Lokol Pej
2020 Tingting “Biaen”
Mi bin luk Histri blong Jos olsem “histri blong olgeta,” mo “stori blong olgeta.” . . . !I no hemia blong mi!
Mi bon mo mi groap long Afrika; papa blong mi i wan Inglis man mo mama i haf Rodes mo Itali; nao mi no filim se mi mi joen long ol fasfala paeonia memba blong Jos long Amerika. Wanem i stap, mi bin luk Histri blong Jos olsem “histri blong olgeta,” mo “stori blong olgeta.” . . . !I no hemia blong mi!
!So traem tingting se mi glad hamas taem mi luk wan mesej long FamilySearch we i kamaot long Facebook pej blong mi we i talem long mi se mi mi gat wan paeonia bubu! Kwiktaem, mi bin filim se mi mi joen long ol fasfala memba blong Jos, mo kwiktaem mi faenem se mi mi stap long wan ful niufala stori.
Nem blong hem i Margaret Rebecca Bird; taem hem i gat 13 yia, hem i aot long Kensvil, Indiana wetem Wilfod Wudrof wagun kampani i go long Bigfala Sol Lek Vale. Ol paeonia ia, oli gotru long wan nogud 120 dei wokbaot we oli krosem Ol Bigfala Flat Ples i go kasem Yuta.
Naoia mi filim se mi mi pat blong profesi blong Malakaes, se hat blong ol pikinini bae i tanem i go long ol papa blong olgeta (Malakae 4:6)—we oli ol papa blong mi long wan graon we i stap longwe.
Mo ol blesing oli gohed blong kam. Naoia, mi save rid abaot plante long ol eksperiens we ol paeonia oli fesem, we oli raetem insaed long Ol Sent, we i wan buk we i gat fo namba, we i stori blong Jos Ia blong Jisas Kraes blong Ol Lata-dei Sent, long ol las dei. Ol Buk 1 mo 2, oli pablisim tufala finis.
Elda Dale G. Renlund blong Kworom blong olgeta Twelef Aposol talem: “histri blong Jos ia i impoten tumas long ol memba blong Jos mo long Lod.” Long Epril 1830, Lod i talem: “Luk, i mas gat wan histri we yufala i holemtaet” mo Oliva Kaodri i kipim histri ia blong wan yia. Nao Lod i bin singaotem Jon Witma blong “i kipim rekod blong Jos i stap long histri oltaem” mo hem i bin kasem wan promes se Spirit blong Givhan bae i letem hem blong “raetem ol samting ia” taem hem i stap fetful. Jon Witma i bin lanem se “histri ia bae i blong gud blong Jos mo speseli ol jeneresen ia we oli stap kam antap.”
Lod i bin klia blong talemaot olsem wanem blong kipim ol histri ia, we i anda long daereksen blong Tabu Spirit.
Ol pej insaed long Ol Sent oli fulap nomo wetem ol tru samting we oli bin hapen; i gat ol stori blong wanwan man mo woman we oli ol fetful memba we oli bin developem ol fasin olsem hemia blong Kraes taem we oli bin fesem ol agens taem we oli bin stap laef folem gospel long bes wei we oli save mekem. Elda Renlund i bin talem tu: “Histri ia, Ol Sent, insaed i gat ol stori blong ol pipol we oli bin kamaot long kavenan rod ia, we tru long Atonmen blong Jisas Kraes, oli bin faenem rod blong olgeta i kambak.”
Blong ol memba we oli bin gat strong tingting blong lukluk i go moa long ol taem ia i dip moa, i gat ol handred blong ol risos long en blong buk ia.
Hindsight i wan tul we i help; Mi faenem se mi bin stap luklukbak long hamas nao mi bin sapraes taem mi bin filim se mi mi joen long ol paeonia famli blong mi. . . . Mo i no jes Margaret Bird nomo, !be olgeta evriwan! Long yia ia, 2020, mi bin faenem tru long FamilySearch se mi mi gat plante paeonia famli.
Elda Renlund i tijim: “Lod i yusum ol stori blong wanwan blong yumi blong tijim yumi olsem wanem blong kam kolosap moa long Hem, blong sakem sin, mo blong kam moa olsem Hem. Hemia stamba tingting blong yumi blong stap long wol ia, stamba tingting blong gat gospel ia, mo stamba tingting blong Jos Ia blong Jisas Kraes blong Ol Lata-dei Sent.”
Mi mi talem tangkyu from famli blong mi mo ol koneksen we yumi save mekem taem we taem i pas mo wetem ol defren ples. Hop blong mi, i we, wan dei, bae laen blong mi bae i ridim histri blong miwan, mo bae i filim se mi bin raetemdaon ol eksperiens we oli bin impoten tumas long olgeta blong oli kam long Kraes, semmak olsem mi, mo traem wok anda long daereksen blong Tabu Spirit.