i helpem yumi blong save moa abaot God blong yumi: “Long wing blong hem, wol i stap flae raon, mo san i givim laet blong hem long dei, mo mun i givim laet blong hem long naet, mo ol sta tu, oli givim laet blong olgeta. … [Eni] man we i bin luk eniwan long olgeta o hemia we i daon moa long olgeta, nao hem i bin luk God we i stap muv wetem glori mo paoa blong hem” (Doktrin mo Ol Kavenan 88:45, 47).
Mi stil laekem tumas blong wokbaot antap long ol maonten antap long ol naesfala ston mo hae pat blong maonten. Nomata we i kwaet, oli tokbaot paoa mo bigfala paoa blong God—mo fasin blong waes tingting blong Hem long saed blong ol naesfala samting we i no gat wan samting i save semmak long hem. Olsem Alma i bin testifae: “Evri samting i soem se i gat wan God; yes, wol ia tu, mo evri samting we oli stap fes blong hem, … oli witnes se i gat wan Krieta we Paoa blong hem i Hae Tumas” (Alma 30:44).
Mi laekem tumas blong stap wajem ol sta long naet mo traem blong mekem maen blong i kavremap taem mo taem mo spes we i no save finis we mi stap lukluk. Oltaem mi sapraes long save we mi stap kasem long ol kwaet taem ia, nomata long bigfala mama wol ia, Lod blong yunives ia i save mi ia we mi smol tumas insaed long wol ia. Mo Hem i save wanwan long yumi. Kriesen i witnes long Krieta, mo sapos yumi sevem ol spesel ples ia mo no spolem, bae oli witnes bigwan mo strong abaot God blong yumi mo gohed blong givim insperesen long yumi.
Taem yumi lukaot moa gud long wol ia mo evri samting insaed long hem, moa bae wol i sapotem, givim insperesen, givim moa paoa, mo i mekem hat mo spirit blong yumi i hapi—mo bae i rere long yumi blong laef wetem Papa blong yumi long Heven wetem ol famli blong yumi long wan selestial wol, we bae i wol ia stret we yumi stap stanap long hem tedei, be long wan taem we ples i kasem glori.9
Letem yumi kea long wol ia wetem fasin blong talem tangkyu—hom blong yumi naoia mo wol ia we i save kam fiuja hom blong yumi.