Lokol Pej

Ol Studen blong Tonga Oli Helpem Wan Skul Fren blong Olgeta

Niusrum

Bigfala faea i prapa spolem gud wan hom be i givim ol studen wan janis blong soem huia stret olgeta.

Taem we prapa nogud taem i kasem wan vilej long Polinesia, help i no bin stap longwe nating. Hemia i jes wei we ol samting oli stap hapen long ol strong komuniti blong Pasifik.

Hemia i bin tru, speseli long Tevita Lei, wan studen long Saineha Hae Skul long Vava’u, Tonga.

Taem se hom blong famli blong hem i bin bon evriwan long wan faea, oli bin lusum evri samting. Long nekis dei, ol fren blong hem long skul oli go tugeta wanples, mo oli toktok raon long wanem famli ia i nidim blong stat mekem hom blong olgeta i kambak tugeta.

Mele’ana Mafi i stap tijim kompiuta saens long skul, we Jos Ia blong Jisas Kraes blong Ol Lata-dei Sent i lukaotem. Hem i tingbaot dei ia we hem i lukluk raon long klasrum blong hem mo luk se wan i nomo stap long klas. Ol studen oli konfemem se Tevita Lei i no bin stap.

Tija i askem: “?From wanem hem i no stap?”

Wan kwaet voes biaen long klas i talem: “Haos blong hem i bon evriwan long las wik.”

“Simpol toktok storian blong mifala i lidim evriwan blong i tingting aotsaed long bokis,” Mele’ ana i tingbaot.

“Ol studen oli stat blong volontia blong givim samfala samting we famli i nidim hariap, olsem yunifom, tul blong skul, mo wan niu basket blong skul. Nara haf blong ol studen oli volontia blong givim ol nara samting olsem, kaekae, klos mo blangket.”

Mele’ana i go luk prinsipol blong skul, Motuliki Fakatava, blong talem long hem abaot situesen mo luk sapos hem i save givim transpot blong ol memba blong klas blong go givim ol samting we oli putum tugeta. Hem i agri wantaem.

Motuliki i ripot, i talem: “Taem we Mele’ana i talem stori ia long mi, mi filim wan bigfala filing blong talem tangkyu. Samfala manis i pas, mi bin filim se mi mas putum sam kaekae mo sam klos i go long storej, be mi no bin save se from wanem, mo bae hem i blong hu. Taem we Mele’ana i talem stori ia long mi, mi bin save se hemia i bin raet taem mo raet stamba tingting.

Long nekis dei, evri memba blong kompiuta klas blong Tevita oli go long bas blong skul long taem blong fri taem blong olgeta, mo oli go luk wanem i stap. Antap long ol samting blong Motuliki, ol studen oli tekem wanem we oli bin save kolektem, olsem sam raes, flaoa, suga, bin mo strong biskit.

Oli faenem Tevita mo papa blong hem we tufala i stap tufalawan long medel blong ol haos blong olgeta we i bon.

Mele’ana i talem: “Mi talem long papa blong hem wanem i stamba tingting blong visit blong mifala mo askem hem raet blong holem wan sot divosen wetem tufala.

“Taem we mifala i stat blong singsing ‘Tangkyu Papa God Yu Givim Profet,’ mifala i rili filim Spirit i stap mo i konfemem lav ia we God i gat long ol pikinini blong Hem. Wan i givim wan prea wetem hat blong hem we i rili tajem hat blong mifala mo mekem mifala evriwan i krae.”

Hem i gohed i talem: “Mi harem hat blong mi i brokbrok taem mifala i kasem ples ia mo luk Tevita mo papa blong hem i stap traem blong klinap ol asis mo ol samting blong hom we oli bon i stap. Mi bin save long hat blong mi se hemia i bin stret samting blong mifala i mekem.”

Sam long ol studen oli bin serem ol filing blong olgeta abaot visit blong olgeta i go long Tevita mo papa blong hem:

• “Las naet, tingting blong mi i fasfas abaot wanem bae mi givim long famli. Wan tingting i kam se i nomata wanem bae mi givim, sapos samting ia i smol, i bigwan, i no sas o i sas, be yu bin traem bes blong yu blong help. Hemia i soem famli blong Tevita se hemia i no en mo gudfala Masta i lavem olgeta. Mi bin luk smael long fes blong olgeta, mo i mekem mi mi tingting abaot famli blong mi.”

• “Mi hop se wanem mifala i bin givim olgeta i bin wan bigfala help long famli blong olgeta. Taem yumi stap helpem ol narawan, yumi lan blong lavem olgeta semmak olsem yumi lavem yumiwan bakegen. Mi mi talem tangkyu, mo prea se bae God i blesem famli blong olgeta.”

• “Taem mifala i kasem ples, mi jes traem pikjarem mi se mi nao mi stap ia, wetem kaen hadtaem ia mo stap fesem hadtaem blong gohed blong laef. Wanem i tajem mi moa i taem papa blong hem i talem se hem i talem tangkyu se Tevita i gat wan famli aotsaed long stret famli blong hem, we i minim mifala, ol kompiuta klas fren blong hem.”

• “Blong luk tingting blong ol fren blong mi long klas we oli glad blong helpem hem, i rili tajem hat blong mi. Hemia i soem lav blong famli ia we mifala i bin gat long klas blong mifala. I nomata se help blong mifala i bigwan olsem wanem long Tevita Lei, hemia i no bin mata, be wanem i mata, i we ol klas fren oli bin wantem blong givhan long dia brata blong mifala. Bae mifala i neva lego wan i stap biaen hemwan.”

• “Mi save se papa blong Tevita i bin glad tumas mo i tangkyu from ol samting we mifala i bin save mekem. Hem i talem se naoia hem i save filim ‘se i gat wan famli i stap blong boe blong hem, we i kea long boe blong hem.’ Evriwan long laef ia, i famli nomo.”

• “Taem we mi luk brata ia, hat mo sol blong mi i fulap wetem spirit blong lav. Mi bin glad long tija blong mi from gudfala spirit we i bin givim insperesen, olsem wan kompiuta klas, blong visitim klas fren blong mifala, Ti Lei. Mi filim lav ia we Jisas i gat long ol pikinini blong Hem.”

Mele’ana i bin talem sot ol tingting blong hem abaot eksperiens ia: “Mi mi talem tangkyu from janis blong go helpem Tevita wetem klas blong mifala. Wanem i hapen long moning ia, i bin wan gud wei blong statem dei. Ol aksen blong kaen fasin, wok tugeta, lav, sore, mo seves i soemaot huia stret olgeta. Oli ol pikinini boe mo pikinini gel blong Papa long Heven.”

Taem mi stap gobak long klasrum blong mi, mo tingtingbak long ol studen blong mi mo gud fasin mo sore blong God long ol pikinini blong Hem, skripja ia long Alma 26:37 insaed long Buk blong Momon, Wan Nara Testeman blong Jisas Kraes, i talem:

“Nao ol brata blong mi, yumi luk se God i stap tingbaot evri pipol, long eni kaen graon we maet oli stap long hem; yes, hem i kaontem ol pipol blong hem, mo stamba blong sore blong hem i stap kavremap ful wol. Naoia hemia i glad blong mi, mo bigfala tangkyu blong mi; yes, mo bae mi talem tangkyu long God blong mi blong oltaem. Amen.”