Eria Lidasip Mesej
Yu Mekem Tingting blong Yu
Sevya blong yumi, Jisas Kraes, i hae eksampol blong stap letem tingting blong Papa i win. Long garen blong Getsemane, taem we Kraes i bin stap prea long Papa blong Hem, taem we Hem i bin stap tekem long Hem ol sin, ol hadtaem, mo ol nogud samting blong wol ia, mi no save stat blong tingting nomo long ol bigfala harem nogud long bodi blong Hem, ol bigfala harem nogud long sol blong Hem we Hem i mas safa from, mo save talem: “Papa, sipos yu save mekem, plis yu tekemaot ol samting ya we i stap mekem mi mi harem nogud tumas”; be yet, bigfala lav mo fasin blong Hem blong stap obei, Hem i bin soemaot taem Hem i gohed blong talem: “Be yu no mekem olsem we mi mi wantem, yu mekem olsem we yu nomo yu wantem.”1
Truaot long ol skripja, yumi stap rid abaot ol nara fetful disaepol we oli bin serem ol semmak filing olsem hemia blong Sevya, mo oli bin letem tingting blong Papa i win. Bifo we Abinadae i silim testemoni blong hem wetem laef blong hem, wetem strong paoa long tingting hem i bin serem mesej ia blong gospel mo i bin talem: “. . . Be mi endem mesej blong mi, mo afta, i nomata se mi go long wanem ples, sapos i hapen se Lod i sevem mi.”2
Semmak, Sadrak, Mesak mo Abednego oli bin talem long King Nebukadnesa: “Sipos i tru we bambae yu sakem mitrifala i go long bigfala faea ya, be God ya we mitrifala i wok blong hem, hem i save sevem mitrifala, mo i save tekemaot mitrifala long paoa blong yu.
“Be sipos hem i no sevem mitrifala, nating nomo. Be yu yu mas save se bambae mitrifala i no save mekem wosip long ol god blong yu, mo bambae mitrifala i no save bodaon long aedol ya we yu stanemap.”3
Mo Amon, boe blong King Mosaea, we, wetem bigfala lav mo sore i “prijim toktok blong God long wan pipol we i wael mo i bin mekem hat blong hem i kam strong mo i prapa wael,”4 nao wanem i strong i stap long hat blong hem, i kamaot long sot ansa blong hem long King Lamonae: “Yes, mi wantem blong stap wetem pipol ia blong samfala taem; yes, mo maet kasem dei we bae mi ded.”5
Ol strong disaepol blong Lod ia oli no bin foldaon long testemoni blong olgeta, mo olsem Sevya, wanwan i bin letem tingting blong Papa i win agensem gud laef blong olgeta.
Mi tingbaot we, taem mi yangfala, we mi stap lisin long stori blong taem we papa blong mi i bin jenisim laef. Taem we oli stat blong tekem gospel blong Jisas Kraes i kam long Samoa, plante oli no bin glad long hemia. Plante oli bin filim se hemia i wan niu relijin, mo oli bin faet agensem relijin ia mo oli mekem nogud long olgeta we oli joenem relijin ia. Plante konvet, oli ronemaot olgeta long ol hom vilej blong olgeta, mo plante oli bin ronwe oli go long ol ples we oli save haed long hem. Papa blong mi, we hem i wan yang man we i laekem blong save samting, i wantem faenemaot wanem nao niufala relijin ia i bin stap tijim. Afta sam taem, hem i baptaes long Jos Ia blong Jisas Kraes Ia blong Ol Lata-dei Sent.
Taem we nius i stap goraon tru long vilej se papa blong mi i bin joenem Jos ia, wan fren blong mifala blong vilej ia i wari, mo i givim woning long hem se toktok i stap goraon se bae oli kukum hem i laef insaed long umu (bigfala faea antap long ston laplap), mekem se papa blong mi i ronwe mo i faenem wan ples blong haed long haos blong Malietoa Talavou Pe’a Fitisemanu mo Alisa Fitisemanu. Nomata we laef blong hem i stap long denja, hem i putum tingting blong hem i strong long niufala bilif blong hem. Olsem we Sevya i bin tijim: “Bambae yufala i save makem olgeta long frut blong laef blong olgeta.”6 Ol blesing blong Gospel Ia we I Kambak, we i blong Jisas Kraes, insaed long laef blong mi wetem waef blong mi mo ol pikinini blong mitufala, mo insaed long laef blong ol famli blong ol pikinini blong mitufala, oli samfala frut ia blong bilif blong papa blong mi.
Presiden Russell M. Nelson i tijim: “Kwestin we i kam long wanwan long yumi, i nomata kala blong skin blong yumi, i semmak nomo: ?Yu yu wantem letem God i stap win insaed long laef blong yu? ?Yu yu wantem letem God i paoa ia we i moa strong insaed long laef blong yu? ?Bae yu yu letem ol toktok blong Hem, ol komanmen blong Hem, mo ol kavenan blong Hem oli lidim tingting blong yu long wanem yu stap mekem evri dei? ?Bae yu yu letem voes blong Hem i kam faswan ova long eni nara samting? ?Yu yu wantem letem wanem Hem i nidim yu blong mekem i kam faswan long evri nara bigfala tingting we yu yu gat? ?Yu yu wantem se tingting blong yu i draon insaed long tingting blong Hem?”7
Mi mi talem bigfala tangkyu from eksampol blong papa blong mi, from ol fetful wokman ia blong Lod we oli raetem abaot olgeta, mo from plante fetful disaepol mo man mo woman we oli stap folem Kraes. Mi mi talem tangkyu blong mi we i no save finis, from eksampol ia, we i stret evriwan, blong Sevya, we oltaem, i stap mekem tingting blong Papa blong Hem.
Taem yumi stap akseptem invitesen ia blong Presiden Nelson blong “jusum blong letem God i win insaed long laef blong yumi,”8 bamabe yumiwan i gat eksperiens ia se, God blong yumi, i “wan God blong ol merikel.”9 Mi biliv se, long tetaem ia, bambae yumi save talem wetem wan hat we i wantem mo i stap daon: “Papa, . . . yu no mekem olsem we mi mi wantem, yu mekem olsem we yu nomo yu wantem.”10